పవన్‌ను చంపేస్తానని బెదిరించిన వ్యక్తి అరెస్ట్.. ఎవరీ మల్లికార్జున్

ఆంధ్రప్రదేశ్ డిప్యూటీ సీఎం పవన్ కళ్యాణ్‌‌ను చంపేస్తామంటూ బెదిరించిన వ్యక్తిని అరెస్ట్ చేశారు పోలీసులు. పవన్ పేషీకి బెదిరింపు కాల్స్ చేసింది తిరువూరుకి చెందిన నక్కా మల్లిఖార్జునరావుగా గుర్తించారు. అతడు బందరు రోడ్డు ఇందిరాగాంధీ స్టేడియం దగ్గర నుంచి ఈ బెదిరింపు కాల్ చేసినట్లు గుర్తించారు. మల్లికార్జురావును పోలీసులు ఇవాళ అదుపులోకి తీసుకుని ప్రశ్నిస్తున్నారు.. అసలు పవన్ కళ్యాణ్‌ను బెదిరిస్తూ ఎందుకు కాల్ చేశారు.. మల్లికార్జున్‌తో ఎవరైనా కాల్ చేయించారా అనే కోణంలో పోలీసులు దర్యాప్తు ప్రారంభించారు.

పవన్ కళ్యాణ్ పేషీకి కాల్స్‌ వచ్చిన నంబరు ఆధారంగా పోలీసులు ఆరా తీస్తే మల్లికార్జునరావు పేరుతో ఉంది. ఆయన ఎన్టీఆర్ జిల్లా తిరువూరులోని వైద్య దంపతులకు బంధువని తెలుస్తోంది. అతడు వ్యసనాలకు బానిస కావడంతో.. భార్య కూడా విడిచి పెట్టినట్లు చెబుతున్నారు. అతడు ప్రస్తుతం నెల్లూరు జిల్లాలో ఒంటరిగా ఉంటుండగా.. తరచూ తిరువూరు వచ్చి బావమరిది దగ్గర తాగుడుకు డబ్బులు తీసుకుని వెళ్తుండేవాడని ప్రాథమికంగా పోలీసుల విచారణలో తేలింది. అతడి మానసిక స్థితి సరిగా లేదంటున్నారు.. తిరువూరులో నివాసం ఉండడని, నెల్లూరు జిల్లాలోనే ఉంటాడని తెలిసింది. అతడిపై గతంలో విశాఖపట్నంలో కేసు నమోదైనట్లు తెలుస్తోంది.

పవన్ కళ్యాణ్ పేషీకి ఈ బెదిరింపు కాల్స్ వచ్చాయి.. ఆయన్ను చంపేస్తామంటూ పేషీకి ఫోన్‌ కాల్స్‌ చేయడంతో పాటు అభ్యంతకరంగా మేసేజ్‌లు కూడా వచ్చాయి. ఆదివారం రాత్రి, సోమవారం ఉదయం కూడా పదేపదే కాల్స్‌ రావడం కలకలం రేపింది. వరుసగా బెదిరింపు కాల్స్, మెసేజ్‌లు రావడంతో పేషీలోని సిబ్బంది పవన్‌ కళ్యాణ్‌ దృష్టికి తీసుకెళ్లారు. ఈ ఫోన్ కాల్స్ విషయాన్ని పోలీసులు సీరియస్‌గా తీసుకుని దర్యాప్తు చేశారు.. బెదరించిన నంబర్‌కు కాల్ చేయగా.. ఫోన్‌ స్విచాఫ్ చేయడంతో ఆచూకీ దొరకలేదు. ఆ వెంటనే మొబైల్ నంబర్ ఆధారంగా ఆరా తీస్తే.. పవన్ కళ్యాణ్ పేషీకి కాల్స్ చేసింది మల్లికార్జునరావుగా తేలింది. ఈ కాల్స్ విజయవాడలోని ఇందిరాగాంధీ మున్సిపల్‌ స్టేడియం దగ్గర టవర్‌ నుంచి వచ్చినట్లు గుర్తించారు. విజయవాడ పోలీస్ కమిషనర్‌ రాజశేఖర్‌బాబు టాస్క్‌ఫోర్స్, స్పెషల్‌ బ్రాంచి, లా అండ్‌ ఆర్డర్‌ విభాగాలకు చెందిన పోలీసులతో నాలుగు టీమ్‌లను ఏర్పాటు చేసి దర్యాప్తు ప్రారంభించారు.. ఈ క్రమంలో అతడ్ని పోలీసులు ఇవాళ అదుపులోకి తీసుకున్నారు.

మల్లికార్జురావు గురించి ఆరా తీస్తే మరికొన్ని కీలక విషయాలు తెలిశాయి. గతంలో హోంమంత్రి అనితకు కూడా ఇదే నంబరు నుంచి రెండుసార్లు కాల్స్ చేసినట్లు తేలింది. కాల్ చేసిన వ్యక్తి మాట్లాడే తీరు తేడాగా ఉండడంతో ఆమె కాల్‌ కట్‌ చేసినట్లు తెలుస్తోంది. ఈ మేరకు అనిత కూడా డిప్యూటీ సీఎం పేషీకి బెదిరింపు కాల్స్‌పై స్పందించారు. డీజీపీ ద్వారకా తిరుమలరావుతో ఫోన్‌లో మాట్లాడి.. తనకు కూడా ఆ నంబరు నుంచి కాల్స్‌ వచ్చాయని చెప్పినట్లు సమాచారం. మొత్తానికి నిందితుడు దొరకడంతో పోలీసులు కాస్త ఊపిరి పీల్చుకున్నారు.