మ్యూచువల్ ఫండ్స్‌లో మరో 3 కొత్త పథకాలు.. రేపటి నుంచే
business | Suryaa Desk | Published : Sun, Dec 08, 2024, 08:22 PM
ఈక్విటీల్లో పెట్టుబడులు పెట్టే వారి సంఖ్య ఇటీవల గణనీయంగా పెరిగింది. మ్యూచువల్ ఫండ్స్‌లో హైరిటర్న్స్ అందిస్తున్న నేపథ్యంలో ఎక్కువగా యువత ఇటువైపుగా మళ్లుతున్నారు. ఈజీగా పెట్టుబడులు పెట్టే అవకాశాలు రావడంతో మార్కెట్లపై సరైన అవగాహన లేని వారు సైతం మ్యూచువల్ ఫండ్స్‌లో పెట్టుబడులు పెట్టగలుగుతున్నారు. అందులోనూ సిస్టమాటిక్ ఇన్వెస్ట్‌మెంట్ ప్లాన్ ద్వారా ఎక్కువగా ఇన్వెస్ట్ చేస్తున్నారు. దీంతో నెల నెల కోట్లాది రూపాయలు ఈక్విటీల్లోకి వస్తున్నాయి. దీంతో అసెట్ మేనేజ్మెంట్ సంస్థలు ఎప్పటికప్పుడు కొత్త కొత్త పథకాలను అందుబాటులోకి తెస్తున్నాయి. డిసెంబర్ రెండో వారంలోనూ మరో 3 కొత్త ఫండ్ ఆఫర్లు ఉన్నాయి. ఆ వివరాలు ఓసారి తెలుసుకుందాం.
ఈ వారం అందుబాటులోకి వస్తున్న న్యూ ఫండ్ ఆఫర్ స్కీమ్స్‌లో మూడు వివిధ కేటగిరీల్లో వస్తున్నాయి. ఇందులో ఒక టార్గెట్ మాచ్యూరిటీ ఫండ్, ఒక ఇండెక్స్ ఫండ్, ఒక ఈటీఎఫ్ ఫండ్ ఉన్నాయి. టార్గెట్ మెచ్యూరిటీ ఫండ్ కేటగిరీలో ఆదిత్య బిర్లా ఎస్ఎల్ క్రిసిల్ ఐబీఎక్స్ ఫైనాన్షియల్ సర్వీసెస్ 3 టూ 6 మంత్స్ డెట్ ఇండెక్స్ ఫండ్ ఉంది. ఈ కొత్త ఫండ్ ఆఫర్ సబ్‌స్క్రిప్షన్ డిసెంబర్ 9వ తేదీన ప్రారంభమవుతుంది. డిసెంబర్ 16వ తేదీ వరకు అందుబాటులో ఉంటుంది.
ఐసీఐసీఐ నుంచి..
ఇక ఇండెక్స్ ఫండ్స్ కేటగిరీలో ఐసీఐసీఐ మ్యూచువల్ ఫండ్స్ నుంచి ఒక స్కీమ్ ఉంది. అదే ఐసీఐసీఐ ప్రొడెన్షియల్ నిఫ్టీ 500 ఇండెక్స్ ఫండ్ ఉంది. ఈ స్కీమ్ సబ్‌స్క్రిప్షన్ డిసెంబర్ 10వ తేదీన మొదలవుతోంది. డిసెంబర్ 17వ తేదీ వరకు అందుబాటులో ఉంటుంది. ఇక మూడో కేటగిరి ఈటీఎఫ్‌లో ఎడెల్వైస్ బీఎస్ఈ క్యాపిటల్ మార్కెట్స్ అండ్ ఇన్సూరెన్స్ ఈటీఎఫఅ ఫండ్ ఉంది. ఈ స్కీమ్ సబ్‌స్క్రిప్షన్ డిసెంబర్ 10వ తేదీన మొదలవుతుంది. సబ్‌స్క్రైబ్ చేసుకునేందుకు డిసెంబర్ 24 వరకు అవకాశం ఉంటుంది.
అయితే, ఈ కథనం కేవలం సమాచారం కోసమే. పెట్టుబడి పెట్టాలని ప్రోత్సహించేందుకు కాదు. అలాగే మీ రిస్క్ తీసుకునే సామర్థ్యం, ఆర్థిక లక్ష్యాలు, పెట్టుబడి పెట్టగల సామర్థ్యం వంటివి పరిగణనలోకి తీసుకుని ఇన్వెస్ట్ చేయాలి. మ్యూచువల్ ఫండ్స్‌లోనూ రిస్క్ ఎక్కువగా ఉంటుంది.
|
|