రాత్రయితే మేమెలా వెళ్లాలి? రోడ్డెక్కిన మహిళలు

విజయవాడలో మద్యం దుకాణానికి వ్యతిరేకంగా స్థానికులు రోడ్డెక్కారు. నివాస ప్రాంతంలో మద్యం దుకాణం ఏర్పాటు చేశారని.. వెంటనే తొలగించాలంటూ ర్యాలీ నిర్వహించారు. ఏపీలో నూతన మద్యం విధానం అమల్లోకి వచ్చిన తర్వాత విజయవాడ దేవీనగర్ 8వ రోడ్డులో ట్రెండ్ సెట్ మేడోస్ బార్ ఏర్పాటు చేశారు. అయితే ఈ లిక్కర్ షాపు ఏర్పాటును స్థానికులు తీవ్రంగా వ్యతిరేకిస్తున్నారు. జనావాసాల మధ్య లిక్కర్ షాపు ఏర్పాటు చేస్తే ఎలా అని ప్రశ్నిస్తున్నారు. అధికారం ఉంది కదా అని ఇళ్ల మధ్యలో మద్యం షాపు పెడతారా అని ప్రశ్నిస్తున్నారు. బుద్ధి, జ్ఞానం ఉన్నోళ్లు ఎవరైనా ఇళ్ల మధ్యలో మద్యం షాపు ఏర్పాటుకు అనుమతి ఇస్తారా అని మండిపడుతున్నారు.

విజయవాడ వరదల సమయంలో సీఎం చంద్రబాబు నాయుడు తమకు ఎంతో సహకారం అందించారన్న స్థానికులు.. అధికారులు తీసుకునే ఇలాంటి నిర్ణయాలతో ప్రభుత్వంపై ఉన్న మర్యాదను కూడా పోగొట్టకూడదని సూచిస్తున్నారు. ప్రస్తుతం సమాజంలో పరిస్థితులు బాగాలేవంటున్న స్థానికులు.. ఇప్పటికే గంజాయి బ్యాచుల కారణంగా రాత్రి వేళ భయం భయంగా వెళ్తున్నామంటున్నారు. ఇప్పుడు ఇలా ఇళ్ల మధ్యలో లిక్కర్ షాపు పెడితే మహిళలు, అమ్మాయిలకు రక్షణ ఎలా అని ప్రశ్నిస్తున్నారు. వెంటనే ఈ లిక్కర్ షాపును తొలగించాలని డిమాండ్ చేస్తున్నారు.

మరోవైపు నూతన మద్యం విధానం ప్రకారం మద్యం షాపుల్ని బడికి, గుడికి దూరంగా ఏర్పాటు చేయాల్సి ఉంటుంది. లిక్కర్ షాపులను ప్రభుత్వ, ప్రైవేట్‌ స్కూళ్లు.. కాలేజీలకు వంద మీటర్లకు పైగా దూరంలో ఉండేలా చూడాలి. అప్పుడే మద్యం షాపునకు అనుమతిస్తారు. అలాగే ఆలయాలు, మసీదులు, చర్చిలు వంటి ప్రార్థనా మందిరాలకు కూడా వంద మీటర్లకు అవతల వైపు లిక్కర్ షాపులు ఉండాలి. షాపుల ఏర్పాట్లను పరిశీలించిన తర్వాతే రెండేళ్ల కాలానికి గానూ శాశ్వత అనుమతులు మంజూరు చేస్తారు. అయితే ఇలా ఇళ్ల మధ్యలో షాపు ఏర్పాటుకు అనుమతి ఇవ్వడంపై స్థానికులు మండిపడుతున్నారు.

మద్యం డిస్టిలరీల్లో సోదాలు

మరోవైపు రాష్ట్రంలో పలుచోట్ల మద్యం డిస్టిలరీల్లో సీఐడీ సోదాలు నిర్వహించింది. ఈ క్రమంలోనే ఉమ్మడి తూర్పుగోదావరి జిల్లా పెద్దాపురం మండలం చిన బ్రహ్మదేవం, నల్లజర్ల మండలం ఆవపాడు, రాయవరం చెల్లూరు, తాళ్లపూడిలోని అన్నదేవరపేటలోని డిస్టిలరీల్లో సీఐడీ అధికారులు తనిఖీలు చేపట్టారు. గత ప్రభుత్వ హయాంలో జరిగిన అక్రమాలపై వివరాలు సేకరించినట్లు సమాచారం.