కీలక దశకు సిరియా అంతర్యుద్దం.. రెబల్స్ స్వాధీనంలోకి రాజధాని

సిరియా అంతర్యుద్దం కీలక దశకు చేరుకుంది. రాజధాని డమాస్కస్ నగర శివారులను తిరుగుబాటు దళాలు ఆక్రమించుకున్నాయి. ఈ విషయాన్ని ప్రభుత్వ మీడియా.. ఇటు రెబల్స్ దళాలు కూడా ధ్రువీకరించాయి. రాజధానిని తమ దళాలు చుట్టుముట్టి స్వాధీనం చేసుకునేందుకు సిద్ధమైనట్టు రెబల్స్ కమాండర్ హసన్ అబ్దేల్ ఘనీ ప్రకటించారు. ఇక, 2018 తర్వాత సిరియా రాజధాని సమీపంలోకి రెబల్స్ చేరుకోవడం ఇదే మొదటిసారి. పదమూడేళ్ల కిందట సిరియాలో అంతర్యుద్దం మొదలైంది. అప్పటి నుంచి బసర్ అల్ అసద్ సారథ్యంలోని ప్రభుత్వం దళాలు, రెబల్స్ మధ్య యుద్ధం కొనసాగుతోంది.

మరోవైపు, అధ్యక్షఉడు అసద్‌ దేశం విడిచి రష్యాకు పారిపోయినట్టు ప్రచారం జరుగుతోంది. అయితే, ఈ వార్తలను ప్రభుత్వ దళాలు ఖండించాయి. తమ నేత డమాస్కస్ నుంచి రాజ్యాంగ, జాతీయపరమైన విధులు కొనసాగిస్తున్నారని సిరియా రక్షణ మంత్రి అబుల్ మహ్మద్ అల్ జొలానీ ప్రకటించారు. రాజధాని డమాస్కస్‌లోని అన్ని ప్రాంతాల్లో ప్రభుత్వ దళాలు ఉన్నాయని, వెనక్కి తగ్గినట్టు జరుగుతోన్న ప్రచారంలో నిజం లేదని ఖండించారు.

ఉత్తర సిరియాపై హయాత్‌ తహరీర్‌ అల్‌-షామ్‌ నేతృత్వంలోని తిరుగుబాటు దళాలు పట్టుబిగిస్తుండగా... దక్షిణ సిరియాలోనూ అసద్‌ పట్ల వ్యతిరేకత మొదలైంది. కీలక నగరం దారాను కూడా రెబల్స్ ఆక్రమించారు. 2011లో అసద్‌కు వ్యతిరేకంగా ఈ నగరం నుంచి మొదలైన తిరుగుబాటే క్రమంగా అంతర్యుద్ధానికి దారితీసింది. దారాలోని 90శాతం భూభాగం స్థానిక తిరుగుబాటుదారుల చేతుల్లోకి వెళ్లిపోయింది. అలాగే, దారాకు 50 కిలోమీటర్ల దూరంలోని సువైదా నుంచి కూడా ప్రభుత్వ దళాలు పారిపోయినట్టు సమాచారం. ఈ ప్రాంతాన్ని ఆక్రమించిన మైనారిటీ డ్రూజ్‌ తెగ మిలిటెంట్లు రాజధాని డమాస్కస్‌ దిశగా సాగుతున్నట్లు వార్తలొస్తున్నాయి. అటు,

అంతర్యుద్ధంలో అసద్‌ పైచేయి సాధించడంలో కీలక పాత్ర పోషించిన రష్యా, ఇరాన్‌ల సాయం.. ప్రస్తుతం అంతంతమాత్రంగానే లభిస్తోంది. పరిమిత స్థాయిలోనే రష్యా వైమానిక దాడులు నిర్వహించడంతో తిరుగుబాటుదారులపై అంతగా ప్రభావం చూపడం లేదు. ఇరాన్‌ కూడా అదే దారిలో వెళ్తోంది. ఈ నేపథ్యంలో అసద్ తన పదవిని కాపాడుకోవడం కష్టమేనని విశ్లేషకులు పేర్కొంటున్నారు.

హయాత్‌ తహరీర్‌ అల్‌-షామ్‌ అనేది సిరియాలో అల్‌ఖైదా విభాగం. దీనిని పశ్చిమ దేశాలు ఉగ్రవాద సంస్థల జాబితాలో చేర్చారు. ఇటీవలి సంవత్సరాలలో ఉగ్రవాద సంస్థ ఇమేజ్ నుంచి బయటపడేందుకు ప్రయత్నించింది. వీరు మరింత భూభాగాన్ని స్వాధీనం చేసుకున్నందున.. తమ నియంత్రణలో ఉన్న ప్రాంతాలలో నివసిస్తున్న మైనారిటీ సమూహాలకు భరోసా ఇవ్వడానికి ప్రయత్నించారు. ‘అన్ని వర్గాలకు భరోసా కల్పించాలని మేము కోరుతున్నాం... మతవాదం, దౌర్జన్యాల యుగం శాశ్వతంగా పోయింది’ అని అబ్దెల్ ఘనీ అన్నారు. మరోవైపు, గత వారం నుంచి ఉద్ధృతమైన తిరుగుబాటులో 111 మంది పౌరుల సహా 826 ప్రాణాలు కోల్పోయారని, 3.5 లక్షల మంది నిరాశ్రయులయ్యారని ఐక్యరాజ్యసమితి ప్రకటించింది.