ఏపీలో కొత్త రైలు మార్గం.. ఈ రూట్‌లోనే, తెలంగాణలో భూ సేకరణ.. ఎందుకంటే!

ఆంధ్రప్రదేశ్‌ రాజధాని అమరావతి రైల్వే నిర్మాణం కోసం వేగంగా అడుగులు పడుతున్నాయి. ఈ రైల్వే లైన్ కోసం కేంద్ర ప్రభుత్వం తెలంగాణ ఖమ్మం జిల్లాలో ఎర్రుపాలెం మండలంలోని రెండు గ్రామాల్లో భూసేకరణ కోసం నోటిఫికేషన్‌ జారీ చేసింది. అమరావతి ప్రాంతానికి రైల్వే సౌకర్యం కల్పించడానికి ఎర్రుపాలెం-నంబూరుల మధ్య రూ.2,245 కోట్లతో 56.63 కిలోమీటర్ల నూతన రైల్వే మార్గం నిర్మించడానికి సిద్ధమైంది కేంద్రం. ఈ నెల 24న కేబినెట్ సమావేశంలో ఆమోదముద్ర వేసిన ప్రభుత్వం వారం రోజుల్లోనే భూసేకరణ నోటిఫికేషన్‌ జారీ చేసింది.

ఈ మేరకు ఖమ్మం జిల్లా ఎర్రుపాలెం మండలంలోని ఎర్రుపాలెం, కేశిరెడ్డిపల్లి గ్రామాల్లో 24.01 ఎకరాల భూమిని సేకరించాలని రైల్వేశాఖ నిర్ణయించింది. ఈ మేరకు అభ్యంతరాలు, సలహాలు, సూచనలు ఇవ్వాలనుకునేవారు 30 రోజుల్లోపు ఖమ్మం స్పెషల్‌ డిప్యూటీ కలెక్టర్‌ (ల్యాండ్‌ ఎక్విజిషన్‌)కు లిఖితపూర్వకంగా సమర్పించాలని ఆదేశించారు.ఈ మేరకు డిప్యూటీ కలెక్టర్‌ విచారణ జరిపి నిర్ణయం తీసుకుంటారని.. అనంతరం జారీ చేసేవే తుది ఉత్తర్వులని రైల్వేశాఖ తెలిపింది.

అమరావతి రైల్వే ప్రాజెక్టుకు ఇటీవల కేంద్ర కేబినెట్‌ ఆమోదం తెలిపింది. రూ.2వేల245కోట్లతో 57 కి.మీ అమరావతి రాజధానికి కొత్త రైల్వే లైన్‌ ఏర్పాటు కానుంది. ఈ కొత్త రైల్వే లైన్ అమరావతి నుంచి హైదరాబాద్‌, చెన్నై, కోల్‌కతాకు నేరుగా అనుసంధానం చేస్తూ నిర్మాణం జరగనుంది. ఎర్రుపాలెం తర్వాత ఆంధ్రప్రదేశ్‌లోని ఎన్టీఆర్ జిల్లా పెద్దాపురం, చెన్నారావుపాలెం, గొట్టుముక్కల, పరిటాల, కొత్తపేట, వడ్డమాను, అమరావతి, తాడికొండ, కొప్పురావూరులో నూతన స్టేషన్లు అందుబాటులోకి రానున్నాయి. ఈ రైల్వే లైన్ ఎర్రుపాలెం నుంచి అమరావతి మీదుగా నంబూరు వరకు 37 కిలోమీటర్ల దూరం ఉంటుంది. పెదకూరపాడు, సత్తెనపల్లి మార్గాలు కూడా కలిపితే 57 కిలోమీటర్లు ఉంటుంది.

ఎర్రుపాలెం- అమరావతి- నంబూరు నిర్మాణానికి 56.53 కిలోమీటర్లు (దాదాపుగ 57) రైల్వేట్రాక్‌ నిర్మాణానికి ఖమ్మం, కృష్ణా, గుంటూరు, పల్నాడు జిల్లాల్లో 450 హెక్టార్ల భూమి సేకరించాల్సి ఉంటుంది. తెలంగాణలో ఎర్రుపాలెంలోని రైల్వేస్టేషన్‌ సమీపం నుంచి ఏపీలోని ఎన్‌టీఆర్‌ జిల్లా పెద్దాపురం వరకు భూసేకరణ చేస్తారు. ఈ మేరకు ఖమ్మం జిల్లాలో ప్రత్యేక డిప్యూటీ కలెక్టర్‌ను నియమించారు. ఈ రైల్వే లైన్‌లో కొత్తపల్లి-వడ్డమాను గ్రామాల మధ్య 3.2 కి.మీ. మేర వంతెన కూడా నిర్మించబోతున్నారు.

ప్రస్తుతానికైతే సింగిల్‌ లైన్‌ నిర్మాణ పనులు మొదలుపెడతారు.. ఆ తర్వాత అవసరాలకు అనుగుణంగా డబ్లింగ్‌, ట్రిప్లింగ్‌గా విస్తరించే అవకాశం ఉంది అంటున్నారు. అమరావతి రైల్వేలైన్‌ దేశ రాజధాని ఢిల్లీ, ఆర్థిక రాజధాని ముంబైతో పాటుగా మరికొన్ని రాష్ట్రాలకు అనుసంధానించేలా అలైన్‌మెంట్‌ను ప్లాన్ చేస్తున్నారు. అమరావతి నుంచి హైదరాబాద్‌, చెన్నై, కోల్‌కతా నగరాలకు కనెక్టివిటీ పెరుగుతుంది. అమరావతి రైల్వేలైన్‌ మచిలీపట్నం పోర్టుకు అనుసంధానం చేసేలా అలైన్‌మెంట్‌ను చేస్తున్నారు.