రూ.84కే సొంత ఇల్లు, అక్కడ బంపరాఫర్.. అసలు కారణం ఇదే!

ఇటీవల జరిగిన అమెరికా అధ్యక్ష ఎన్నికల్లో రిపబ్లికన్ పార్టీ గెలిచి.. తదుపరి అధ్యక్షుడిగా డొనాల్డ్ ట్రంప్ ఎన్నికయ్యారు. వచ్చే ఏడాది జనవరి 20వ తేదీన ట్రంప్.. అధ్యక్షుడిగా బాధ్యతలు చేపట్టనున్నారు. అయితే చాలా మంది మళ్లీ అమెరికా అధ్యక్షుడిగా డొనాల్డ్ ట్రంప్ పగ్గాలు చేపడుతుండటం పట్ల తీవ్ర ఆందోళన వ్యక్తం చేస్తున్నారు. ఇక మరికొందరు అయితే అమెరికా అధ్యక్ష పదవిలో డొనాల్డ్ ట్రంప్ కూర్చోగానే తాము అమెరికా వదిలి ఇతర దేశాలకు వెళ్లిపోతాం అంటూ పేర్కొంటున్నారు. ఈ నేపథ్యంలోనే ఇలా అమెరికా నుంచి వలస వెళ్లేవారే లక్ష్యంగా ఇటాలియన్ ద్వీపంలోని ఒక గ్రామం ఆకర్షిస్తోంది. తమ గ్రామానికి వస్తే ఒక డాలర్‌కే ఇల్లు ఇస్తామని బంపరాఫర్ ప్రకటించింది.

ఇటాలియన్ ద్వీపం అయిన సార్డినియాలోని ఒల్లైలై అనే గ్రామం ఉంది. అయితే ఇటలీలోని గ్రామీణ ప్రాంతాల్లో జనాభా అంతకంతకూ తగ్గుతూ పోతోంది. ఈ క్రమంలోనే కొన్ని ప్రాంతాలే అంతరించేదశకు వచ్చాయంటే పరిస్థితి ఎలా ఉందో అర్థం చేసుకోవచ్చు. గ్రామీణ ఇటలీలోని అనేక ప్రాంతాలు ఇదే పరిస్థితిని ఎదుర్కొంటున్నాయి. ఈ నేపథ్యంలోనే ఒల్లోలై గ్రామం ఈ వినూత్న ఆఫర్‌తో ముందుకొచ్చింది. అమెరికా అధ్యక్ష ఎన్నికల్లో డొనాల్డ్ ట్రంప్ గెలుపుతో తీవ్ర నిరాశ చెందిన అమెరికన్లు ఆకర్షించే పనిలో పడింది.

  ఎవరైనా తమ గ్రామానికి వస్తే వారికి ఒక డాలర్‌కే అంటే మన భారత కరెన్సీలో దాదాపు రూ.84 కే ఇంటిని అందిస్తామని హామీ ఇస్తోంది. ఒల్లోలై గ్రామం తీవ్రమైన జనాభా కొరతను ఎదుర్కొంటోంది. ఈ నేపథ్యంలోనే బయటి నుంచి వలస వచ్చేవారిని ఆకర్షించడానికి చాలా కాలంగా అనేక ప్రయత్నాలు చేస్తోంది. అందులో భాగంగానే ఆ గ్రామంలో శిథిలావస్థకు చేరిన ఇళ్లను కేవలం ఒక డాలర్ ధరకే విక్రయిస్తోంది. దీని వల్ల జనాభా పెరిగే అవకాశాలు ఉన్నాయని భావిస్తోంది. ఈ విషయాన్ని అమెరికా వార్తా సంస్థ సీఎన్ఎన్ వెల్లడించింది.

ఈ క్రమంలోనే అమెరికా అధ్యక్ష ఎన్నికల ఫలితాల తర్వాత అమెరికన్ నిర్వాసితులను లక్ష్యంగా చేసుకుని ఒల్లోలై గ్రామం ఒక వెబ్‌సైట్‌ను కూడా ప్రారంభించింది. రిపబ్లికన్ పార్టీ నేతృత్వంలోని డొనాల్డ్ ట్రంప్ పాలన పట్ల ఆందోళన వ్యక్తం చేస్తున్నవారిని తమ గ్రామానికి ఆకర్షిస్తూ అతి తక్కువ ధరకే ఇళ్లను అందిస్తోంది. మీరు ప్రపంచ రాజకీయాల కారణంగా అలసిపోయారా.. కొత్త అవకాశాలను పొందుతూ మరింత సమతుల్య జీవనశైలిని స్వీకరించాలని చూస్తున్నారా అంటూ ఆ వెబ్‌సైట్‌ అమెరికన్ల దృష్టిని ఆకర్షిస్తోంది.

మరోవైపు.. అధ్యక్ష ఎన్నికల నేపథ్యంలో అమెరికన్ ఓటర్లను ఆకర్షించేందుకు ఈ వెబ్‌సైట్‌ను ప్రత్యేకంగా రూపొందించినట్లు స్థానిక మేయర్ ఫ్రాన్సిస్కో కొలంబు వెల్లడించారు. అమెరికా మాత్రమే కాకుండా ఇతర దేశాల నుంచి వచ్చేవారిని కూడా ఆహ్వానించేందుకు తాము సిద్ధంగా ఉన్నామని చెబుతూనే.. అమెరికన్లకు ఫాస్ట్-ట్రాక్ విధానం ఉంటుందని స్పష్టం చేశారు. ఇక ఈ ఇటాలియన్ గ్రామం మాత్రమే కాకుండా అమెరికా ఎన్నికల ఫలితాలతో అసంతృప్తిగా ఉన్న అమెరికన్లు.. డొనాల్డ్ ట్రంప్ కొత్త పాలన నుంచి దూరంగా వెళ్లేందుకు క్రూయిజ్ లైన్ కూడా అందుబాటులోకి వచ్చింది. స్కిప్ ఫార్వర్డ్ పేరుతో ప్రారంభమైన ఈ సర్వీస్.. అమెరికాలో ట్రంప్‌ పాలన ముగిసే 4 ఏళ్ల వరకు 140 దేశాలలో 425 పోర్టులను చుట్టిరానుంది.