రుషికొండ ప్యాలెస్‌ను ఏం చేద్దాం.. ప్రజాభిప్రాయ సేకరణతో నిర్ణయం!

ముఖ్యమంత్రి చంద్రబాబు నాయుడు ‘రుషికొండ’లో పర్యటించారు. విశాఖపట్నం శివార్లలోని రుషికొండలో గత వైఎస్సార్‌సీపీ ప్రభుత్వ హయాంలో నిర్మించిన భవనాలను ముఖ్యమంత్రి పరిశీలించారు. సుమారు రూ. 450 కోట్ల వ్యయంతో ఏడు బ్లాక్‌లుగా ఇక్కడ నిర్మాణాలు చేపట్టారు. రుషికొండ ప్యాలెస్‌ను ఇప్పటికే డిప్యూటీ సీఎం పవన్ కళ్యాణ్ పరిశీలించారు. అయితే, భారీగా ఖర్చు చేసి నిర్మించిన ఈ భవనాలను ఏవిధంగా ఉపయోగించాలనే అంశంపై అధికారులు మల్లగుల్లాలు పడుతున్నారు. ఈ నేపథ్యంలో సీఎం చంద్రబాబు నాయుడు రుషికొండకు వచ్చారు. ముఖ్యమంత్రితో పాటు పర్యాటక శాఖ మంత్రి కందుల దుర్గేశ్‌, భీమిలి ఎమ్మెల్యే గంటా శ్రీనివాసరావు ఉన్నారు.

రుషికొండలో భారీ హంగులతో భవనాలతో పాటు ఉద్యానవనాలను నిర్మించారు. వీటి నిర్వహణ, విద్యుత్‌ వినియోగం కోసం పెద్ద మొత్తంలో ఖర్చు అవుతోందని అధికారులు సీఎం చంద్రబాబు నాయుడికి వివరించారు. గత 4 నెలలుగా ఎంత ఖర్చయ్యిందో చంద్రబాబు నాయుడికి తెలిపారు. ప్రజాధనం దుర్వినియోగం అవుతోందని.. దీనిపై త్వరగా ఒక నిర్ణయానికి రావాలని ముఖ్యమంత్రి భావిస్తున్నారు.

నిర్వహణ పరంగా చూస్తే ఈ భవనాలు ఖర్చుతో కూడుకున్న వ్యవహారమని చంద్రబాబు నాయుడు ఒక అభిప్రాయానికి వచ్చినట్లు తెలుస్తోంది. వీటిని ఏవిధంగా ఉపయోగించాలి? అనే విషయాలపై అధికారులతో సీఎం చంద్రబాబు నాయుడు చర్చించారు. వాళ్లను అడిగి పూర్తి వివరాలను తెలుసుకున్నారు. భవిష్యత్తులో ఈ భవనాలను ఏవిధంగా ఉపయోగించాలనే అంశంపై ప్రజాభిప్రాయం తీసుకోవాలని సీఎం చంద్రబాబు నాయుడు భావిస్తున్నట్లు సమాచారం.

శనివారం (నవంబర్ 2) ఉదయం సీఎం చంద్రబాబు నాయుడు.. అనకాపల్లి నుంచి ఉమ్మడి విశాఖపట్నం జిల్లా పర్యటన ప్రారంభించారు. అనకాపల్లిలో రోడ్లపై గుంతలు పూడ్చే కార్యక్రమంలో పాల్గొన్నారు. సంక్రాంతి పండుగ లోపు రాష్ట్రంలోని రహదారులపై గుంతలన్నీ పూడ్చివేయాలని అధికారులను ఆదేశించారు. అనంతరం అనకాపల్లి నుంచి పరవాడ మీదుగా నేరుగా రుషికొండకు చేరుకున్నారు.

గత ముఖ్యమంత్రి వైఎస్ జగన్.. రాజధాని పేరుతో మూడు ముక్కలాట ఆడారని చంద్రబాబు నాయుడు విమర్శించారు. రోడ్లపై గుంతలు పూడ్చేందుకు జగన్‌కు మనసు రాలేదు గానీ.. 450 కోట్ల రూపాయలు పెట్టి రుషికొండలో మాత్రం ప్యాలెస్‌ కట్టుకున్నారని అన్నారు. ‘ఇలాంటి వారికి ఎలాంటి శిక్ష వేయాలో కూడా తెలియట్లేదు’ అని చంద్రబాబు నాయుడు అన్నారు.