వర్చువల్ క్యూ, స్పాట్ బుకింగ్ టిక్కెట్లపై అయ్యప్ప భక్తులకు అదిరిపోయే వార్త

మండల పూజల కోసం గతవారం తెరుచుకున్న శబరిమల అయ్యప్పస్వామి ఆలయానికి భక్తులు పెద్ద సంఖ్యలో తరలివస్తున్నారు. రోజూ సగటున 65 వేల మంది భక్తులు స్వామిని దర్శించుకుంటున్నట్టు ట్రావెన్‌కోర్ దేవస్థానం బోర్డు తెలిపింది. ఐదు రోజుల్లో దాదాపు 3 లక్షల మందికి దర్శన అవకాశం కల్పించినట్టు పేర్కొంది. అయితే, ప్రస్తుతం వర్చువల్, స్పాట్ బుకింగ్ టిక్కెట్‌లతో కలిసి రోజుకు 80 వేల మందిని దర్శనాలకు అనుమతిస్తున్న విషయం తెలిసిందే. అయితే, ఈ సంఖ్యను మరింత పెంచాలని టీడీబీ భావిస్తోంది. వర్చువల్ క్యూ 80 వేలకు పెంచి.. ప్రస్తుతం 10 వేలుగా ఉన్న స్పాట్ బుకింగ్‌లను అలాగే కొనసాగించే ప్లాన్‌లో ఉంది.

పవిత్ర పదునెట్టాంబడి ( 18 మెట్లు) ద్వారా భక్తుల కదలికలను వేగవంతం చేయడం, దర్శన సమయం పొడిగింపు వంటి చర్యలు తీసుకోవడంతో యాత్రికులు సంతృప్తి వ్యక్తం చేస్తున్నారు. సాఫీగా, అవాంతరాలు లేకుండా దర్శనం చేసుకోగలుగుతున్నామని అంటున్నారు. అంచనా వేసిన కంటే భక్తులు రద్దీ తక్కువగా ఉండటంతో.. అవరణ పాయసం, అప్పామ్ సహా ప్రసాదాలు, ఇతర సామాగ్రి అమ్మకాలు కూడా ఆశించినంత మేర లేవు. దీంతో భక్తుల సంఖ్యను పెంచడంపై టీడీబీ దృష్టిసారించింది. ఏర్పాట్లకు తగ్గట్టు భక్తుల రద్దీ లేదని అధికారులు తెలిపారు.

మండల-మకరువిళక్కు పూజల సీజన్ ప్రారంభమైన తర్వాత ఒక్క రోజు మాత్రమే అత్యధికంగా 5,982 స్పాట్ బుకింగ్‌ దర్శన టిక్కెట్లు జారీచేశారు. పెద్ద సంఖ్యలో భక్తులకు దర్శనానికి అవకాశం కల్పించేందుకు బోర్డు కట్టుబడి ఉందని. ఈ క్రమంలో వర్చువల్ క్యూ స్లాట్‌ను పొందలేని వారికి కూడా స్పాట్ బుకింగ్ టిక్కెట్లు అందుబాటులో ఉంటాయని టీడీబీ సభ్యుడు ఏ అజికుమార్ తెలిపారు. ఎక్కువ మంది భక్తులకు వసతి కల్పించడం, వారియాత్ర ఎటువంటి ఆటంకం లేకుండానే జరిగేలా చర్యలు తీసుకున్నామని చెప్పారు.

మరోవైపు, అయ్యప్ప భక్తుల భద్రతపై కేరళ హైకోర్టు కీలక సూచనలు చేసింది. యాత్రికులతో వెళ్తన్న వాహనాలు ప్రమాదానికి గురైన ఘటనలను తీవ్రంగా పరిగణించింది. పోలీసులు, రవాణా విభాగం అధికారులు శబరిమల తీర్థయాత్రకు వెళ్లే వాహనాలు కచ్చితంగా నిబంధనలు పాటించేలా చూడాలని సూచించింది. ఇక, పదునెట్టాంబడి వద్ద విధులకు ఆసక్తి ఉన్న పోలీసులను ఎంపిక చేసి శిక్షణ ఇప్పించారు. వారిని 18 మెట్లకు ఇరువైపులా కూర్చోబెట్టి.. ఎక్కువ మంది భక్తులను మెట్ల మీదుగా అనుమతించేందుకు చర్యలు తీసుకున్నారు. అటు, దర్శనాల సమయం కూడా పొడిగించారు. రోజుకు దర్శనాల సమయం 18 గంటల ఉండేలా టీడీబీ ప్లాన్ చేసింది.