కార్తీక మాసం ప్రారంభం.. నంద్యాల జిల్లా ఆళ్లగడ్డలో అద్భుతం.. అంతా ఆ శివుడి లీల

కార్తీక మాసం ప్రారంభంతో తెలుగు రాష్ట్రాల్లో గుళ్లూ, గోపురాలు కిటకిటలాడుతున్నాయి. ముఖ్యంగా శైవక్షేత్రాలకు భక్తులు పోటెత్తుతున్నారు. తెల్లవారుజామునుంచే ఆలయాల్లో అభిషేకాలు, పూజలు మొదలవుతున్నాయి. మహిళల దీపారాధనతో, ఆధ్యాత్మిక శోభతో ఆలయాలు అలరారుతున్నాయి. అయితే కార్తీక మాసం సందర్భంగా నంద్యాల జిల్లాలో అద్భుత దృశ్యం ఆవిష్కృతమైంది. నంద్యాల జిల్లా ఆళ్ళగడ్డ శిరివెళ్ల కేంద్రంలో శ్రీ ఓంకారేశ్వర దేవాలయం ఉంది. అయితే ఆదివారం నాడు ఓంకారేశ్వరస్వామి ఆలయ గర్భగుడిలోని శివుడి విగ్రహాన్ని సూర్య కిరణాలు తాకాయి. ఉదయం 6:30 గంటల నుంచి 20 నిమిషాల పాటు శివయ్యపై సూర్యకిరణాలు ప్రసరించాయి. ఈ అద్భుత దృశ్యాన్ని తిలకించేందుకు భక్తులు పెద్ద సంఖ్యలో తరలివచ్చారు. ఇదంతా శివయ్య మహిమేనని భక్తులు చర్చించుకుంటున్నారు.

శ్రీశైలంలో శివ చతుసప్తహ భజనలు

మరోవైపు కార్తీక మాసాన్ని పురస్కరించుకుని శ్రీశైలంలో కార్తీక మాస శివ చతుసప్తాహ భజనలు ప్రారంభమయ్యాయి. శ్రీశైలం ఇంఛార్జి ఈవో చంద్రశేఖర్ రెడ్డి ఈ భజనలను ప్రారంభించారు. లోక కళ్యాణం కోసం ప్రతి సంవత్సరం శ్రావణ, కార్తీక మాసంలో శ్రీశైలం దేవస్థానం ఈ భజనలను నిర్వహిస్తూ వస్తోంది. ఈ క్రమంలోనే ఈ ఏడాదికూడా శివ చతుసప్తహ భజనలు ప్రారంభమయ్యాయి. ఇందులో భాగంగా అర్చకులు సంకల్పాన్ని పఠించి తొలుత గణపతి పూజ జరిపించారు. అనంతరం చండీశ్వర స్వామికి విశేష పూజలు నిర్వహించారు. ఆ తర్వాత శివ ప్రణవ పంచాక్షరి నామ భజనలను ప్రారంభమయ్యాయి.

శ్రీశైల దేవస్థానానికి పచ్చళ్ల విరాళం

మరోవైపు శ్రీశైలం దేవస్థానానికి విరాళం రూపంలో భారీగా పచ్చళ్లు అందాయి. అన్న ప్రసాద వితరణకు 2000 కేజీల పచ్చళ్లు విరాళం రూపంలో అందాయి. ఇబ్రహీంపట్నానికి చెందిన ఎస్ సత్యనారాయణ, బెంగుళూరుకు చెందిన సుదర్శన్ చైతన్య అనే ఇద్దరు వ్యక్తులు పచ్చళ్లను విరాళంగా అందించారు. ఈ మేరకు శ్రీశైలం దేవస్థానం ఇంఛార్జి ఈవో చంద్రశేఖర్ రెడ్డికి అందజేశారు. మొత్తం మూడు లక్షల విలువ చేసే.. ఆవకాయ, నిమ్మకాయ పచ్చళ్ళను అందించారు. ఈ పచ్చళ్లను భక్తులకు వడ్డించాలని దాతలు కోరారు.