వారికి శ్రీవారి దర్శనం కల్పించొద్దు.. తిరుమలలో కిషన్ రెడ్డి కీలక వ్యాఖ్యలు

ఛైర్మన్ బీఆర్ నాయుడు నేతృత్వంలో టీటీడీ నూతన పాలకమండలి ఇటీవల సమావేశమైన సంగతి తెలిసిందే. టీటీడీ ధర్మకర్తల మండలి భేటీలో పలు కీలక నిర్ణయాలు కూడా తీసుకున్నారు. ఈ నిర్ణయాలపై ప్రజల నుంచే కాకుండా పార్టీల నుంచి కూడా సానుకూల స్పందన లభిస్తోంది. ఈ క్రమంలోనే టీటీడీ పాలకమండలి నిర్ణయాలను కేంద్ర మంత్రి కిషన్ రెడ్డి ప్రశంసించారు. బుధవారం ఉదయం వీఐపీ బ్రేక్ దర్శనం సమయంలో కిషన్ రెడ్డి శ్రీవారిని దర్శించుకున్నారు. అనంతరం టీటీడీ అదనపు ఈవో వెంకయ్య చౌదరి ఆయనకు తీర్థప్రసాదాలు అందజేశారు. ఆ తర్వాత మీడియాతో మాట్లాడిన కిషన్ రెడ్డి.. టీటీడీ తీసుకున్న నిర్ణయాలను కొనియాడారు. ముఖ్యంగా తిరుమలలో రాజకీయ వ్యాఖ్యలు నిషేధిస్తూ టీటీడీ తీసుకున్న నిర్ణయాన్ని కిషన్ రెడ్డి అభినందించారు.

తిరుమలలో రాజకీయాలు మాట్లాడేవారిపై కేసులు నమోదు చేయటంతో పాటుగా తిరుమల శ్రీవారి దర్శనం కూడా కల్పించకూడదని కిషన్ రెడ్డి టీటీడీకి సూచించారు. అలాగే టీటీడీలో పనిచేస్తున్న అన్యమతస్తులను ఇతర ప్రభుత్వశాఖలకు బదిలీ చేయటం లేదా వీఆర్ఎస్ ఇవ్వాలనే నిర్ణయాన్ని కూడా కిషన్ రెడ్డి స్వాగతించారు. ఈ నిర్ణయాన్ని స్వాగతించిన కిషన్ రెడ్డి.. తిరుపతి పట్టణవాసులకు నెలకొకసారి శ్రీవారి దర్శన భాగ్యం కల్పిస్తూ తీసుకున్న నిర్ణయంపై హర్షం వ్యక్తం చేశారు. ఇక టూరిజం శాఖకు దర్శనం టికెట్లలో జరిగిన అక్రమాలపై విచారణ జరుపుతామని కిషన్ రెడ్డి స్పష్టం చేశారు,

మరోవైపు టీటీడీ నిర్వహిస్తున్న ఎస్వీ అన్న ప్రసాదం ట్రస్టుకు భక్తుల నుంచి విరాళాలు అందుతూ ఉంటాయి. టీటీడీ ఈవో, ఇతర అధికారులను కలిసి భక్తులు విరాళాలు సమర్పిస్తూ ఉంటారు. అయితే విరాళాలు అందించేవారికి వీలుగా ఉండేలా టీటీడీ కీలక నిర్ణయం తీసుకుంది. ఎస్వీ అన్న ప్రసాదం ట్రస్టుకు విరాళం ఇచ్చేందుకు తిరుమలలోని తరిగొండ వెంగమాంబ అన్న ప్రసాద కేంద్రంలో కియోస్క్ మిషన్‌ను ఏర్పాటు చేశారు. ఈ మిషన్ల ద్వారా భక్తులు ఎస్వీ అన్న ప్రసాదం ట్రస్టుకు విరాళం అందిచవచ్చు. రూపాయి నుంచి రూ.99,999 వరకు తమకు తోచిన మొత్తాన్ని విరాళంగా అందించవచ్చు. ఇందుకోసం కియోస్క్ మిషన్‌లోని క్యూ ఆర్ కోడ్‌ను స్కాన్ చేసి యూపీఐ ద్వారా విరాళం ఇవ్వవచ్చని టీటీడీ అధికారులు తెలిపారు,