మహిళలకు గుడ్‌న్యూస్.. నెలకు రూ.2100, రేపట్నుంచే దరఖాస్తులు

ఢిల్లీ అసెంబ్లీ ఎన్నికల ప్రచారంలో అధికార ఆమ్ ఆద్మీ పార్టీ సర్వశక్తులు ఒడ్డుతోంది. 2013 నుంచి ఆ రాష్ట్రంలో అధికారంలో ఉన్న ఆప్.. మరోసారి ఢిల్లీ పీఠాన్ని వశం చేసుకోవాలని అన్ని రకాల ప్రయత్నాలకు తెరలేపుతోంది. ఒకవైపు.. ఢిల్లీలో తాము చేసిన అభివృద్ధి, సంక్షేమ పథకాలను ప్రచారం చేస్తూనే.. మళ్లీ అధికారంలోకి వస్తే ఏం చేస్తాము అనేది కూడా ఓటర్లకు వివరిస్తోంది. ఈ నేపథ్యంలోనే తాజాగా ఢిల్లీ మహిళలకు అరవింద్ కేజ్రీవాల్ శుభవార్త అందించారు. నెలకు రూ.2100 ఆర్థిక సహాయం అందించే పథకానికి రేపట్నుంచే దరఖాస్తులు స్వీకరిస్తామని చెప్పారు.

ఢిల్లీ అసెంబ్లీ ఎన్నికల వేళ.. అధికారంలో ఉన్న ఆమ్ ఆద్మీ పార్టీ ప్రజలపై వరాల జల్లు కురిపిస్తోంది. ఇప్పటికే రెండు విడతలుగా ఎన్నికల్లో పోటీ చేసే అభ్యర్థుల జాబితాను విడుదల చేసి.. ప్రచారంలో దూసుకెళ్తున్న ఆప్.. ఇక ఓటర్లను ఆకట్టుకునే అన్ని ప్రయత్నాలు చేస్తోంది. ఈ క్రమంలోనే ఇటీవలె ఆటో డ్రైవర్లకు 5 గ్యారెంటీలు ప్రకటించిన అరవింద్ కేజ్రీవాల్.. తాజాగా మహిళలకు గుడ్‌న్యూస్ చెప్పారు. ఢిల్లీ అసెంబ్లీ ఎన్నికల్లో ఆప్ గెలిచి మళ్లీ అధికారంలోకి వస్తే ఢిల్లీ మహిళలకు నెలకు రూ.2100 ఆర్థిక సాయం చేస్తామని ప్రకటించారు. ఈ పథకానికి సంబంధించిన దరఖాస్తులు రేపటి(శుక్రవారం) నుంచే ప్రారంభం అవుతాయని అరవింద్ కేజ్రీవాల్ స్పష్టం చేశారు.

ఢిల్లీ అసెంబ్లీ ఎన్నికల ప్రచారంలో భాగంగా సంక్షేమ పథకాలే అజెండాగా ఆమ్‌ ఆద్మీ పార్టీ దూసుకెళ్తోంది. ఇక ఆప్ కన్వీనర్‌, ఢిల్లీ మాజీ సీఎం అరవింద్‌ కేజ్రీవాల్‌ ఢిల్లీవాసులపై హామీల వర్షం కురిపిస్తున్నారు. తాజాగా మరో పథకాన్ని కేజ్రీవాల్ ప్రకటించారు. ఢిల్లీలో తాము మళ్లీ అధికారంలోకి వస్తే మహిళలకు ప్రతి నెలా రూ.2100 ఆర్థిక సాయం చేస్తామని తెలిపారు. అయితే తాను ప్రతీ మహిళకు రూ.100 ఇస్తానని హామీ ఇచ్చానని.. ఈ ప్రతిపాదనకు గురువారం ఉదయం ఢిల్లీ కేబినెట్ ఆమోద ముద్ర వేసినట్లు వెల్లడించారు.

 అయితే మరో 10-15 రోజుల్లో ఢిల్లీ అసెంబ్లీ ఎన్నికల తేదీలు ప్రకటించే అవకాశం ఉందని.. అందుకే ఈ సొమ్ము ఇప్పుడే లబ్ధిదారుల అకౌంట్లలో ట్రాన్స్‌ఫర్ చేయడం కుదరదని తెలిపారు. ఇక పెరుగుతున్న నిత్యాసవర ధరలు, ద్రవ్యోల్బణం కారణంగా నెలకు రూ.1000 సరిపోదని.. కొందరు ఢిల్లీ మహిళలు తన దృష్టికి తీసుకొచ్చారని చెప్పిన కేజ్రీవాల్.. అందుకే ఆ మొత్తాన్ని నెలకు రూ.2100కి పెంచుతూ నిర్ణయం తీసుకున్నట్లు చెప్పారు. ఇక ఈ లబ్ధిదారుల ఎంపికకు సంబంధించి దరఖాస్తులను శుక్రవారం నుంచి స్వీకరిస్తామని కేజ్రీవాల్‌ స్పష్టం చేశారు.

ఇక ఇటీవలె ఢిల్లీలోని ఆటో డ్రైవర్లకు అరవింద్ కేజ్రీవాల్ హామీల వర్షం కురిపించారు. ఆటో డ్రైవర్లకు రూ.10 లక్షల వరకు లైఫ్ ఇన్సూరెన్స్‌.. రూ.5 లక్షల వరకు యాక్సిడెంటల్ ఇన్సూరెన్స్ అందిస్తామని కేజ్రీవాల్‌ ప్రకటించారు. అంతేకాకుండా ఆటో డ్రైవర్ల కుమార్తెలకు పెళ్లిళ్లు అయితే.. వారికి రూ.1 లక్ష ఆర్థిక సాయం ఇవ్వనున్నట్లు చెప్పారు. ఆటోవాలాలకు యూనిఫాం అలవెన్స్ కింద ఏడాదికి రెండుసార్లు రూ.2500 చొప్పున ఇస్తామని ఆప్ గ్యారెంటీలు విడుదల చేసింది. ఢిల్లీ అసెంబ్లీ ఎన్నికలు వచ్చే ఏడాది ఫిబ్రవరిలో జరిగే అవకాశాలు ఉన్నాయి.