ముస్లిం యువకుడితో హిందూ యువతి సహజీవనం.. హైకోర్టు సంచలన తీర్పు

మేజర్ అయిన యువతీ యువకులు.. వారి ఇష్టం ప్రకారం, ఎవరిని కావాలనుకుంటే వారిని పెళ్లి చేసుకోవడం, కలిసి ఉండటం చేయవచ్చని ఇప్పటికే ఎన్నో కేసుల్లో ఎన్నో కోర్టుల్లో రకరకాల తీర్పులు వెలువడటం మనం చూస్తూనే ఉన్నాం. తాజాగా అలాంటి ఘటనే మహారాష్ట్రలో చోటు చేసుకుంది. ముస్లిం యువకుడు, హిందూ యువతి ప్రేమించుకోగా.. వారి పెళ్లికి పెద్దలు అంగీకరించలేదు. సహజీవనం చేస్తున్న ఆ ఇద్దరు.. తమకు రక్షణ కావాలని కోర్టును ఆశ్రయించారు. ఇక ఇదే ఘటనలో ఆ యువతి తండ్రి కూడా కోర్టును ఆశ్రయించి.. తన కూతురును అప్పగించాలని కోరగా.. అందుకు బాంబే హైకోర్టు అంగీకరించలేదు. ఆ యువతి స్వేచ్ఛను కాపాడుతామని కోర్టు తేల్చి చెప్పింది.

మహారాష్ట్రకు చెందిన 20 ఏళ్ల హిందూ యువతి.. 19 ఏళ్ల ముస్లిం యువకుడు కలుసుకున్నారు. ఆ తర్వాత వారిద్దరి పరిచయం ప్రేమగా మారింది. ఆ యువకుడి కోసం ఆ యువతి.. ఊరును వదిలేసి అతడి కోసం వచ్చింది. ముంబైలోని చెంబూరు ప్రాంతంలో ఉన్న ప్రభుత్వ మహిళల హాస్టల్‌లో ఉంటూ ఆ ముస్లిం యువకుడితో సహజీవనం కొనసాగించింది. అయితే ఈ విషయం ఆమె తండ్రికి తెలిసింది. దీంతో ఆమెకు నచ్చజెప్పి ఇంటికి తీసుకెళ్లేందుకు ప్రయత్నించాడు. అయితే అతడి ప్రయత్నాలు విఫలం కావడంతో.. బజరంగ్ దళ్ కార్యకర్తలతో కలిసి వచ్చి ఆమెను ఒప్పించేందుకు ఎన్ని కష్టాలు పడినా ఆ యువతి వినిపించుకోలేదు. ఎవరు ఎన్ని చెప్పినా.. ఏం చేసినా తాను ఆ ముస్లిం యువకుడినే పెళ్లి చేసుకుంటానని తేల్చి చెప్పింది.

ఈ క్రమంలోనే తమను కుటుంబ సభ్యులు విడగొట్టకుండా ఆ ప్రేమికులు కోర్టును ఆశ్రయించారు. చెంబూరు ప్రభుత్వ మహిళల హాస్టల్‌ నుంచి వెళ్లిపోయేందుకు ఆ యువతిని అనుమతించాలంటూ.. బాంబే హైకోర్టులో ఆమె ప్రేమికుడు హెబియస్ కార్పస్ పిటిషన్ దాఖలు చేశాడు. ఈ క్రమంలోనే తన కూతురిని తనకు అప్పగించాలని ఆ యువతి తండ్రి బాంబే హైకోర్టుకు విజ్ఞప్తి చేసుకున్నాడు. ఈ నేపథ్యంలోనే సనా రయీస్ ఖాన్ అనే లాయర్‌ను యువతి తండ్రి అపాయింట్ చేసుకున్నాడు. వీరిద్దరి కేసును బాంబే హైకోర్టు న్యాయమూర్తులు జస్టిస్ భారతీ డాంగ్రే, మంజూషా దేశ్‌పాండేలతో కూడిన ద్వి ధర్మాసనం వాదనలు విన్నది.

ఈ క్రమంలోనే తన కూతురు ఇంటికి రావడానికి ఇష్టం లేదని చెబితే.. ఇక ఆమె బతికి లేదని భావిస్తానని యువతి తండ్రి తేల్చి చెప్పారు. ఈ నేపథ్యంలోనే ఇరువైపులా వాదనలు విన్న కోర్టు కీలక వ్యాఖ్యలు చేసింది. తాము ఆ యువతి స్వేచ్ఛను హరించలేమని.. ఆమె బాగుండాలని మాత్రమే కోరుకోగలుగుతామని చెప్పింది. ఇక ఆ యువతి మేజర్ కాబట్టి.. ఆమె జీవితం, ఆమె ఇష్టమని చెప్పింది. ఆమెకు నచ్చిన నిర్ణయాలు తీసుకునే స్వేచ్ఛ యువతికి ఉందని.. తాము ఆమె స్వేచ్ఛను కాపాడుతామన హైకోర్టు బెంచ్ స్పష్టం చేసింది. ఈ క్రమంలోనే ఆ యువతిని తల్లిదండ్రుల కస్టడీకి అప్పగించేందుకు ధర్మాసనం నిరాకరించింది.