ఏపీలో వారందరికీ ఫ్యాన్లు, బల్బులు, ట్యూబ్‌లైట్లు.. ప్రభుత్వం కీలక ఒప్పందం

ఏపీలోని పేదల ఇళ్లల్లో వెలుగులు పంచేందుకు ఏపీ ప్రభుత్వం కీలక ఒప్పందం కుదుర్చుకుంది. 1.50 లక్షల ఇళ్లకు విద్యుత్ ఉపకరణాలను అందించేందుకు రాష్ట్ర ప్రభుత్వం ఇటీవల ఒప్పందం కుదుర్చుకుంది. కేంద్ర ప్రభుత్వం, విద్యుత్ శాఖ జాయింట్ వెంచర్ అయిన ఎనర్జీ ఎఫిషియన్సీ సర్వీసెస్ లిమిటెడ్‌తో.. ఆంధ్రప్రదేశ్ స్టేట్ హౌసింగ్ కార్పొరేషన్ లిమిటెడ్, అలాగే ఏపీ స్టేట్ ఎనర్జీ ఎఫిషియన్సీ డెవలప్‌మెంట్ కార్పొరేషన్ లిమిటెడ్ ఇటీవల ఒప్పందం కుదుర్చుకున్నాయి. ముఖ్యమంత్రి నారా చంద్రబాబు నాయుడు సమక్షంలో ఈ అగ్రిమెంట్ కుదిరింది. ఈ ఒప్పందం ప్రకారం ఏపీలోని లక్షా 50 వేల ఇళ్లకు ఎల్ఈడీ బల్బులు, ట్యూబ్ లైట్లు, బీఎల్‌డీసీ ఫ్యాన్లు అందించనున్నారు. విద్యుత్‌ను ఆదా చేసే ఉద్ధేశంతో ఈ ఒప్పందం జరిగింది.

ఈ ఒప్పందంలో భాగంగా తక్కువ ఆదాయం ఉన్న వారి కోసం ప్రధానమంత్రి ఆవాస్ యోజన కింద నిర్మిస్తున్న 1.50 లక్షల ఇళ్లకు.. ఇంధనాన్ని ఆదా చేసే ఉపకరణాలను సరఫరా చేస్తారు. ప్రతి ఇంటికి నాలుగు బల్బులు, రెండు బాటెన్ ట్యూబ్ లైట్లు, రెండు 5-స్టార్ ఫ్యాన్‌లు అందిస్తారు. వీటి వినియోగం ద్వారా లబ్ధిదారుల ఇళ్లల్లో విద్యుత్ ఆదా చేయవచ్చని ప్రభుత్వం భావిస్తోంది. ఈ పరికరాల సేకరణ, పంపిణీని ఈఈఎస్ఎల్ అధికారుల పర్యవేక్షణలో జరుగుతుంది, దేశవ్యాపంగా ఇంధన ఆదా కోసం తీసుకుంటున్న చర్యల్లో భాగంగానే ఏపీతో కేంద్రం ఈ ఒప్పందం కుదుర్చుకుంది.

మరోవైపు ఏడాది మొత్తం అధిక ఉష్ణోగ్రతల కారణంగా వేడి, ఉక్కపోత ఉండే ఆంధ్రప్రదేశ్ లాంటి రాష్ట్రాల్లో.. ఈ బీఎల్‌డీసీ ఫ్యాన్లు కూలింగ్ కలిగిస్తాయని, అలాగే గది ఉష్ణోగ్రతలను కూడా తగ్గిస్తాయని ఏపీ విద్యుత్ శాఖ మంత్రి గొట్టిపాటి రవికుమార్ తెలిపారు. అలాగే కరెంట్ ఆదా కూడా చేస్తాయన్నారు. ఎల్‌ఈడీ బల్బులు, బ్యాటెన్ ట్యూబ్ లైట్లు ఎక్కువ లైటింగ్ అందజేస్తాయని, అలాగే ఎక్కువ కాలం మన్నిక వస్తాయని మంత్రి వెల్లడించారు. సాధారణంగా ఉపయోగించే బల్బుల కంటే ఎక్కువ కాంతిని అందిస్తూ.. తక్కువ విద్యుత్ వాడుకుంటాయని వివరించారు. ఫలితంగా కరెంట్ బిల్లులు కూడా తక్కువగా వస్తాయన్నారు. ఈ విధానాల ద్వారా ఇంధన ఆదాలో దేశంలో రాష్ట్రాన్ని అగ్రగామిగా నిలిపేందుకు ప్రయత్నిస్తున్నట్లు తెలిపారు.