అంబులెన్స్‌కు దారి ఇవ్వని ఆకతాయి.. లైసెన్స్ రద్దు, రూ.2.5 లక్షల ఫైన్

రోడ్డుపై అంబులెన్స్‌కు దారి ఇవ్వకుండా ఓ వ్యక్తి చేసిన పనికి సంబంధించిన వీడియో ప్రస్తుతం సోషల్ మీడియాలో తెగ వైరల్ అవుతోంది. అంబులెన్స్ డ్రైవర్ సైరన్‌తోపాటు హారన్ కూడా కొడుతున్నా.. ముందు వెళ్తున్న కారు డ్రైవర్ మాత్రం అంబులెన్స్‌కు దారి ఇవ్వకుండా వేగంగా వెళ్లాడు. ఎంత దూరం వరకు వెళ్లినా అతడు అలాగే వెళ్లాడు. చివరికి ఆ కారు డ్రైవర్‌కు అధికారులు షాక్ ఇచ్చారు. అతడి లైసెన్స్ రద్దు చేయడమే కాకుండా రూ.2.5 లక్షల జరిమానా విధించారు. ఇంతకీ ఈ ఘటన ఎక్కడ జరిగిందంటే?

అంబులెన్స్‌కు దారివ్వని కారు.. గట్టి గుణపాఠమే చెప్పిన పోలీసులు, మళ్లీ స్టీరింగ్ ముట్టడు..!

ఆపద సమయంలో ప్రాణాలు కాపాడే అంబులెన్స్‌కు దారి ఇవ్వడం కనీస బాధ్యత. మనం రోడ్డుపై వెళ్లేటపుడు అంబులెన్స్ వచ్చిందంటే చాలు.. ఎంత ట్రాఫిక్ ఉన్నా దానికి దారి ఇవ్వాలి. ఆలస్యం చేస్తే అంబులెన్స్‌లో తరలించే రోగి ప్రాణాలకే ప్రమాదం కాబట్టి.. అధికారులు, నిబంధనలు కూడా.. ఎలాంటి వారైనా అంబులెన్స్‌కు దారి ఇవ్వాలని చెబుతాయి. అయితే తాజాగా ఓ వ్యక్తి మాత్రం వెనక అంబులెన్స్ సైరన్, హారన్ వస్తున్నా పట్టించుకోకుండా, దానికి దారి ఇవ్వకుండా నిర్లక్ష్యంగా డ్రైవింగ్ చేసిన ఘటన ప్రస్తుతం తీవ్ర చర్చనీయాంశంగా మారింది. దీంతో అతడికి పెద్ద షాక్ తగిలింది. లైసెన్స్ రద్దుతోపాటు రూ.2.5 లక్షల ఫైన్ పడింది. కేరళలో జరిగిన ఈ ఘటనకు సంబంధించిన వీడియో సోషల్ మీడియాలో తెగ చక్కర్లు కొడుతోంది.

కేరళలోని త్రిస్సూర్ జిల్లాలో జరిగిన ఈ ఘటన ప్రస్తుతం సంచలనంగా మారింది. నవంబర్ 7వ తేదీన జరిగిన ఈ ఘటన ఆలస్యంగా బయటికి వచ్చింది. చలకుడిలోని పొన్నాని నుంచి త్రిస్సూర్ మెడికల్ కాలేజీకి.. ప్రాణాపాయ స్థితిలో ఉన్న ఓ వ్యక్తిని అంబులెన్స్‌లో తరలిస్తున్నారు. ఈ క్రమంలోనే త్రిస్సూర్‌ పట్టణంలోకి వచ్చిన తర్వాత.. ఓ వ్యక్తి కారులో వెళ్తూ.. వెనకాల వస్తున్న అంబులెన్స్‌కు దారి ఇవ్వలేదు. అయితే అంబులెన్స్ డ్రైవర్.. సైరన్‌తోపాటు హారన్ కూడా వేశాడు. అయితే ఆ వ్యక్తి మాత్రం అదేమీ పట్టించుకోకుండా తన కారులో.. అంబులెన్స్‌కు దారి మాత్రం ఇవ్వలేదు.

ఆ కారు డ్రైవర్ చేసిన పనికి విసిగిపోయిన అంబులెన్స్ డ్రైవర్.. తన ఫోన్ తీసి వీడియో తీయడం ప్రారంభించాడు. ఎంత ప్రయత్నించినా ఆ కారు డ్రైవర్ అంబులెన్స్‌కు దారి ఇవ్వకపోగా అలాగే రోడ్డుపై వెళ్లాడు. చివరికి కొన్ని కిలోమీటర్ల దూరం వెళ్లిన తర్వాత ఎట్టకేలకు అంబులెన్స్ డ్రైవర్.. కారును ఓవర్‌టేక్ చేసి ముందుకు వెళ్లాడు. ఇక అంబులెన్స్ డ్రైవర్ ఆ వీడియోను సోషల్‌ మీడియాలో పోస్ట్ చేయడంతో తెగ వైరల్‌ అయింది. ఇది కాస్తా కేరళ పోలీసుల దృష్టికి వెళ్లడంతో వారు రంగంలోకి దిగారు. ఆ వీడియోలో ఉన్న కారును నంబరు ఆధారంగా అతడిని గుర్తించారు.

నేరుగా ఆ కారు డ్రైవర్ వ్యక్తి ఇంటికి వెళ్లిన పోలీసులు.. అంబులెన్స్‌కు దారి ఎందుకు ఇవ్వలేదని ప్రశ్నించారు. దానికి షాక్ అయిన ఆ వ్యక్తి.. సరైన సమాధానాలు ఇవ్వలేదు. దీంతో తీవ్ర ఆగ్రహం వ్యక్తం చేసిన పోలీసులు.. అంబులెన్స్‌కు దారి ఇవ్వకుండా నిర్లక్ష్యంగా వ్యవహరించిందుకు అతడికి పెద్ద షాకే ఇచ్చారు. ఇలా చేసినందుకు గానూ.. రూ.2.5 లక్షల భారీ జరిమానాను అతడికి విధించారు. అంతేకాకుండా అతడి డ్రైవింగ్ లైసెన్స్‌ను కూడా రద్దు చేశారు. ఇది తెలిసిన నెటిజన్లు.. ఆ కారు డ్రైవర్ తిక్క కుదిరింది అంటూ కామెంట్లు పెడుతున్నారు.