ఏపీలోని 3 రాజ్యసభ స్థానాలకు ఉపఎన్నికలు.. ఈసీ షెడ్యూల్ విడుదల

ఆంధ్రప్రదేశ్‌లో త్వరలోనే రాజ్యసభ ఉపఎన్నికలు జరగనున్నాయి. ఏపీలో ప్రస్తుతం మూడు రాజ్యసభ స్థానాలు ఖాళీగా ఉన్నాయి. ఈ మూడు స్థానాలకు ఉపఎన్నికలు నిర్వహించనున్నారు. కేంద్ర ఎన్నికల సంఘం రాజ్యసభ ఉపఎన్నికలకు ఈ మేరకు షెడ్యూల్ విడుదల చేసింది. మోపిదేవి వెంకటరమణ, బీద మస్తాన్‌రావు, ఆర్.కృష్ణయ్య రాజీనామాలతో ఖాళీగా ఉన్న రాజ్యసభ స్థానాలకు ఉపఎన్నికలు నిర్వహించనున్నారు. వీరంతా వైసీపీ నుంచి రాజ్యసభకు ఎన్నికయ్యారు. అయితే ఆ తర్వాత జరిగిన రాజకీయ పరిణామాల నేపథ్యంలో తమ సభ్యత్వాలకు ఇటీవల రాజీనామా చేశారు. దీంతో ఆంధ్రప్రదేశ్ నుంచి మూడు రాజ్యసభ స్థానాలు ఖాళీ అయ్యాయి. ఈ క్రమంలోనే ఖాళీ అయిన ఈ మూడు స్థానాలకు కేంద్ర ఎన్నికల సంఘం ఉపఎన్నికలు నిర్వహిస్తోంది

ఏపీ సహా నాలుగు రాష్ట్రాలలో రాజ్యసభ ఉపఎన్నికలకు ఈసీ షెడ్యూల్ విడుదల చేసింది. ఆంధ్రప్రదేశ్, ఒడిశా, బెంగాల్, హరియాణాల్లోని ఖాళీగా ఉన్న ఆరు రాజ్యసభ స్థానాలకు ఉపఎన్నికలు నిర్వహించనున్నారు. ఈసీ షెడ్యూల్ ప్రకారం డిసెంబర్ 3న రాజ్యసభ ఉపఎన్నికలకు నోటిఫికేషన్ విడుదల కానుంది. డిసెంబర్ 10వ తేదీ వరకూ నామినేషన్లు స్వీకరిస్తారు. డిసెంబర్ 11న నామినేషన్ల పరిశీలన, డిసెంబర్ 13వ తేదీ వరకు ఉపసంహరణకు గడువు ఇచ్చారు. డిసెంబర్ 20న పోలింగ్ జరగనుంది. ఉదయం 9 నుంచి సాయంత్రం 4 వరకూ పోలింగ్ జరుగుతుంది. అదే రోజు సాయంత్రం ఐదు గంటల నుంచి కౌంటింగ్ నిర్వహిస్తారు

మరోవైపు ఆంధ్రప్రదేశ్‌లో ప్రస్తుతం అధికారంలో ఉన్న టీడీపీకి రాజ్యసభలో ప్రాతినిధ్యం లేదు. పార్టీ ఆవిర్భావం తర్వాత తొలిసారిగా ఆ పార్టీకి పెద్దల సభలో ప్రాతినిధ్యం లేకుండా పోయింది. అయితే ప్రస్తుతం టీడీపీ కూటమికి మెజారిటీ ఎమ్మెల్యేలు ఉన్న నేపథ్యంలో.. ఈ మూడు స్థానాలు కూటమికి దక్కే అవకాశాలు ఉన్నాయి. అయితే మూడు స్థానాల్లో టీడీపీకి ఎన్ని, బీజేపీకి ఎన్ని, జనసేన పార్టీ ఎన్ని స్థానాలు తీసుకుంటుందనేదీ తెలియాల్సి ఉంది. రాజ్యసభ స్థానం కోసం టీడీపీలో ఇప్పటికే భారీగా ఆశావహులు ఉన్నారు. ఈ నేపథ్యంలో రెండు స్థానాలను ఆ పార్టీ డిమాండ్ చేసే అవకాశం ఉంది. ప్రస్తుతం ఉన్న ఎమ్మెల్యేల సంఖ్యాబలం ఆధారంగా వైసీపీ బరిలో ఉంటుందా.. ఉండదా అనేది ఆసక్తికరంగా మారింది. వైసీపీకి కేవలం 11 మంది ఎమ్మెల్యేలు మాత్రమే ఉండటంతో పోటీకి దూరంగా ఉంటుందనే చర్చ నడుస్తోంది.