కువైట్ నుంచి వచ్చి హత్య చేసి వెళ్లాడు

కనుపాప కంటతడి పెడితే తట్టుకోలేకపోయాడు.. చిట్టితల్లి తల్లడిల్లిపోతే తండ్రి గుండె భగ్గుమంది. అల్లారుముద్దుగా చూసుకుంటున్న కూతురి పడిన బాధను చూసి రగిలిపోయాడు.. నేరుగా కువైట్ నుంచి వచ్చి పగ తీర్చుకుని వెళ్లిపోయాడు. అన్నమయ్య జిల్లాలో జరిగిన ఈ ఘటన సంచలనంగా మారింది. ఓబులవారిపల్లె మండలం కొత్తమంగంపేటలో గత శనివారం (డిసెంబర్ 7) రోజున దివ్యాంగుడైన గుట్ట ఆంజనేయులుదారుణ హత్యకు గురయ్యాడు. సమాచారం అందుకున్న పోలీసులు ఘటనా స్థలాన్ని పరిశీలించి.. అనుమానాస్పద మృతి కేసుగా నమోదు చేసి దర్యాప్తు చేస్తున్నారు. ఈ క్రమంలో అదే ఊరికి చెందిన ఆంజనేయప్రసాద్ ఓ వీడియోను సోషల్ మీడియాలో పోస్ట్ చేశాడు. తన కుమార్తె పట్ల అసభ్యకరంగా ప్రవర్తించడంతో తానే కువైట్‌ నుంచి వచ్చి మరీ ఆంజనేయుల్ని హత్య చేసి వెళ్లానని వీడియోను పోస్టు చేయడం సంచలనం రేపింది.

కొత్త మంగంపేటకు చెందిన భార్యాభర్తలు చంద్రకళ, ఆంజనేయప్రసాద్‌ కువైట్‌లో ఉంటున్నారు. ఈ దంపతులు తమ కుమార్తెను ఊళ్లో ఉంటున్న చెల్లెలు లక్ష్మి, వెంకటరమణ దంపతుల దగ్గరు ఉంచారు. ఈ క్రమంలో వెంకటరమణ తండ్రి ఆంజనేయులు మనవరాలి వరసయ్యే బాలిక పట్ల అసభ్యకరంగా ప్రవర్తించాడు. వెంటనే బాలిక ఈ విషయాన్ని తల్లి చంద్రకళకు కాల్ చేసి చెప్పింది. చంద్రకళ తన చెల్లెలు లక్ష్మికి ఫోన్ చేసి అడిగింది.. ఆమె సరిగా స్పందించకపోవడంతో ఆందోళన మొదలైంది. వెంటనే చంద్రకళ కువైట్ నుంచి బయల్దేరి సొంత ఊరు ఓబులవారిపల్లెకు వచ్చింది.

ఆంజనేయులు తన కుమార్తెతో అసభ్యకరంగా ప్రవర్తించాడని ఓబులవారిపల్లె పోలీసుస్టేషన్‌లో చంద్రకళ ఫిర్యాదు చేసింది. వెంటనే పోలీసులు నిందితుడు ఆంజనేయులును పిలిపించి మందలించి స్టేషన్ నుంచం పంపించారు. చంద్రకళ ఈ విషయాన్ని భర్త ఆంజనేయ ప్రసాద్‌కు చెప్పింది. పోలీసులకు ఫిర్యాదు చేసినా సరిగా పట్టించుకోలేదని ఆంజనేయప్రసాద్ ఆవేదనకు గురయ్యాడు. నేరుగా కువైట్‌ నుంచి వచ్చి.. శనివారం తెల్లవారుజామున ఇంటి ఆవరణలో నిద్రిస్తున్న ఆంజనేయులు తలపై ఇనుప రాడ్డుతో కొట్టి చంపి అక్కడి నుంచి వెళ్లపోయాడు. ఆంజనేయ ప్రసాద్ తిరిగి కువైట్‌ వెళ్లిపోయాడు.. ఈ హత్య విషయాన్ని వివరిస్తూ సోషల్ మీడియాలో వీడియో పోస్టు చేశాడు. ఆడబిడ్డ తండ్రిగా తాను చేసింది న్యాయమేనని.. పోలీసులకు లొంగిపోతానని కూడా చెప్పడం గమనార్హం. చట్ట ప్రకారం న్యాయం జరగకే హత్య చేశానని చెప్పాడు.

ఈ తప్పుపై తన మరదలు లక్ష్మి, వాళ్ల భర్త వెంకట రమణలు ఆంజనేయుల్ని ప్రశ్నించలేదన్నారు. ఈ విషయాన్ని బయటకు చెప్పొద్దని బాలికను కూడా బెదిరించినట్లు ఆంజనేయప్రసాద్ చెప్పుకొచ్చారు. పోలీసులు సరిగా స్పందించకపోవడంతో తాను ఆంజనేయుల్ని హత్య చేసినట్లు చెప్పాడు.. పైగా పోలీసులు తన భార్యపై కేసు పెడతామని బెదిరించినట్లు వీడియోలో వివరించాడు. తాను చట్టపరంగా ఫిర్యాదు చేసినా పోలీసులు పట్టించుకోలేదని.. డబ్బులు తీసుకుని ఈ కేసును పట్టించుకోలేదని కన్నీటిపర్యంతం అయ్యారు. తనకు బతకాలని లేదని.. చనిపోవాలని ఉందన్నారు.