ఎన్‌కౌంటర్‌లో ముగ్గురు ఉగ్రవాదులు హతం.. ఎదురుకాల్పుల్లో ఆర్మీ జాగిలం వీరమరణం

సోమవారం జమ్మూ కశ్మీర్‌లోని అఖ్నూర్ సెక్టార్‌లో ఆర్మీ వాహనంపై కాల్పులు జరిపిన ఉగ్రవాదులను సైన్యం మట్టుబెట్టింది. ఈ ఆపరేషన్‌లో పాల్గొన్న ఆర్మీ జాగిలం కూడా ప్రాణాలు కోల్పోవడం బాధాకరం. 27 గంటల పాటు సాగిన ఈ ఆపరేషన్ మంగళవారం ఉదయం ముగిసినట్టు అధికారులు ప్రకటించారు. నియంత్రణ రేఖ సమీపంలో సోమవారం ఉదయం ఆర్మీ కాన్వాయ్‌లో భాగమైన అంబులెన్స్‌పై ఉగ్రవాదులు కాల్పులు జరిపిన విషయం తెలిసిందే. ఉగ్రదాడితో అప్రమత్తమైన సైన్యం ఆ ప్రాంతంలో ముమ్మర తనిఖీలు చేపట్టింది. ముష్కరుల కోసం గాలింపు చేపట్టిన భద్రతా బలగాలు.. భారీ ఆపరేషన్ నిర్వహించాయి. సైన్యం, జమ్మూ కశ్మీర్ పోలీసులు సంయుక్తంగా చేపట్టిన ఈ ఆపరేషన్ సోమవారం సాయంత్రం ఓ ఉగ్రవాదిని హతమార్చాయి.

జోగ్వన్ గ్రామం అసాన్ ఆలయం సమీపంలో మంగళవారం ఉదయం మరో ఇద్దర్ని సైన్యం కాల్చిచంపింది. రాత్రి సమయంలో ఆపరేషన్‌కు కాసేపు విరామం ఇచ్చిన భద్రతా బృందాలు తిరిగి ఉదయం 7 గంటలకు మళ్లీ ప్రారంభించాయి. దీంతో ఉగ్రవాదులు, సైన్యం మధ్య భీకర కాల్పులు చోటుచేసుకున్నాయి. రెండు గంటలకుపై గా సాగి ఈ కాల్పుల్లో ఇద్దరు ఉగ్రవాదులు హతమయ్యారు. ఈ ఆపరేషన్‌ కోసం బీఎంపీ-2 ఇన్‌ఫాంట్రీ వాహనాలు, ప్రత్యేక దళాలు, నేషనల్ సెక్యూరిటీ గార్డ్స్ కమాండోలు, డ్రోన్లు, హెలికాప్టర్ల కూడా రంగంలోకి దిగాయి.

‘రాత్రి సమయం కావడంతో విరామం తర్వాత, భద్రతా బలగాలు ఉదయం 7 గంటల ప్రాంతంలో ఉగ్రవాదులపై తుది దాడికి దిగాయి.. ఇది తాజా కాల్పులకు దారితీసింది.’ అని అధికారులు తెలిపారు. దాక్కున్న ఉగ్రవాదుల కోసం అన్వేషించిన ‘ఫాంటమ్’ అనే ఆర్మీ శునకం బుల్లెట్ గాయాలతో ప్రాణాలు విడిచింది. ఉగ్రవాదులతో ఎదురుకాల్పుల్లో ఫాంటమ్‌కు బుల్లెట్లు తగిలి, తీవ్రమైన గాయాలతో వీర మరణం పొందింది. ఫాంటమ్ మృతిపై ఆర్మీ ఒక ప్రకటన విడుదల చేసింది.

‘మన నిజమైన హీరో, వీర భారత ఆర్మీ డాగ్ ఫాంటమ్ అత్యున్నత త్యాగానికి మేము సలాం చేస్తున్నాం... ఫాంటమ్ ధైర్యం, విధేయత, అంకితభావం ఎప్పటికీ గుర్తిండిపోతాయి’ అని వైట్ నైట్ కార్ప్స్ అని పిలిచే 16 కార్ప్స్ సోషల్ మీడియాలో వెల్లడించింది. బెల్జియం మాలినోయిస్ జాతికి చెందిన నాలుగేళ్ల వయసున్న ఫాంటమ్.. మే 25, 2020న జన్మించింది. ఉగ్రవాద వ్యతిరేక, తిరుగుబాటు నియంత్రణ కార్యకలాపాల ఆపరేషన్‌లలో పాల్గొనే కే9 యూనిట్‌లో భాగంగా ఉంది. మీరట్‌లోని రీమౌంట్ వెటర్నరీ కార్ప్స్‌లో శిక్షణ ఇచ్చిన ఈ శునకం.. ఆగస్టు 12, 2022న ఆర్మీలో చేరింది.