పిఠాపురం పాదగయలో అపచారం..! ద్రవ్యాలకు బదులుగా హోమగుండంలోకి..

పిఠాపురంలోని పాదగయ క్షేత్రం.. దక్షిణ కాశీగా పేరొందిన ప్రముఖ పుణ్యక్షేత్రం. అయితే అధికారుల నిర్లక్ష్యం కారణంగా ఇటీవలి కాలంలో తరుచుగా వార్తల్లో నిలుస్తోంది. తాజాగా జరిగిన ఓ ఘటనతో అధికారుల తీరుపై భక్తులు మండిపడుతున్నారు. పాదగయ క్షేత్రంలో హోమం జరుగుతున్న సమయంలో హోమగుండంలోకి రసీదు పుస్తకాలను వేశారనే వార్తలు వస్తున్నాయి. దీనిపై సోషల్ మీడియాలో కొన్ని వీడియోలు వైరల్ అవుతున్నాయి. ఈ నేపథ్యంలో వైరల్ వీడియోలపై భక్తులు మండిపడుతున్నారు. పవిత్రమైన హోమగుండంలోకి రసీదు పుస్తకాలు వేస్తారా అంటూ భక్తులు ఆగ్రహం వ్యక్తం చేస్తున్నారు. హోమద్రవ్యాలు వేసే పవిత్రమైన హోమగుండంలో ఇలా చేయడం అపచారమంటూ మండిపడుతున్నారు. నిర్లక్ష్యంగా వ్యవహరించిన ఆలయ సిబ్బందిపై చర్యలు తీసుకోవాలని డిమాండ్ చేస్తున్నారు.

మరోవైపు ఆలయంలో సౌకర్యాలపైనా కూడా భక్తుల నుంచి ఆగ్రహం వ్యక్తం అవుతోంది. కార్తీక మాసం నేపథ్యంలో ఆలయానికి పెద్దసంఖ్యలో భక్తులు వస్తున్నారు. అయితే కనీస సౌకర్యాలను కల్పించడంలో అధికారులు చర్యలు తీసుకోవడం లేదని భక్తుల ఆరోపణ. పుష్కరిణిలో స్నానం చేసిన తర్వాత దుస్తులు మార్చుకునేందుకు కూడా ఎలాంటి సౌకర్యాలు కల్పించలేదని.. పవిత్ర కార్తీకమాసంలో భక్తులు పుణ్యస్నానాలు చేస్తుంటారని.. అలాంటి వారందరూ ఇబ్బందులు పడుతున్నారని భక్తులు ఆరోపిస్తున్నారు. ఇప్పటికైనా చర్యలు తీసుకుని కనీస సదుపాయాలు కల్పించాలని కోరుతున్నారు.

మరోవైపు పాదగయ తీర్ధం వద్ద గయాసురుని పాదాలున్నాయి. దీంతో పాదగయ కోనేటిలో స్నానాలు ఆచరించి.. పెద్దలకు శ్రాద్ధకర్మలు నిర్వహిస్తే.. పుణ్యలోకం ప్రాపిస్తుందని నమ్మకం. దీంతో భక్తులు భారీగా వస్తుంటారు. అయితే పాదగయ క్షేత్రంలో కనీస సౌకర్యాలు కరవు అయ్యాయంటూ ఇటీవల సోషల్ మీడియాలో నెటిజనం పోస్టులు పెడుతున్నారు. పవన్ కళ్యాణ్ స్పందించి దీనిపై చర్యలు తీసుకోవాలని కోరుతున్నారు. ఆలయం చుట్టూ చెత్త పేరుకుపోయిందని.. పారిశుద్ధ నిర్వహణను పట్టించుకునేవారు లేరంటూ సోషల్ మీడియాలో పోస్టులు పెడుతున్నారు. పవన్ కళ్యాణ్ ఈ విషయాలపై దృష్టిసారించి పాదగయ క్షేత్రం అభివృద్ధికి చర్యలు తీసుకోవాలని కోరుతున్నారు. అయితే ఇప్పుడు ఈ రసీదుల వ్యవహారం తెరపైకి రావటంతో పవన్ కళ్యాణ్ తన నియోజకవర్గంలో జరుగుతున్న పరిణామాలపై ఎలా స్పందిస్తారో చూడాలి.