విజయవాడలో డ్యాన్సర్ అనుమానాస్పద మృతి.. ఆ రాత్రి ఏం జరిగింది, గదిలో ముగ్గురు

విజయవాడలో ఈవెంట్‌ డ్యాన్సర్‌ అనుమానాస్పదస్థితిలో మృతి చెందిన ఘటన కలకలం రేపింది. ప్రాథమికంగా అందిన సమాచారం మేరకు.. కాకినాడ రూరల్‌ మండలం తూరంగికి చెందిన బంటుపల్లి వెంకటలక్ష్మి ఈవెంట్స్‌లో డ్యాన్స్ చేస్తుంటారు. ఆమె కొద్దిరోజుల క్రితం హైదరాబాద్‌లో జరిగిన ఈవెంట్‌కి వెళ్లి.. అక్కడి నుంచి సోమవారం విజయవాడ ఆంధ్రప్రభ కాలనీలో ఉంటున్న మరో ఈవెంట్స్‌ డ్యాన్సర్‌, స్నేహితురాలు కసీం జ్యోతి ఇంటికి వచ్చింది.. జ్యోతి ఒక్కరే అక్కడ ఉంటున్నారు. వీరిద్దరికి ఈవెంట్స్‌లో పరిచయం ఏర్పడగా.. స్నేహంగా ఉంటున్నారు.

సోమవారం హైదరాబాద్‌కు చెందిన ఈవెంట్స్‌ నిర్వహించే శ్రావణ్‌ అనే వ్యక్తి.. విజయవాడలోని జ్యోతి ఇంటికి వచ్చాడు. ఈ ముగ్గురు కలిసి రాత్రి మద్యం తాగినట్లు తెలుస్తోంది.. రాత్రంతా శ్రావణ్‌, వెంకటలక్ష్మి, జ్యోతి ఒకే గదిలో ఉన్నారు. అయితే ఆ మరుసటి రోజు(మంగళవారం) ఉదయం శ్రావణ్‌ ఇంటి నుంచి వెళ్లి పోయాడు. ఆ తర్వాత వెంకటలక్ష్మి ఉరి వేసుకున్నట్లు గమనించిన జ్యోతి.. ఓ ప్రైవేటు ఆస్పత్రికి తరలించింది. అప్పటికే ఆమె చనిపోయినట్లు డాక్టర్లు గుర్తించారు. జ్యోతి వెంటనే పోలీసులకు సమాచారం ఇవ్వగా.. వారు ఘటనా స్థలానికి చేరుకున్నారు. జ్యోతి ఉండే ఇంటి దగ్గర సీసీ ఫుటేజ్ పరిశీలించారు. మంగళవారం ఉదయం శ్రావణ్‌ ఇంటి నుంచి వెళ్లిపోయేడు వెంకటలక్ష్మి ఇంటి తలుపులు తీసి.. అతడు వెళ్లిపోగానే తలుపులు వేసుకుంది. ఇదంతా సీసీ కెమెరాల ఫుటేజీలో కనిపించాయి.

వెంకటలక్ష్మి మృతదేహాన్ని విజయవాడ ప్రభుత్వా స్పత్రిలో మార్చురికి తరలించారు. ఆత్మహత్య విషయాన్ని వెంకటలక్ష్మి కుటుంబ సభ్యులకు సమాచారం అందించి.. వారు వచ్చిన తర్వాత పోస్టుమార్టం నిర్వహిస్తారు. అనుమానాస్పద మరణంగా కేసు నమోదు చేసిన అజిత్‌సింగ్‌ నగర్‌ పోలీసులు.. హైదరాబాద్‌కు వెళుతున్న శ్రావణ్‌ను సూర్యాపేటకు సమీపంలో అదుపులోకి తీసుకున్నారు. ఇటు వెంకటలక్ష్మి స్నేహితురాలు జ్యోతిని అదుపులోకి తీసుకుని ప్రశ్నిస్తున్నారు. సోమవారం రాత్రి ఇంట్లో ముగ్గురు కలిసి మద్యం తాగామని జ్యోతి చెప్పినట్లు తెలుస్తోంది. తాను నిద్రపోతున్న సమయంలో వెంకటలక్ష్మి ఉరి వేసుకున్నట్లు పోలీసులకు చెప్పినట్లుసమాచారం.

పోలీసులు శ్రావణ్‌, జ్యోతిని పోలీసులు వేర్వేరుగా ప్రశ్నిస్తున్నారు. ఒకరికొకరు సంబంధం లేకుండా పోలీసులకు సమాధానాలు చెబుతున్నట్లు తెలుస్తోంది. ఈ కేసు మొత్తం మిస్టరీగా మారగా.. ఈవెంట్స్‌ విషయంలో ఈ ముగ్గురి మధ్య ఏమైనా వివాదాలు ఉన్నాయా అనే కోణంలో ఆరా తీస్తున్నారు. అలాగే ప్రేమ వ్యవహారాలు ఏమైనా ఉన్నాయా అన్న కోణంలోనూ దర్యాప్తు చేస్తున్నారు. వెంకటలక్ష్మి మృతదేహానికి పోస్టుమార్టం పూర్తయితే అసలు విషయాలు బయటకు వస్తాయంటున్నారు పోలీసులు. విజయవాడలో డ్యాన్సర్ వెంకటలక్ష్మి మరణం అనుమానాస్పదంగా మారింది.. ఈ ఘటన స్థానికంగా కలకలం రేపింది.