దేశంలోనే ఖరీదైన అపార్ట్‌మెంట్.. ఒక్కో ఫ్లాట్‌కు రూ.100 కోట్లు, ఏమేం సౌకర్యాలు ఉంటాయంటే?

సొంతిల్లు అనేది ప్రతీ ఒక్కరి కల. ఏళ్లకేళ్లు కష్టపడి రూపాయి రూపాయి కూడబెట్టి ఇల్లు కట్టుకునేవారు, కొనుక్కునే వారు చాలా మంది ఉంటారు. ఇక లోన్లు తీసుకుని ఇల్లు కట్టి, కొని.. జీవితాంతం దానికి అప్పు తీర్చేవారు కూడా చాలా మంది ఉంటారు. ఇక స్థలం కొని ఇల్లు కట్టుకోలేని వారు.. అపార్ట్‌మెంట్‌లలో ఫ్లాట్లు కొనుగోలు చేస్తూ ఉంటారు. ఇక పట్టణ ప్రాంతాల్లో ఉండే అధికంగా ఉండే ఇళ్ల ధరలను తట్టుకోలేక అపార్ట్‌మెంట్‌లలో ఫ్లాట్లు కొనుగోలు చేస్తున్నారు. అయితే ఇదంతా డబ్బులు లేని మధ్య తరగతి వారి కోసం. కానీ డబ్బున్న ధనవంతుల సంగతి చూస్తే కళ్లు చెదిరిపోవాల్సిందే. ఎందుకంటే.. వాళ్లు కట్టే ఇళ్లు, కొనుగోలు చేసే ఫ్లాట్లు లగ్జరీగా ఉంటాయి. ఈ క్రమంలోనే తాజాగా మన దేశంలో అత్యంత ఖరీదైన ఫ్లాట్లు ఇప్పుడు రూ.100కోట్లకు ఒక్కటి చొప్పున విక్రయిస్తున్నారు.

దేశ రాజధాని ఢిల్లీకి సమీపంలోని గురుగ్రామ్‌లో లీడింగ్‌ రియల్‌ ఎస్టేట్‌ డెవలపర్స్‌ అయిన డీఎల్‌ఎఫ్‌ సంస్థ "ది కామెల్లియాస్" పేరుతో అత్యంత ఖరీదైన లగ్జరీ అపార్ట్‌మెంట్‌లను నిర్మిస్తోంది. ఇది భారత్‌లోనే లగ్జరీ రియల్ ఎస్టేట్‌ రంగంలో ఇదో కీలక పరిణామం అని రియల్ నిపుణులు పేర్కొంటున్నారు. "ది కామెలియాస్"లో ఒక్కో అపార్ట్‌మెంట్ ధర రూ.100 కోట్లు ఉంటుందని పేర్కొంటున్నారు. అయితే వీటిని దేశంలోనే టాప్ బిజినెస్‌మెన్‌లు, పలు కంపెనీల సీఈఓలు, అత్యంత ధనవంతుల కోసమే ఈ "ది కామెల్లియాస్"ను నిర్మిస్తున్టన్లు తెలుస్తోంది. ఇక ఈ "ది కామెల్లియాస్" ప్రాజెక్ట్‌లోని ఫ్లాట్లలో ఇంటీరియర్స్, ఇతర విలాసవంతమైన సౌకర్యాలు ఉంటాయని చెబుతున్నారు.

డీఎల్‌ఎఫ్‌ కంపెనీకి చెందిన "ది కామెల్లియాస్‌"లోని ఫ్లాట్‌లో 72 అడుగుల గాజుతో నిర్మించిన బాల్కనీ ఉంటుంది. ఇది రెండు భాగాలుగా పార్టీషన్ చేసి ఉంటుంది. అందులో ఒకటి ఇంటికి వచ్చిన అతిథుల కోసం.. మరొకటి ఆ ఫ్లాట్‌ ఓనర్ల కోసం నిర్మించారు. ఈ బాల్కనీలో డైనింగ్ ఏరియా, ఫార్మల్ సీటింగ్, ఫ్యామిలీ మీటింగ్స్ కోసం ప్రత్యేక ఏర్పాట్లు చేశారు. ఇక ఆ బాల్కనీలో నుంచి చూస్తే బయట ఉన్న స్విమ్మింగ్ పూల్, పచ్చని చెట్లు కనిపించేలా ఉన్నాయి.

ఇక ఆ ఫ్లాట్లలోని ఇంటీరియర్ డిజైన్‌ చాలా సింపుల్‌గా ఉంటుంది. క్లాసీ, స్పెషల్ ఫర్నిషింగ్‌ను ఉపయోగించారు. డీఎల్‌ఎఫ్‌కు చెందిన ఐకానిక్ ప్రాజెక్ట్‌లు "ది అరాలియాస్", "ది మాగ్నోలియాస్" లాగానే ఈ "ది కామెల్లియాస్" ప్రాజెక్ట్ కూడా ఢిల్లీ-ఎన్‌సీఆర్‌ ప్రాంతంలో అల్ట్రా-లగ్జరీ లివింగ్ కోసం కొత్త బెంచ్‌మార్క్‌ను సెట్ చేసింది. ఇదే కాకుండా "ది కామెల్లియాస్‌"కు మించిన మరో పెద్ద ప్రాజెక్ట్‌ను త్వరలో ప్రారంభించేందుకు డీఎల్‌ఎఫ్‌ సన్నాహాలు చేస్తోందని తెలుస్తోంది.

డీఎల్‌ఎఫ్‌ దహ్లియాస్‌ పేరుతో నిర్మించనున్న ఈ అల్ట్రా లగ్జరీ ప్రాజెక్ట్ ఢిల్లీలోని గోల్ఫ్‌కోర్స్ రోడ్, గురుగ్రామ్‌లో ఉండనుంది. ఇక అక్కడ సగటున ఒక అపార్ట్‌మెంట్‌కు దాదాపు రూ.100 కోట్లు ఖర్చు కానున్నట్లు తెలుస్తోంది. ఈ ప్రాజెక్ట్ మొత్తం వ్యయం రూ.34 వేల కోట్లు అని అంచనా వేస్తున్నారు. ఇందులో 9500 చదరపు అడుగుల నుంచి 16 వేల చదరపు అడుగుల వరకు ఫ్లాట్లు ఉంటాయి. దహ్లియాస్‌లో 2 లక్షల చదరపు అడుగుల క్లబ్‌హౌస్ ఏర్పాటు చేయనున్నారు.

అయితే ఈ "ది కామెలియాస్" ప్రాజెక్టు 2014లోనే ప్రారంభం అయింది. ఆ సమయంలో చదరపు అడుగు ధర రూ.22500 ఉండగా.. 10 ఏళ్ల తర్వాత అక్కడ ఇప్పుడు చదరపు అడుగు ధర రూ.85 వేలకు పైగానే పలుకుతోంది. అంటే గత 10 ఏళ్లలో వాటి ధరలు 4 రెట్లు పెరిగాయి. ఈ క్రమంలోనే గతంలో దాదాపు రూ.25 నుంచి రూ.30 కోట్లకు విక్రయించిన ఈ ఫ్లాట్ల ధరలు ప్రస్తుతం రూ.100 కోట్లకు చేరుకోవడం గమనార్హం. ఢిల్లీ, గురుగ్రామ్‌లలోని అత్యంత ఖరీదైన ప్రాంతాల మధ్య ధరల వ్యత్యాసం ప్రస్తుతం తగ్గుతోందని రియల్ ఎస్టేట్ విశ్లేషకులు చెబుతున్నారు.