హోంశాఖపై పవన్ సంచలన వ్యాఖ్యలు.. టీడీపీ నుంచి ఫస్ట్ రియాక్షన్ ఇదే

ఏపీలో చిన్నారులు, మహిళలపై అత్యాచారాలు, దాడులపై స్పందిస్తూ.. శాంతిభద్రతలపైనా, హోంశాఖపైనా ఏపీ డిప్యూటీ సీఎం పవన్ కళ్యాణ్ సంచలన వ్యాఖ్యలు చేసిన సంగతి తెలిసిందే. వీటిపై హోంమంత్రి వంగలపూడి అనిత బాధ్యత తీసుకోవాలన్న పవన్ కళ్యాణ్.. తాను హోంమంత్రి అయితే పరిస్థితి వేరేగా ఉంటుందని అన్నారు. సోషల్ మీడియాలో ఇష్టానుసారం మాట్లాడేవారిని భావ ప్రకటనా స్వేచ్ఛ పేరుతో వదిలేస్తే ఎలా అంటూ ప్రశ్నించారు. నేరస్థులకు కులం, మతం అంటూ ఉండదని.. లైంగిక దాడులకు పాల్పడేవారిని కఠినంగా శిక్షించాలని సూచించారు. పట్టించుకోకుండా ఉంటే నేరస్థులు మరింత రెచ్చిపోతారని అన్నారు. అయితే పిఠాపురం పర్యటనలో పవన్ కళ్యాణ్ చేసిన ఈ వ్యాఖ్యలు పొలిటికల్ సర్కిళ్లలో హాట్‌టాపిక్‌గా మారాయి. అటు వైసీపీ సైతం దీనిపై విమర్శలు మొదలెట్టింది.

ఈ నేపథ్యంలో డిప్యూటీ సీఎం పవన్ కళ్యాణ్ వ్యాఖ్యలపై మున్సిపల్ శాఖ మంత్రి మంత్రి పొంగూరు నారాయణ స్పందించారు. పవన్ కళ్యాణ్‌ వ్యాఖ్యలకు మద్దతుగా మాట్లాడారు నారాయణ. మంత్రిత్వశాఖలలో ఏ శాఖ పనితీరు అయినా సరిగా లేకుండా ఉంటే ముఖ్యమంత్రి, డిప్యూటీ సీఎం అలర్ట్ చేస్తారని నారాయణ చెప్పారు. పవన్ కళ్యాణ్ వ్యాఖ్యలు కూడా అలాంటివేనని అభిప్రాయపడ్డారు. ఘటనల నేపథ్యంలో సీరియస్‌గా తీసుకుని పనిచేయాలని పవన్ కళ్యాణ్ సూచించారని నారాయణ అన్నారు. డిప్యూటీ సీఎంగా అక్కడ జరిగిన పరిణామాల ఆధారంగా ఆయన స్పందించారన్న నారాయణ.. పవన్ వ్యాఖ్యల మీద హోంమంత్రి స్పందించి చర్యలు తీసుకోవాలన్నారు.

ఇక పవన్ కళ్యాణ్ కూడా తాను హోంమంత్రి అయ్యుంటే అని అన్నారే కానీ.. ఆ శాఖ తీసుకుంటానని చెప్పలేదన్నారు మంత్రి నారాయణ. సీఎం అయినా, డిప్యూటీ సీఎం అయినా వేరే శాఖలు సరిగా పనిచేయకుంటే అలర్ట్ చేస్తారని.. ఇదీ అంతేనని చెప్పుకొచ్చారు. చట్టపరంగా పోలీసులకు కొన్ని ఇబ్బందులు ఉంటాయన్న నారాయణ.. పవన్ కళ్యాణ్ సూచనల ఆధారంగా ముందుకెళ్లాలన్నారు. ఇక ఎన్డీఏ కూటమిలో ఏమైనా ఉంటే సర్దుకుని పోతామని.. సీఎం చంద్రబాబు నాయుడు అన్నింటిని సమన్వయం చేస్తారని నారాయణ అభిప్రాయపడ్డారు.

అయితే వేరే శాఖల పనితీరు సరిగా లేకుండా.. కేబినెట్ సమావేశాలు, లేదా అంతర్గత సమావేశాల్లో చర్చించాలి కానీ.. ఇలా బహిరంగ ప్రకటనలు చేస్తారా అని రాజకీయ విశ్లేషకులు అభిప్రాయపడుతున్నారు. అలాగే శాఖ పనితీరు బాగా లేకుండా సీఎం చంద్రబాబుతో మాట్లాడాలి కానీ.. ఇలా నేరుగా బహిరంగ వ్యాఖ్యలు చేస్తారా అని అంటున్నారు. మరి పవన్ కళ్యాణ్ వ్యూహాత్మకంగా ఈ వ్యాఖ్యలు చేశారా లేదా ఆవేదనతో మాట్లాడారా అనేది రానున్న రోజుల్లో తెలుస్తుంది.