నాగార్జున వర్సిటీలో తెలంగాణకు చెందిన రిషితేశ్వరి ఆత్మహత్య.. కోర్టు సంచలన తీర్పు

నాగార్జున యూనివర్సిటీలో ఆర్కిటెక్చర్‌ విద్యార్థిని రిషితేశ్వరి ఆత్మహత్య కేసులో గుంటూరు జిల్లా కోర్టు శుక్రవారం తీర్పు వెలువరించింది. ప్రాసిక్యూషన్‌ నేరం నిరూపించలేకపోయిందన్న న్యాయస్థానం.. కేసును కొట్టివేసింది. 9 ఏళ్ల పాటు సుదీర్ఘంగా సాగిన విచారణలో శుక్రవారం గుంటూరు జిల్లా కోర్టు.. తుది తీర్పు వెల్లడించింది. అయితే ఈ కోర్టు తీర్పుపై రిషితేశ్వరి కుటుంబ సభ్యులు తీవ్ర ఆవేదన వ్యక్తం చేశారు. ప్రాసిక్యూషన్ సరైన ఆధారాలు సమర్పించలేదని కోర్టు పేర్కొన్న నేపథ్యంలో.. రిషితేశ్వరి ఆత్మహత్య లేఖను ఎందుకు పరిగణలోకి తీసుకోలేదని ప్రశ్నించారు.

తెలంగాణలోని వరంగల్ జిల్లాకు చెందిన రిషితేశ్వరి.. గుంటూరులోని నాగార్జున యూనివర్సిటీలో బ్యాచిలర్ ఆఫ్ ఆర్కిటెక్చర్ కోర్సు చదివేది. అయితే యూనివర్సిటీలోని ర్యాగింగ్‌, వేధింపుల కారణంగా 2015 జులై 14వ తేదీన ఆమె ఆత్మహత్య చేసుకుంది. ర్యాగింగ్‌ తట్టుకోలేక తాను ప్రాణాలు తీసుకుంటున్నట్లు సూసైడ్‌ నోట్‌లో రిషితేశ్వరి వెల్లడించింది. అయితే రిషితేశ్వరి ఆత్మహత్య ఘటన అప్పట్లో రెండు రాష్ట్రాల్లో తీవ్ర సంచలనం రేపింది. ఈ ఘటనపై కేసు నమోదు చేసిన పెదకాకాని పోలీసులు.. దర్యాప్తు చేశారు. ఈ కేసు గురించి.. గుంటూరు కోర్టులో 9 ఏళ్లపాటు విచారణ కొనసాగింది. సుదీర్ఘ విచారణ తర్వాత శుక్రవారం కోర్టు తుది తీర్పు వెలువరించింది.

అయితే సూసైడ్ లెటర్ ఆధారంగా పోలీసులు పలువురు నిందితులను అరెస్ట్ చేశారు. ఇక ఈ 9 ఏళ్ల పాటు జరిగిన ఈ కేసులు విచారణ కొనసాగింది. సరైన సాక్షాలు లేని కారణంగా రిషితేశ్వరి ఆత్మహత్య కేసును కొట్టివేస్తున్నట్లు గుంటూరు కోర్టు జడ్జి తెలిపారు. మరోవైపు.. రిషితేశ్వరి ఆత్మహత్య కేసును గుంటూరు కోర్టు కొట్టివేయడంపై ఆమె తల్లిదండ్రులు తీవ్ర ఆవేదన వ్యక్తం చేశారు. సాక్ష్యాలు లేకపోతే రిషితేశ్వరి సూసైడ్ లేఖను ఎందుకు పరిగణనలోకి తీసుకోలేదని ప్రశ్నించారు. ఈ కేసులో దాదాపు 170 మంది సాక్షులు ఉన్నారని వారు తెలిపారు. ఈ కేసులో తమకు న్యాయం చేయాలని ముఖ్యమంత్రి నారా చంద్రబాబు నాయుడు, డిప్యూటీ సీఎం పవన్ కళ్యాణ్‌లను కలుస్తామని చెప్పారు. తమకు పైకోర్టులకు వెళ్లే ఆర్థిక స్థోమత లేదని.. ప్రభుత్వమే సహాయం చేయాలని కోరారు. ఈ కేసులో తమకు న్యాయం జరగకపోతే మరణమే శరణ్యమని రిషితేశ్వరి తల్లిదండ్రులు తెలిపారు.