షేర్ల బదిలీతో దానికేం సంబంధం.. సంతకం చేసినప్పుడు జగన్‌కు తెలియదా

ఆస్తుల వివాదం నేపథ్యంలో వైసీపీ అధినేత వైఎస్ జగన్ మోహన్ రెడ్డి, ఆయన సోదరి ఏపీ కాంగ్రెస్ అధ్యక్షురాలు వైఎస్ షర్మిల మధ్య విమర్శలు, ప్రతి విమర్శలు కొనసాగుతున్నాయి. వైఎస్ జగన్ బెయిల్ రద్దు చేయించాలనే ఉద్దేశంతోనే వైఎస్ షర్మిల, టీడీపీతో కలిసి కుట్రలు చేస్తున్నారని వైసీపీ నేతలు ఆరోపిస్తున్న సంగతి తెలిసిందే. ఈ నేపథ్యంలో ఆ విమర్శలకు వైఎస్ షర్మిల స్ట్రాంగ్ కౌంటర్ ఇచ్చారు. వైఎస్ జగన్ బెయిల్ రద్దు కుట్రగా పేర్కొనడానికి ఈ శతాబ్దపు అతిపెద్ద జోక్ అంటూ షర్మిల సెటైర్లు వేశారు. కేసుల విచారణలో భాగంగా ఎన్‌ఫోర్స్‌మెంట్ డైరెక్టరేట్ ఎటాచ్ చేసింది 32 కోట్ల విలువైన కంపెనీ స్థిరాస్థులని షర్మిల చెప్పారు. ఈడీ షేర్లను అటాచ్ చేయలేదని.. షేర్ల బదలాయింపు మీద ఎలాంటి ఆంక్షలు లేవని స్పష్టం చేశారు.

స్టేటస్‌ కో షేర్ల మీద లేదన్న వైఎస్ షర్మిల.. ఇతర కంపెనీల విషయాలను కూడా ఈ సందర్భంగా గుర్తు చేశారు. గతంలోనూ ఎన్నో కంపెనీల ఆస్తులను ఈడీ అధికారులు ఎటాచ్ చేశారన్న షర్మిల.. ఏ కంపెనీ కూడా స్టాక్ మార్కెట్లో ట్రేడింగ్. బదిలీలు చేయకుండా ఆపలేదన్నారు. అలాగే తనకు వందశాతం వాటా ఇస్తానంటూ అవగాహన ఒప్పందం మీద వైఎస్ జగన్ సంతకం చేశారన్న షర్మిల.. బెయిల్ రద్దవుతుందని సంతకం చేసినప్పుడు జగన్‌కు తెలియదా అంటూ వైసీపీని ప్రశ్నించారు. క్లాసిక్ రియాలిటీ, సరస్వతి, సండూర్ పవర్ షేర్లను విజయమ్మకు ఎలా అమ్మారని ప్రశ్నించిన షర్మిల.. అప్పుడు బెయిల్ రద్దు అవుతుందని తెలియదా అని అన్నారు. వైఎస్ జగన్ బెయిల్ రద్దుకు వచ్చిన ఇబ్బందేమీ లేదని మా అమ్మకు కూడా తెలుసన్న షర్మిల.. షేర్ల బదిలీకి, బెయిల్‌కు సంబంధం లేదని తెలిసీ రాజకీయాలు చేస్తున్నారంటూ మండిపడ్డారు.

విజయమ్మ బహిరంగ లేఖకు వైసీపీ కౌంటర్

మరోవైపు మంగళవారం వైఎస్ విజయమ్మ వైఎస్ఆర్ అభిమానులకు ఉద్దేశించి రాసిన బహిరంగ లేఖపై వైసీపీ స్పందించింది. వైఎస్ విజయమ్మకు పలు ప్రశ్నలు సంధించింది. విజయమ్మ రాసిన లేఖలో.. వైఎస్ జగన్ బెయిల్ రద్దుకు జరిగిన కుట్రను ప్రస్తావించకపోవటం ప్రజలను పక్కదోవ పట్టించడమేనని వైసీపీ విమర్శించింది. సరస్వతీ కంపెనీ విషయంలో ఈడీ అటాచ్‌మెంట్‌ ఉన్నప్పటికీ, తెలంగాణ హైకోర్టు స్టేటస్‌-కో ఆదేశాలు ఉన్నప్పటికీ, యాజమాన్య బదిలీ జరిగేలా క్రయవిక్రయాలు చేయకూడదని తెలిసినప్పటికీ తప్పు అని తెలిసినా మోసపూరితంగా, కుట్రపూరితంగా షేర్లు బదిలీచేసిన మాట వాస్తవం కాదా అని ప్రశ్నించింది. షర్మిల భావోద్వేగాలకు, ఒత్తిళ్లకు గురై, వైఎస్ జగన్‌కు చిక్కులు తెచ్చే ఈ పనికి సంతకం పెట్టడం నిజం కాదా అంటూ ప్రశ్నించింది.