మహిళల కోసం కేంద్రం స్కీమ్.. కనీసం రూ. 1000 చాలు.. వడ్డీతోనే రూ. 32 వేలు

2023 బడ్జెట్ సమయంలో ప్రధాని నరేంద్ర మోదీ నేతృత్వంలోని కేంద్ర ప్రభుత్వం.. మహిళల కోసం ప్రత్యేకంగా మహిళా సమ్మాన్ సేవింగ్స్ సర్టిఫికెట్ పథకం ప్రకటించిన సంగతి తెలిసిందే. కొద్ది రోజుల్లోనే అది లాంఛ్ అయింది. మహిళలకు ఆర్థిక సాధికారత కల్పించాలన్న ఉద్దేశంతోనే కేంద్రం ఈ స్కీమ్ లాంఛ్ చేసింది. దీని కింద వార్షిక ప్రాతిపదికన 7.50 శాతం స్థిర వడ్డీ రేటు అందిస్తోంది. ఈ పథకం ప్రవేశపెట్టిన వెంటనే చాలా మంది ఇందులో చేరేందుకు ఆసక్తి చూపించారు. ఇక ఇప్పటివరకు ఈ స్కీం కింద ఏకంగా 43,30,121 లక్షల అకౌంట్లు ఓపెన్ అయ్యాయి. 2024, అక్టోబర్ 10 వరకు ఇంత మంది చేరినట్లు 2024, డిసెంబర్ 3న రాజ్యసభలో ఒక ప్రశ్నకు లిఖితపూర్వక సమాధానంగా ఇలా చెప్పారు కేంద్ర ఆర్థిక శాఖ సహాయ మంత్రి శ్రీ పంకజ్ చౌదరీ.

ఈ పథకంలో మహిళలతో పాటుగా మైనర్లు కూడా చేరేందుకు అవకాశం ఉంటుంది. మైనర్ పేరిట గార్డియెన్ ఖాతా తెరవొచ్చు. అయితే.. 2023లో ఈ స్కీమ్ తెచ్చినప్పుడే రెండేళ్ల వ్యవధితో తీసుకొచ్చింది కేంద్రం. అంటే.. 2025 వరకు మాత్రమే అవకాశం ఉంటుందన్నమాట. అంటే 2025, మార్చి 31 లాస్ట్ డేట్. ఆలోపు ఈ స్కీంలో చేరాలనుకుంటే చేరొచ్చు. కనీసం రూ. 1000 పెట్టుబడితో ఇందులో అకౌంట్ ఓపెన్ చేయొచ్చు. పరిమితి రెండు సంవత్సరాలుగా ఉంటుంది. గరిష్టంగా రూ. 2 లక్షల వరకు డిపాజిట్ చేసేందుకు అవకాశం ఉంటుంది. వార్షిక ప్రాతిపదికన వడ్డీ రేటు 7.50 శాతంగా ఉంది. ఇక ప్రతి త్రైమాసికానికి ఒకసారి లెక్కించి.. అకౌంట్లో వడ్డీ జమ చేస్తారు.

కొన్ని ప్రత్యేక సందర్భాల్లో మాత్రమే గడువు కంటే ముందు అంటే రెండేళ్ల కంటే ముందుగా.. నగదు విత్‌డ్రా చేసుకునేందుకు అవకాశం ఉంటుంది. అకౌంట్ హోల్డర్ చనిపోయినప్పుడు లేదా ప్రాణాంతక వ్యాధుల బారిన పడటం, గార్డియెన్ మరణించిన సందర్భంలో 6 నెలలు ముగిసినా.. అకౌంట్ క్లోజ్ చేయొచ్చు. ఇక్కడ వడ్డీ రేటులో 2 శాతం కోత పడుతుంది.

బ్యాంకులు లేదా పోస్టాఫీసుల్లో ఈ అకౌంట్ తెరవొచ్చు. అకౌంట్ ఓపెనింగ్ ఫారంతో పాటుగా.. కేవైసీ డాక్యుమెంట్ (ఆధార్, పాన్ కార్డు) సబ్మిట్ చేయాల్సి ఉంటుంది. కొత్త అకౌంట్ హోల్డర్‌కు కేవైసీ ఫారం కావాలి. డిపాజిట్ నగదుతో పాటు పే- ఇన్- స్లిప్ కావాలి. అన్ని బ్యాంకుల్లో ఇందులో చేరేందుకు అవకాశం లేదు. బ్యాంక్ ఆఫ్ బరోడా, కెనరా బ్యాంకు, బ్యాంక్ ఆఫ్ ఇండియా, పంజాబ్ నేషనల్ బ్యాంకు, యూనియన్ బ్యాంక్ ఆఫ్ ఇండియా వంటివి అవకాశం కల్పిస్తున్నాయి. ఇక గరిష్ట మొత్తం రూ. 2 లక్షలు డిపాజిట్ చేసినట్లయితే.. రెండేళ్లకు 7.50 శాతం చొప్పున రూ. 32,044 వడ్డీ వస్తుంది.