ఆ దేవుడు ఎంతటి కఠినాత్ముడు.. బిడ్డ పుట్టిన కాసేపటికే ఊహించని ఘోరం

ఆసుపత్రిలో బిడ్డను ప్రసవించిన ఓ మహిళ.. తన పాపాయిని పొత్తిళ్లలోకి తీసుకోక ముందే మృత్యుఒడికి చేరుకుంది. పై అంతస్తు నుంచి కిందికి వస్తుండగా లిఫ్టు రూపంలో ఆమెను మృత్యువు బలితీసుకుంది. గుండెల్ని మెలిపెట్టే ఈ ఘటన ఉత్తర్ ప్రదేశ్‌లోని మీరట్‌లో చోటుచేసుకుంది. కరిష్మా అనే మహిళకు పురిటి నొప్పులు రావడంతో కుటుంబసభ్యులు ఆమెను లోహియా నగర్‌లోని స్థానిక క్యాపిటల్ ఆసుపత్రికి తరలించారు. శుక్రవారం తెల్లవారుజామున కరిష్మా పండంటి బిడ్డకు జన్మనిచ్చింది. అనంతరం ఆమెను పైఅంతస్తు నుంచి లిఫ్ట్‌లో గ్రౌండ్ ఫ్లోర్‌లోని మెటర్నిటీ వార్డుకు తరలిస్తుండగా.. రోప్ తెగిపడి లిఫ్ట్‌ ఒక్కసారిగా కుప్పకూలింది.

ఈ ఘటనలో ఆమెతో పాటు లిఫ్ట్‌లో ఉన్న ఇద్దరు ఆసుపత్రి సిబ్బంది గాయపడ్డారు. కరిష్మా తల, మెడకు తీవ్ర గాయాలు కావడంతో ఆమె మృతి చెందింది. ఘటన జరిగిన 45 నిమిషాల తర్వాత లిఫ్ట్‌ డోర్లను పగలుగొట్టి వారికి బయటకు తీశారు. గాయపడిన వారిని చికిత్స కోసం వేరే ఆసుపత్రికి తరలించారు. అక్కడకు వెళ్లేసరికి కరిష్మా చనిపోయినట్టు వైద్యులు నిర్దరించారు. దీంతో రిష్మా కుటుంబసభ్యుల్లో ఆగ్రహం కట్టలు తెంచుకుంది. ఆసుపత్రి వర్గాలు నిర్లక్ష్యం కారణంగా ప్రమాదం జరిగిందని ఆరోపిస్తూ దాడికి పాల్పడ్డారు, సరైన సమయంలో వైద్య సహాయం అందకపోవడంలో కరిష్మా మృతి చెందిందని వారు ఆరోపించారు.

మృతురాలి కుటుంబసభ్యులు ఆసుపత్రిలో సామాగ్రిని ధ్వంసం చేయడంతో సిబ్బంది అక్కడి నుంచి పారిపోయారు. కరిష్మా భర్త మాట్లాడుతూ.. ప్రమాదం జరిగిన 45 నిమిషాల తర్వాత సిబ్బంది లిఫ్ట్‌ డోర్‌ పగలగొట్టి అందులోని వారిని బయటకు తీశారన్నారు. వారి అలసత్వ వల్లే తాను భార్యను కోల్పోయానని ఆవేదన వ్యక్తం చేశాడు. కాగా, అక్కడ ఉన్న 13 మంది రోగులను వేరే ఆసుపత్రికి తరలించినట్లు ఆసుపత్రి వర్గాలు వెల్లడించాయి. బిడ్డ క్షేమంగానే ఉందని.. మరో ఆసుపత్రికి తరలించి చికిత్స అందిస్తున్నామని పేర్కొన్నాయి.

కాగా, ఓవర్‌లోడ్‌ కారణంగా లిఫ్ట్‌ కేబుల్ తెగిపోయి ఉండొచ్చని చీఫ్‌ మెడికల్‌ ఆఫీసర్‌ డాక్టర్‌ అశోక్‌ కటారియా అన్నారు. లిఫ్ట్ మెయింటెనెన్స్ రికార్డులను పరిశీలిస్తున్నామని.. దర్యాప్తు కొనసాగుతోందని తెలిపారు. ఆసుపత్రి యాజమాన్యం నిర్లక్ష్యంగా వ్యవహరించినట్లు రుజువైతే వారిపై కఠిన చర్యలు తీసుకుంటామని సీఎంఓ స్పష్టం చేశారు. అవసరమైతే ఆసుపత్రి లైసెన్స్‌ను రద్దు చేస్తామని డాక్టర్ కటారియా పేర్కొన్నారు. అయితే, లిఫ్ట్ టెక్నికల్ ఇన్‌స్పెక్షన్‌లో ఎటువంటి లోపం లేదని మీరట్ నగర మేజిస్ట్రేట్ అనిల్ కుమార్ చెప్పారు. ఘటనపై కేసు నమోదుచేసిన పోలీసులు.. విచారణ చేపట్టారని ఆయన తెలిపారు.