ఏలకుల్ని ఇలా వాడితే బాడీలో పేరుకుపోయిన కొలెస్ట్రాల్ కరిగిపోతుంది

ప్రపంచ వ్యాప్తంగా కోట్లాది మంది మధుమేహం సమస్యతో పోరాడుతున్నారు. ఈ వ్యాధి కారణంగా, శరీరంలోని ఇతర భాగాలు కూడా ప్రభావితమవుతాయి. మధుమేహాన్ని సైలెంట్ కిల్లర్ అని కూడా అంటారు. డయాబెటిక్ రోగులలో ఇన్సులిన్ ఉత్పత్తి చేయబడదు. దీంతో రక్తంలో చక్కెర స్థాయి పెరగడం ప్రారంభమవుతుంది. షుగర్ లెవల్స్ పెరిగితే డయాబెటిస్ రోగికి ప్రమాదం కావచ్చు. అందుకే రక్తంలో షుగర్ లెవల్స్ తగ్గించాలి. అంతేకాకుండా చెడు కొలెస్ట్రా‌ల్‌ను కూడా కంట్రోల్ చేయాలి. చెడు కొలెస్ట్రాల్ ఎక్కువైతే గుండె పోటు, స్ట్రోక్ వంటి సమస్యలు వచ్చే ప్రమాదముంది.

కొలెస్ట్రాల్, డయాబెటిస్ కంట్రోల్ చేయడానికి కొన్ని ఇంటి నివారణలు ప్రభావవంతంగా పనిచేస్తాయి. వంటలకు ఎంతో రుచి తెచ్చే ఏలకులు డయాబెటిస్, కొలెస్ట్రాల్‌కి చెక్ పెడుతుందని ఆయుర్వేద నిపుణులు చెబుతున్నారు. ఏలకుల్లో అనేక పోషకాలు ఉన్నాయి. ఏలకుల్ని ఎలా వాడితే శరీరానికి ప్రయోజనాలు చేకూరతాయో ఇక్కడ తెలుసుకుందాం.

ఏలకులతో ప్రయోజనాలు..

సాధారణంగా ఏలకుల్ని ఆహారం రుచిని పెంచేందుకు ఉపయోగిస్తారు. ఇది చాలా చప్పగా ఉండే ఆహారం యొక్క రుచిని కూడా పెంచుతుంది. ఏలకులు రుచిలో సాటిలేనివి. ఇవి ఆరోగ్యానికి కూడా ఎంతో మేలు చేస్తాయి. ఏలకుల్లో కాల్షియం, పొటాషియం, యాంటీ ఆక్సిడెంట్లు వంటి అనేక పోషకాలు ఉన్నాయి. ఏలకుల నీరు లేదా టీ డయాబెటిక్ రోగులకు ఉపయోగకరంగా ఉంటుంది. ఏలకులతో కలిగే ప్రయోజనాలపై ఓ లుక్కేద్దాం.

డయాబెటిస్..

ఏలకుల నీరు క్రమం తప్పకుండా తాగడం వల్ల రక్తంలో చక్కెర స్థాయి అదుపులో ఉంటుంది. ఏలకుల నీరు బదులు ఏలకుల టీని కూడా తీసుకోవచ్చు. ఈ టీలో అల్లం జోడిస్తే రుచి కూడా పెరుగుతుంది. ఏలకులు, లవంగాలు, దాల్చిన చెక్క, మిరియాలతో కలిపి కషాయం లేదా టీలా చేసుకుని తాగితే డయాబెటిక్ పేషంట్లకు మంచిది. అయితే, షుగర్ లెవల్స్ ఎక్కువ ఉన్నవారు ఈ రెమిడీ ప్రయత్నించే ముందు వైద్యుణ్ని సంప్రదించడం మేలు.

జీర్ణశక్తి పెరుగుతుంది..

ఏలకులు తీసుకోవడం వల్ల జీర్ణశక్తి పెరుగుతుంది. ఏలకులు వాటి జీర్ణ లక్షణాలకు ప్రసిద్ధి చెందాయి. అందుకే చాలా వంటల్లో, బిర్యానీల్లో ఏలకులు ఉపయోగిస్తారు. ఏలకులతో అజీర్తి, ఉబ్బరం, గ్యాస్, కడుపు నొప్పి వంటి సమస్యల నుంచి ఉపశమనం లభిస్తుంది. ఏలకులు కడుపులో ఉండే ఎంజైమ్‌ల్ని నియంత్రిస్తుంది. దీంతో.. జీర్ణశక్తి పెరుగుతుంది.

కొలెస్ట్రాల్ నియంత్రణ..

ఏలకులు శరీరంలో పేరుకుపోయిన కొలెస్ట్రాల్ కరిగించడంలో సాయపడతాయి. చెడు కొలెస్ట్రాల్ శరీరానికి ఎంత మాత్రం మంచిది కాదు. శరీరంలో కొలెస్ట్రాల్ స్థాయిలు ఎక్కువగా ఉంటే.. ప్రతి రోజూ ఏలకుల నీటిని తీసుకోవడం మేలు చేస్తుంది. ఇది కొలెస్ట్రాల్ స్థాయిల్ని చక్కగా నిర్వహిస్తుంది. కొలెస్ట్రాల్ స్థాయిల్ని తగ్గించడమే కాకుండా గుండె సంబంధిత వ్యాధుల్ని తగ్గించడంలో సాయపడుతుంది.

నోటి దుర్వాసనకి చెక్..

ఏలకుల్ని నమలడం ద్వారా నోటి దుర్వాసను చెక్ పెట్టవచ్చు. ఏలకుల్ని నమలడం వల్ల శ్వాసను తాజాగా ఉంచవచ్చు. దుర్వాసన లేదా హాలిటోసిస్ వదిలించుకోవడానికి ఏలకులు సాయపడతాయి. అందుకే ఏలకుల్ని మౌత్ ఫ్రెషనర్లు, చూయింగ్ గమ్‌ల్లో వాడతారు.

యాలకుల నీరు లేదా టీ ఎలా తయారు చేయాలి..?

ఇందుకోసం ఒక పెద్ద గ్లాస్ నీరు తీసుకోండి. ఇందులో నాలుగు నుంచి ఐదు ఏలకుల్ని వేసి నీరు సగం వచ్చే వరకు మరిగించండి. ఆ తర్వాత వడకట్టి గోరువెచ్చగా తాగండి. ప్రతి రోజూ ఉదయాన్నే ఈ నీరు తాగితే శరీరానికి ఎంతో మేలు జరుగుతుంది. ఇక, టీ కోసం ఏలకులతో పాటు లవంగాలు, దాల్చిన చెక్క, మిరియాలు నీటిలో వేసి బాగా మరిగించండి. ఆ తర్వాత వడకట్టి అలానే తాగవచ్చు. లేదంటే కాస్తా తేనె, నిమ్మరసం జోడించి టీలా తాగవచ్చంటున్నారు నిపుణులు.