ఉక్రెయిన్ రష్యా యుద్ధంలో మరో మలుపు.. అణు ముసాయిదాపై పుతిన్ సంతకం

రెండో ప్రపంచ యుద్ధ సమయంలో జపాన్‌పై అమెరికా అణు బాంబు దాడి ప్రపంచ చరిత్రలో చీకటి అధ్యాయాన్ని లిఖించింది. 1945, ఆగస్టు 6న హిరోషిమాపై, అదే నెల 9న నాగసాకిపై అమెరికా జారవిడిచిన అణుబాంబులు ఆ దేశాన్ని సర్వనాశనం చేశాయి. పెరల్ హార్బర్‌పై దాడికి ప్రతీకారంగా అమెరికా అణు దాడులతో జపాన్‌పై విరుచుకుపడి.. అంతులేని విషాదాన్ని, పూడ్చలేని నష్టాన్ని మిగిల్చింది. సుమారు 2 లక్షల మందికిపైగా ప్రజలు ప్రాణాలు కోల్పోయారు. ఎన్నో లక్షల మంది జీవచ్ఛాలుగా మారిపోయారు. 79 ఏళ్లు కావొస్తున్నా ఆ దుర్ఘటన గురించి తలుచుకుంటే ఇప్పటికీ ప్రపంచ దేశాల వెన్నులో వణుకు పుడుతుంది. వెయ్యి రోజులకు పైగా కొనసాగుతోన్న రష్యా-ఉక్రెయిన్ యుద్ధం పుణ్యమాని ప్రపంచం మరోసారి అణు యుద్ధాన్ని చవిచూడబోతోందా? అన్న భయాలు మొదలయ్యాయి.

  రష్యా, ఉక్రెయిన్‌ల మధ్య నానాటికీ ముదురుతున్న యుద్ధ తీవ్రతను చూస్తుంటే అణు యుద్ధం అనుమానాలు బలపడుతున్నాయి. తమ దేశంపైకి దీర్ఘశ్రేణి క్షిపణుల ప్రయోగానికి ఉక్రెయిన్‌కు అమెరికా అనుమతివ్వడం రష్యా అధ్యక్షుడు వ్లాదిమిర్‌ పుతిన్‌కు తీవ్ర ఆగ్రహం తెప్పించింది. దీంతో ఆయన అణ్వస్త్ర వినియోగాన్ని తెరపైకి తెచ్చారు. ఒకవేళ పశ్చిమ దేశాలు తమ దేశంపైకి నేరుగా దాడి చేస్తే అణ్వాయుధాలు వాడటానికి వీలుగా సవరించిన అణు ముసాయిదా ఆ దస్త్రంపై పుతిన్ సంతకం చేయడంతో ప్రపంచ దేశాలు ఉలిక్కిపడ్డాయి.

అణ్వాయుధాలు కలిగి ఉన్న దేశం సాయంతో ఏ దేశమైనా తమపై దాడి చేస్తే, దాన్ని సంయుక్త దాడిగానే పరిగణిస్తామని రష్యా ఆ ముసాయిదాలో విస్పష్టంగా పేర్కొంది. అంటే కూటమిగా ఎవరు దాడిచేసినా.. ఆయా దేశాలపై రష్యా అణుదాడి చేయడానికి వీలు కల్పించే నిబంధన అది. మరోవైపు అమెరికా ఇచ్చిన అనుమతిని అందిపుచ్చుకున్న ఉక్రెయిన్‌ ఏకంగా ఆరు ఆర్మీ టాక్టికల్‌ సిస్టమ్‌ మిసైళ్లను‌ రష్యాపైకి ప్రయోగించింది. ఇందులో ఐదింటిని కూల్చేయగా.. మరోదాన్ని ధ్వంసం చేశామని రష్యా ప్రకటించింది.

అణ్వస్త్ర ప్రయోగం ఎంతటి విపత్తును మిగులుస్తుందో జపాన్‌ విషయంలో కళ్లారా చూసిన ప్రపంచ దేశాలు తాజాగా రష్యా దూకుడుతో ఆందోళనకు గురవుతున్నాయి. ఒకవేళ రష్యా గనుక ఉక్రెయిన్‌తో అణుబాంబు వేస్తే నష్టం ఆ ఒక్క దేశంపైనే కాకుండా ఎన్నో దేశాలపై ప్రభావం చూపనుందని విశ్లేషకులు చెబుతున్నారు. అది ప్రపంచ వినాశనానికే దారితీసే అవకాశముందని ఆందోళన వ్యక్తం చేస్తున్నారు.