ఏపీలో వారందరికి పింఛన్‌లు కట్.. సీఎం చంద్రబాబు సీరియస్, 3 నెలల్లోనే!

ఆంధ్రప్రదేశ్ ప్రభుత్వం కీలక నిర్ణయం తీసుకుంది. రాష్ట్రవ్యాప్తంగా పింఛన్లు తీసుకుంటున్నవారిలో అనర్హులు ఉన్నట్లు తేల్చింది. రెండు రోజుల పాటూ నిర్వహించిన తనిఖీల్లో సంచలన విషయాలు బయటపడినట్లు అధికారులు తెలిపారు. రాష్ట్రవ్యాప్తంగా ప్రతి 10వేల పింఛన్‌లలో కనీసం 500మంది అనర్హులు ఉన్నట్లు తేలింది. ఈ అంశాన్ని సీరియస్‌గా తీసుకున్న ముఖ్యమంత్రి చంద్రబాబు కీలక నిర్ణయం తీసుకున్నారు. వచ్చే మూడు నెలల పాటూ ప్రతి పింఛన్‌ను తనిఖీ చేయాలి జిల్లా కలెక్టర్లను ఆదేశించారు. రాష్ట్రవ్యాప్తంగా పింఛన్‌లలో అనర్హులు ఉంటే.. వెంటనే వారి పింఛన్‌ను కట్ చేయాలని ఆదేశించారు చంద్రబాబు. ఒకవేళ అధికారులు కనుక నిర్లక్ష్యం వహిస్తే వారిపైనా చర్యలు తీసుకుంటామన్నారు.

అంతేకాదు చంద్రబాబు అనర్హులు పింఛన్లు తీసుకోవడంపై సీరియస్‌గా స్పందించారు. అనర్హులు ఉన్నట్లు తేలితే వారిపై చర్యలు తీసుకోవాలని.. వారి నుంచి రెవెన్యూ రికవరీ చేయాలని.. వారిపై కేసులు నమోదు చేయాలని ఆదేశించారు. అలాగే దివ్యాంగుల పింఛన్లకు సంబంధించి చాలా తప్పులు జరిగాయన్నారు.. కొందరు అర్హత లేకపోయినా పింఛన్లు తీసుకున్నారని.. వారందరిపై చర్యలు తీసుకోవాలన్నారు. సదరం సర్టిఫికేట్ల విషయంలో అధికారులు అప్రమత్తంగా ఉండాలని.. అర్హత లేకపోయినా కొందరు డాక్టర్లు సర్టిఫికేట్లు జారీ చేస్తున్నట్లు మంత్రి అచ్చెన్నాయుడు ప్రస్తావించగా.. అలాంటి డాక్టర్లపైనా చర్యలు తీసుకోవాలని చంద్రబాబు ఆదేశించారు.

రాష్ట్ర వ్యాప్తంగా పింఛన్ల తనిఖీ కోసం చేపట్టిన పైలట్ సర్వేలో నకిలీ పింఛన్లు గుర్తించారని.. రాష్ట్ర వ్యాప్తంగా 6లక్షల మంది అనర్హులకు పింఛన్లు చెల్లిస్తున్నట్లు మంత్రి నాదెండ్ల మనోహర్‌ ముఖ్యమంత్రికి వివరించారు. ముఖ్యమంత్రి మూడునెలల్లో అనర్హులను గుర్తించే ప్రక్రియ పూర్తి చేయాలని కలెక్టర్లకు సూచించారు.. పింఛన్ల తనికీ పూర్తయ్యాక తాను మరోసారి కనీసం 5శాతం పెన్షన్లను ర్యాండమ్‌‌గా చెక్ చేస్తానని.. అందులో కూడా అనర్హులు బయటపడితే కలెక్టర్లు బాధ్యత వహించాల్సి ఉంటుందన్నారు.

ప్రతి సచివాలయం పరిధిలోనూ దివ్యాంగుల కోటాలో అనర్హులు పింఛన్లు పొందుతున్నట్లు గుర్తించారు అధికారులు. ఇదే విషయాన్ని పలువురు కలెక్టర్లు ముఖ్యమంత్రి చంద్రబాబు దగ్గర ప్రస్తావించారు. అలాగే తల్లిదండ్రులు చనిపోయి చిన్నారులు ఉంటే వారికీ పింఛన్ ఇవ్వాలని ముఖ్యమంత్రి సూచించారు. అలాగే సదరం ధృవీకరణ పత్రాలను అర్హులకే దక్కేలా చూడాలని.. దీని కోసం కమిటీల పర్యవేక్షణలో సర్టిఫికెట్లను జారీ చేసేలా చూడాలన్నారు. ప్రభుత్వం ఈ మూడునెలల్లో పింఛన్లను తనిఖీ చేయనుంది.. ముఖ్యంగా సదరం సర్టిఫికేట్ల విషయంలో కలెక్టర్లు అధ్యయనం చేసి వచ్చే కలెక్టర్ల సమావేశం సమయానికి విధి విధానాలను రూపొందిస్తామన్నారు.

రాష్ట్రవ్యాప్తంగా దివ్యాంగుల కేటగిరీలో భారీగా అనర్హులు పింఛన్లు పొందుతున్నట్టు సెర్ప్‌ గుర్తించినట్లు తెలుస్తోంది. అలాగే వితంతువుల విభాగంలోనూ ఎక్కువగానే బోగస్‌ పింఛన్లు ఉన్నట్లు తేల్చారు. రెండు రోజుల పాటూ నిర్వహించిన తనిఖీల్లో ఈ విషయం బయటపడింది. ఏ విభాగంలో ఎక్కువగా అనర్హులు ఉన్నారో గుర్తించేపనిలో ఉన్నారు. చాలామంది నకిలీ సదరం ధ్రువపత్రాలతో దివ్యాంగుల పింఛన్లు పొందారని గుర్తించారు అధికారులు. దివ్యాంగుల పింఛన్ల కోసం వైద్యులపై ఒత్తిడి తెచ్చి వైకల్య శాతం ఎక్కువ నమోదు చేయించి లబ్ధి పొందినట్లు కొన్ని చోట్ల గుర్తించారు. ఇలాంటి అనర్హులను తప్పించి అర్హతలుండి దక్కనివారికి పింఛన్లు ఇవ్వాలని ప్రభుత్వం నిర్ణయించింది. ప్రభుత్వం ఓవైపు అనర్హులపై వేటు వేస్తూనే.. మరోవైపు అర్హత ఉండి పింఛన్ రానివారికి న్యాయం చేయనుంది ప్రభుత్వం. మొత్తానికి ప్రభుత్వం పింఛన్ల విషయంలో సీరియస్‌గా ఉంది.