5 ఏళ్లు దాటిన వారు ఇన్‌కం టాక్స్ చెల్లించనవసరం లేదా? కేంద్రం ఏం చెబుతోంది?

సోషల్ మీడియాలో ఇటీవలి కాలంలో చాలా ఫేక్ వార్తలు చక్కర్లు కొడుతున్న సంగతి తెలిసిందే. ఏది నిజమో, ఏది నకిలీదో తెలుసుకునేలోపే.. వేలాది, లక్షలాది మందికి ఆ వార్త చేరుతుంది. ఇప్పుడు ఇలాంటిదే ఒక వార్త వేగంగా సామాజిక మాధ్యమాల్లో వైరల్ అవుతోంది. 'భారత 75వ స్వాతంత్య్ర దినోత్సవాన్ని పురస్కరించుకొని.. 75 ఏళ్లు పైబడిన సీనియర్ సిటిజెన్లు ఇక ఇన్‌కం టాక్స్ చెల్లించాల్సిన అవసరం లేదు.' అని ఒక మెసేజ్ విస్తృతంగా వైరల్ అవుతుంది. చాలా మంది దీనిని నిజమని నమ్మి.. ఇతరులకు ఫార్వర్డ్ చేయడం వంటిది జరుగుతోంది. అయితే.. ఈ సందేశం వైరల్ అవుతున్న నేపథ్యంలో కేంద్ర ప్రభుత్వం రంగంలోకి దిగింది. ఇందులో ఎలాంటి నిజం లేదని స్పష్టం చేసింది.

ఈ మేరకు ప్రెస్ ఇన్ఫర్మేషన్ బ్యూరో ఫ్యాక్ట్‌ చెక్ టీమ్.. సోషల్ మీడియా అకౌంట్ ట్విట్టర్‌లో పోస్ట్ చేసింది. వైరల్ అవుతున్న సందేశాన్ని ట్యాగ్ చేస్తూ.. పీఐబీ ఫ్యాక్ట్‌ చెక్ టీమ్.. 'దిస్ మెసేజ్ ఈజ్ ఫేక్' అని ప్రకటన విడుదల చేసింది. అంటే దీనిని బట్టి '75 ఏళ్లు పైబడిన వారికి ఎలాంటి టాక్స్ లేదు' అన్న దాంట్లో ఎలాంటి వాస్తవం లేదు.

ఇదే సమయంలో వారికి ఎలాంటి ఆదాయాలపై టాక్స్ మినహాయింపు ఉంటుందో కూడా ట్వీట్‌లో వివరంగా చెప్పింది. 75 ఏళ్లు దాటిన సీనియర్ సిటిజెన్లకు.. పెన్షన్ సహా వడ్డీ ఆదాయంపై ఆదాయపు పన్ను చట్టం సెక్షన్ 194P కింద ఐటీఆర్ ఫైలింగ్ నుంచి మినహాయింపు ఉంది.

ఇక సోషల్ మీడియాలో చక్కర్లు కొడుతున్న ఫేక్ మెసేజ్‌లో కేంద్ర ప్రభుత్వం కీలక ప్రకటన అని.. 75 ఏళ్లు దాటిన వారికి టాక్స్ చెల్లించాల్సిన అవసరం లేదని ఉంది. ఇక ఈ సీనియర్ సిటిజెన్లకు పన్ను లేకుండా చేసేందుకు వీరికి పన్ను మినహాయింపు చట్టంలో సవరణలు చేసినట్లు కూడా పేర్కొంది. ఈ క్రమంలోనే అప్రమత్తమైన కేంద్రం.. ఈ వైరల్ సందేశం ఫేక్ అని ప్రకటించింది.

ప్రస్తుతం దేశంలో పాత, కొత్త అని రెండు పన్ను విధానాలు ఉన్నాయి. మధ్యతరగతి వర్గానికి మరింత ఊరట కలిగించేలా.. పెద్దగా భారం పడకుండా ఉండేందుకు వీలుగా.. పన్ను శ్లాబుల్ని సరళంగా మారుస్తూ వస్తోంది. రూ. 10 లక్షల లోపు ఆదాయం ఉన్న వారికి ఇక్కడ బెనిఫిట్ ఉంది. ఇక్కడ ఎలాంటి పన్ను మినహాయింపులకు మాత్రం అవకాశం లేదు. మరోవైపు.. పాత పన్ను విధానంలో మాత్రం ఎలాంటి మార్పులు చేయట్లేదు. ఇక్కడ కొన్నింట్లో పెట్టుబడులపై సెక్షన్ 80C సహా ఇతర సెక్షన్లను బట్టి టాక్స్ డిడక్షన్స్ పొందొచ్చు. కొత్త దాంట్లో ఈ అవకాశం లేదు. ఇక స్టాండర్డ్ డిడక్షన్ మాత్రం.. కొత్త పన్ను విధానంలోనే ఎక్కువ ఉంది.