రైలులో వాటర్ బాటిల్‌కు అధిక ధర వసూలు.. ప్రయాణికుడి ఫిర్యాదుతో రూ. లక్ష ఫైన్

వాటర్ బాటిల్‌కు రూ.5 ఎక్కువ తీసుకున్నందుకు రైల్వే శాఖ.. క్యాటరింగ్ సంస్థకు లక్ష రూపాయలు ఫైన్ విధించింది. రైలులో ప్రయాణిస్తున్న ఓ వ్యక్తి.. రైల్వే క్యాటరింగ్ సర్వీస్ ద్వారా వాటర్ బాటిల్‌ను కొనుగోలు చేశాడు. అయితే ఆ సేల్స్ బాయ్.. ఆ బాటిల్ రేటు కంటే రూ.5 అధికంగా తీసుకున్నాడు. దీంతో ఆ ప్రయాణికుడు.. రైల్వే హెల్ప్‌లైన్ నెంబర్‌కు ఫోన్ చేసి ఫిర్యాదు చేశాడు. రంగంలోకి దిగిన రైల్వే శాఖ అధికారులు.. సదరు రైల్వే క్యాటరింగ్ సంస్థకు భారీగా జరిమానా విధించింది. అంతేకాకుండా వసూలు చేసిన అధిక ధరను తిరిగి ప్రయాణికులకు చెల్లించాలని తెలిపింది.

ఓ ప్రయాణికుడు.. ఇటీవల పూజా సూపర్‌ఫాస్ట్‌ ఎక్స్‌ప్రెస్‌లో ప్రయాణం చేశాడు. తన ప్రయాణంలో భాగంగా రైల్వే క్యాటరింగ్ సర్వీస్ నుంచి ఒక వాటర్‌ బాటిల్‌ను కొనుగోలు చేశాడు. అయితే వాటర్ బాటిల్ ధర రూ.15 కాగా.. క్యాటరింగ్‌ బాయ్ ప్రయాణికుడి వద్ద నుంచి రూ.20 వసూలు చేశాడు. అయితే బాటిల్ ధర ఎంఆర్పీ రూ.15 ఉంది అని ప్రయాణికుడు వాదించినా.. అతడు వినకుండా రూ.20 తీసుకున్నాడు. ఇక ఆ సేల్స్ బాయ్‌తో జరిగిన వాగ్వాదాన్ని.. ఆ ప్రయాణికుడు తన ఫోన్‌లో వీడియో తీశాడు. ఈ ఘటన తర్వాత రైల్వే హెల్ప్ లైన్ నంబర్ 139కి ఫోన్ చేసి.. తన వద్ద వాటర్ బాటిల్‌కు రూ.5 అధికంగా వసూలు చేశాడని పేర్కొన్నాడు.

ఇక ఆ ఫిర్యాదు చేసిన తర్వాత కొద్దిసేపటికే ఆ క్యాటరింగ్ సర్వీస్ సంస్థకు చెందిన ఓ వ్యక్తి వచ్చి.. వారి వద్ద వసూలు చేసిన రూ.5 తిరిగి ఇస్తానని చెప్పాడు. ఆ ఒక్క ప్రయాణికుడితోపాటు కోచ్‌లోని ఇతర ప్రయాణికుల నుంచి వసూలు చేసిన అదనపు మొత్తాన్ని సైతం తిరిగి చెల్లిస్తామని వారికి విజ్ఞప్తి చేశాడు. మరోవైపు.. వాటర్ బాటిల్‌పైన ఉన్న ఎంఆర్‌పీ కంటే అధిక ధరలు వసూలు చేస్తుండడం తమ దృష్టికి రావడంతో రైల్వే శాఖ తీవ్రంగా స్పందించింది. ప్రయాణికుల నుంచి అధిక ధర వసూలు చేసిన సదరు క్యాటరింగ్ సంస్థపై ఇండియన్‌ రైల్వే ఏకంగా రూ.లక్ష జరిమానా విధించినట్లు ప్రకటించింది. ఈ విషయాన్ని ట్విటర్ వేదికగా తెలిపింది. ఇక ఈ ఘటనకు సంబంధించిన వీడియోను షేర్‌ చేస్తూ.. ఇలాంటి ఘటనలపై ఇండియన్‌ రైల్వే శాఖ కఠినంగా వ్యవహరిస్తుందని అధికారులు హెచ్చరించారు.