ఢిల్లీలో దారుణ పరిస్థితి.. ప్రభుత్వ ఉద్యోగులకు వర్క్ ఫ్రమ్ హోమ్

దేశ రాజధాని ఢిల్లీలో కాలుష్య తీవ్రత రోజు రోజకూ పెరుగుతోంది. దీంతో గాలి నాణ్యత దారుణంగా పడిపోయింది. వరుసగా ఏడో రోజూ వాయు నాణ్యతా సూచీ  400లకు పైగా నమోదయ్యింది. కాలుష్యం ప్రమాదకర స్థాయిని మించిపోవడంతో ఇప్పటికే కఠిన ఆంక్షలు అమలు చేస్తున్నారు. తాజాగా, ఢిల్లీ ప్రభుత్వం మరో కీలక నిర్ణయం తీసుకుంది. ప్రభుత్వ ఉద్యోగులు ఇంటినుంచే పని చేయాలని ఆదేశించింది. కాలుష్య తీవ్రత పెరుగుతున్న నేపథ్యంలో ఈ నిర్ణయం తీసుకున్నట్టు ఢిల్లీ పర్యావరణ శాఖ మంత్రి గోపాల్‌రాయ్‌  ప్రకటించారు.

‘‘దేశ రాజధాని ఢిల్లీ నగరంలో పెరుగుతున్న కాలుష్యాన్ని తగ్గించే చర్యలు చేపట్టాం.... ఇందులో భాగంగా 50 శాతం ప్రభుత్వ ఉద్యోగులు ఇంటి నుంచే పని చేయాలని ఆదేశించాం.... ఈ అంశంపై సచివాలయ అధికారులతో బుధవారం సమావేశం నిర్వహించనున్నాం’ అని మంత్రి గోపాల్‌రాయ్‌ ఎక్స్‌ (ట్విట్టర్),లో పోస్ట్‌ చేశారు. అలాగే, ఢిల్లీ మున్సిపల్ కార్పొరేషన్ పరిధిలోని ఆఫీసుల ఉదయం 8.30 నుంచి సాయంత్రం 5 గంటల వరకు, మిగతా ప్రభుత్వ కార్యాలయాలు ఉదయం 10 నుంచి సాయంత్రం 6.30 వరకు పనిచేస్తాయని ఆయన చెప్పారు.

ఇప్పటికే ఒకటి నుంచి తొమ్మిదో తరగతి వరకు పాఠశాలలను మూసివేయగా.. పది, 12 వ తరగతుల విద్యార్థులకు ఆన్‌లైన్‌ తరగతులు నిర్వహిస్తున్ారు. వాయుకాలుష్యం క్రమంగా పెరుగుతున్న నేపథ్యంలో అక్కడి ప్రజలు తీవ్ర ఇబ్బందులను ఎదుర్కొంటున్నారు. పీల్చేగాలి విషంగా మారడంతో ఆనారోగ్యానికి గురవుతున్నారు. బుధవారం ఉదయం గాలి నాణ్యత సూచీ సగటు 422గా నమోదైంది. చాలా ప్రాంతాల్లో ఇది 500 మార్క్‌ను దాటడంతో వాతావరణ శాఖ అధికారులు ఆందోళన చెందుతున్నారు.

పొగమంచుతో ఇప్పటికే పలు విమానాలు, రైళ్ల రాకపోకలకు అంతరాయం ఏర్పడింది. సుప్రీంకోర్టు విచారణకు లాయర్లు వర్చువల్‌ మోడ్‌లో పాల్గొని తమ వాదనలు వినిపించొచ్చని సీజేఐ జస్టిస్‌ సంజీవ్‌ ఖన్నా ఆదేశించారు. వాయు కాలుష్యం నియంత్రణకు కృత్రిమ వర్షం కురిపించేలా చర్యలు తీసుకోవాలని కేంద్రానికి మంత్రి గోపాల్‌రాయ్ విజ్ఞ‌ప్తి చేశారు. ఇక, గ్రేడెడ్ రెస్పాన్స్ యాక్షన్ ప్లాన్ (జీఆర్ఏపీ)-4 అమల్లోకి రావడంతో బీఎస్-4 ఇంజిన్, డీజీల్ సాయంతో నడిచే భారీ వాహనాల రాకపోకలను నిషేధించారు. కేవలం నిత్యావసరాలను తీసుకొచ్చే వాహనాలకు మాత్రమే అనుమతి ఉంది. బీఎస్-3 పెట్రోల్ వాహనాలపై కూడా బ్యాన్ విధించారు. శీతాకాలం ప్రారంభానికి ముందే ఢిల్లీలో గాలి నాణ్యత తగ్గిపోగా.. దీపావళి మర్నాడు నుంచి మరింత్ర తీవ్రరూపం దాల్చింది.