పార్లమెంట్‌లో కలకలం.. కాంగ్రెస్ ఎంపీ సీటు వద్ద రూ.500 నోట్ల కట్ట

పార్లమెంట్‌లో నోట్ల కట్ట కలకలం రేపింది. రాజ్యసభలో కాంగ్రెస్ సభ్యుడు సీటు వద్ద రూ.500 నోట్ల కట్ట లభ్యమైంది. దీంతో ఉపరాష్ట్రపతి, రాజ్యసభ ఛైర్మన్ జగదీప్ ధన్ఖడ్ విచారణకు ఆదేశించారు. అయితే, ఈ క్రమంలో తమ పార్టీకి చెందిన సభ్యుడు అభిషేక్ మను సంఘ్వీ పేరును ఆయన ప్రస్తావించడంపై కాంగ్రెస్ జాతీయ అధ్యక్షుడు మల్లికార్జున ఖర్గే తీవ్ర అభ్యంతరం తెలిపారు సభలో ఓ సీటు వద్ద లభ్యమైన నగదు ఎవరిదో తెలుసుకునేందుకు విచారణ చేపట్టినప్పుడు.. పేరును ప్రస్తావించడం సమంజసమా? అని ఖర్గే నిలదీశారు. ఈ విషయంపై బీజేపీ, కాంగ్రెస్ సభ్యుల మధ్య తీవ్ర వాగ్వాదం నెలకొంది.

 బీజేపీ జాతీయ అధ్యక్షుడు జేపీ నడ్డా, కేంద్ర మంత్రులు పీయూష్ గోయల్, కిరణ్ రిజిజులు స్పందిస్తూ.. విచారణలో అన్ని విషయాలు తెలుస్తాయని, దీనిపై కాంగ్రెస్ సభ్యులు ఎందుకు ఆందోళన చెందుతున్నారని విమర్శించారు. అయితే, దీని వెనుక కుట్ర ఉందనే అనుమానం వ్యక్తం చేసిన కాంగ్రెస్.. రాజ్యసభ ఛైర్మన్ దృష్టికి దీనిని తీసుకెళ్లింది. చివరకు ఈ ఘటనపై విచారణకు ఆదేశించినట్టు ప్రకటించిన ఛైర్మన్ జగదీప్ ధన్ఖడ్.. జీరో అవర్‌ను ప్రారంభించారు.

‘‘గురువారం రాజ్యసభ వాయిదా పడిన అనంతరం.. సాధారణ తనిఖీల సందర్భంగా 222వ నెంబర్ సీటు వద్ద భద్రతా అధికారులు రూ.500 కరెన్సీ నోట్ల కట్టను గుర్తించి, స్వాధీనం చేసుకున్నారు.. ఈ విషయం తన దృష్టికి రావడంతో అంత నగదు సభలోకి ఎలా వచ్చింది? ఆ మొత్తం ఎవరిదో? తేల్చేందుకు విచారణకు ఆదేశించాం’’నట్లు రాజ్యసభ ఛైర్మన్ ధన్ఖడ్ తెలిపారు. ఆ సీటు తెలంగాణ నుంచి రాజ్యసభకు ఎన్నికైన సభ్యుడు అభిషేక్ మను సింఘ్వీదిగా ఛైర్మన్ తన ప్రకటనలో పేర్కొనడంపై కాంగ్రెస్ అభ్యంతరం వ్యక్తం చేసింది. విచారణకు తమకు ఎటువంటి అభ్యంతరం లేదని, కానీ పేరును ప్రస్తావించడం ఏంటి? అని ఖర్గే మండిపడ్డారు. పత్రిపక్షాలపై బీజేపీ కుట్రగా కాంగ్రెస్ ఈ చర్యను పేర్కొంది.

ఈ ఘటనపై అభిషేక్ మను సంఘ్వీ స్పందించారు. తాను ఇలాంటి ఘటన గురించి ఎప్పుడూ వినలేదని, ఇదే మొదటిసారిని ఎక్స్‌ (ట్విట్టర్)‌లో పేర్కొన్నారు. ‘‘నేను ఇలాంటి మొదటిసారి వింటున్నాను.. ఇప్పటి వరకు నేను ఎప్పుడూ వినలేదు.. రాజ్యసభకు వెళ్లేటప్పుడు జేబులో రూ. 500 నోటు ఒక్కటే పెట్టుకుంటాను.. నేను గురువారం మధ్యాహ్నం 12.57 గంటలకు రాజ్యసభకు చేరుకున్నాను.. మధ్యాహ్నం 1.00 గంటకు సభ వాయిదా పడింది.... అనంతరం 1.30 గంటల వరకు క్యాంటీన్‌లో కూర్చున్నాను.. ఆ తర్వాత అక్కడి నుంచి వెళ్లిపోయాను..’’ అని సింఘ్వీ తెలిపారు.

‘‘సభలో నేను కేవలం 3 నిమిషాలే ఉన్నాను.. మరో 30 నిమిషాలు క్యాంటీన్‌లో ఉన్నా.. నేను కూర్చునే 222 నెంబర్ సీటు వద్దకు నగదు ఎలా వచ్చింది.. ఎవరైనా ఉద్దేశపూర్వకంగా అక్కడ పెట్టారా? అనేది విచారించాల్సిందే.. ప్రతి ఒక్కళ్లూ తాము కూర్చునే సీట్లకు తాళాలు వేసుకుని తీసుకెళ్లక తప్పదేమో?.. లేకుంటే ఇలాంటి ఆరోపణలే వస్తాయి’’ అని ఆయన అన్నారు. విషయాలు విచారణలో తేలే అవకాశం ఉంది.