మ్యాజిక్ చేసిన ఎస్‌బీఐ స్కీమ్.. రూ.10 వేల పొదుపుతో 5 ఏళ్లలో రూ.13 లక్షలొచ్చాయ్

కొన్ని సంవత్సరాలుగా ఈక్విటీ మార్కెట్ల ఫలితాలు మెరుగ్గా ఉన్నాయి. ఈ క్రమంలో మ్యూచువల్ ఫండ్లలోకి పెట్టుబడులు పెరుగుతున్నాయి. అయితే, మ్యూచువల్ ఫండ్లలో స్మాల్, మిడ్, లార్జ్ క్యాప్ ఫండ్స్‌లో ఇన్వెస్ట్ చేసే పథకాలు ఉంటాయి. తమ ఆర్థిక లక్ష్యాలకు అనువైన, రిస్క్ సామర్థ్యాన్ని బట్టి పోర్ట్ ఫోలియోను నిర్మించుకోవాలి. ఇటీవలి కాలంలో మిడ్ క్యాప్ కేటగిరీలో పలు ఫండ్స్ మంచి ఫలితాలు అందించాయి. ఇవి మిడ్ క్యాప్ కేటగిరీ నుంచి పరిమాణంలో 100-250 మధ్య ర్యాంక్ ఉన్న షేర్లను ఎంచుకుంటాయి. అయితే మిడ్ క్యాప్ ఫండ్లలో రిస్క్ ఎక్కువగా ఉంటుంది. లార్జ్ క్యాప్ ఫండ్ల కంటే మెరుగైన రాబడిని అందించగలవు. హైరిటర్న్స్ అందించిన మిడ్ క్యాప్ ఫండ్లలో ఎస్‌బీఐ మ్యూచువల్ ఫండ్‌కు చెందిన ఓ స్కీమ్ నిలుస్తోంది.

అదే ఎస్‌బీఐ మ్యాగ్నమ్ మిడ్ క్యాప్ ఫండ్ రెగ్యులర్ స్కీమ్ హైరిటర్న్స్ అందించింది. ఈ స్కీమ్ గత ఏడాది కాలంలో చూస్తే సగటు వార్షిక రాబడి 26.65 శాతంగా ఉంది. అలాగే గత రెండేళ్ల కాలంలో వార్షిక రాబడి 26.96 శాతంగా ఉంది. గత మూడేళ్లలో 19.10 శాతం రాబడులు ఇచ్చింది. గడిచిన 5 సంవత్సరాల కాలంలో సగటు వార్షిక రిటర్న్స్ 27.89 శాతంగా ఉన్నాయి. ఇక గత 10 ఏళ్లలో వార్షిక రాబడులు 16.63 శాతంగా ఉన్నాయి. ఇక ఈ స్కీమ్ లాంచ్ అయిన 2005 నుంచి చూసుకుంటే ఇప్పటి వరకు వార్షిక రాబడి 17.50 శాతం చొప్పున ఉంది.

ఇక సిస్టమాటిక్ ఇన్వెస్ట్‌మెంట్ ప్లాన్ ద్వారా పొదుపు చేసిన వారికి సైతం హైరిటర్న్స్ అందించింది ఎస్‌బీఐ మ్యాగ్నమ్ మిడ్ క్యాప్ ఫండ్. గత ఏడాదిలో 21.12 శాతం రాబడి ఇచ్చింది. ఇందులో ఏడాది క్రితం నుంచి నెలకు రూ.10 వేల చొప్పున పొదుపు చేస్తే ఇప్పుడు ఆ విలువ రూ. 1,34,700 వరకు ఉంటుంది. ఇక గత రెండేళ్ల కాలంలో 28.24 శాతం రిటర్న్స్ ఇచ్చింది. నెలకు రూ.10 వేల పొదుపు విలువ ఇప్పుడు రూ.3,25,740 అవుతుంది. ఇక మూడేళ్ల కాలంలో వార్షిక రాబడి 25.46 శాతంగా ఉంది. నెలకు రూ.10 వేలు సిప్ చేసినట్లయితే ఇప్పుడు ఆ విలువ రూ.5,43,950 వరకు ఉంటుంది. ఇగ గత 5 సంవత్సరాల్లో చూస్తే వార్షిక రాబడి 28.05 శాతంగా ఉంది. దీని ప్రకారం రూ.10 వేల పొదుపు రూ. 13,15,528 అవుతుంది. గత 10 సంవత్సరాల్లో ఏడాదికి 19.43 శాతం చొప్పున రాబడి అందింది. దీని ప్రకారం రూ.10 వేల సిప్ పెట్టుబడి రూ. 37 లక్షలు అవుతుంది.