అక్కడకు వెళ్తే జాగ్రత్త సుమీ.. యాచకులు వెంటపడ్డా భిక్షమేయొద్దు.. వేశారా జైలుకే

మన చిన్నప్పటి నుంచి యాచకులు కనిపిస్తే వెంటనే చిల్లర తీసి ఇచ్చేస్తుంటాం. చిల్లర లేకపోతే మన దగ్గర తినేవి ఏమైనా ఉన్నా అందజేస్తాం. ఇలా చేస్తే పుణ్యం వస్తుందని కొందరు భావిస్తుండగా.. ఎవరికైనా సాయం చేసినట్లు ఉంటుంది కదా అని మరికొందరు అలా చేస్తూ ఉంటారు. ఈక్రమంలోనే అనేక చోట్ల దానాలు చేస్తుంటారు. ముఖ్యంగా గుడికి, ప్రార్థనా మందిరాలకు వెళ్లినప్పుడు ప్రత్యేకించి చిల్లర వెంటపెట్టుకుని వెళ్తుంటాం. కానీ అక్కడకు వెళ్తే మాత్రం ఇలా అస్సలే చేయకండి. పొరపాటున కూడా భిక్షం వేయకండి. వేశారా ఇక మీ పని అంతే.

మధ్యప్రదేశ్‌లోని ఇండోర్‌కి వెళ్తే.. యాచకులు కనిపించినా భిక్షం వేయొద్దు. పోకిరి సినిమాలో బ్రహ్మానందం వెంట పడ్డట్లు భిక్షగాళ్లు మీ వెంట పడ్డా పట్టించుకోనట్లు వెళ్లిపోవాలి. లేదు మాకు పుణ్యం వస్తుంది, మేము వాళ్లకు సాయం చేస్తాం, భిక్ష వేస్తాం అంటారా.. జైలుకి వెళ్లాల్సి వస్తుంది గుర్తుంచుకోండి. ఎందుకంటే ఇండోర్‌ను యాచకులు లేని నగరంగా చేసేందుకు అక్కడి ప్రభుత్వం చర్యలు తీసుకుంది. ఈక్రమంలోనే ఇండోర్‌లో ఉన్న యాచకులను గుర్తించి వారిని ఉజ్జయినిలోని సేవాధామ్ ఆశ్రమానికి తరలించే ప్రయత్నం చేస్తున్నారు. మొత్తంగా 14 టీంలను ఏర్పరిచి నగరంలోని దేవాలయాలు, ప్రార్థనా స్థలాల వద్ద భిక్షాటన చేస్తున్న వారిని పట్టుకుంటున్నారు.

అయితే ఇవన్నీ చేస్తున్నా అక్కడ ఇంకా కొంత మంది యాచకులు మాత్రం అడుక్కుంటూనే ఉన్నారు. అది గుర్తించిన ప్రభుత్వం.. అక్కడ కొత్త ఆంక్షలు విధించింది. ఇండోర్‌ను యాచకులు లేని నగరంగా తీర్చిదిద్దేందుకు.. భిక్షమెత్తుకునే వారిపై కాకుండా.. దానం చేసే వారిపై చర్యలు తీసుకోవడానికి ఉపక్రమించింది. ముఖ్యంగా 2025 జనవరి 1వ తేదీ నుంచి యాచకులకు దానం చేసే వారిపై ఎఫ్ఐఆర్‌లు నమోదు చేయబోతుంది. ఇదే విషయాన్ని అక్కడి జిల్లా అధికారులు సోమవారం రోజు తెలిపారు. ఇండోర్‌లో భిక్షాటనను నిషేధిస్తూ పరిపాలన శాఖ ఇప్పటికే ఉత్తర్వులు జారీ చేసింది జిల్లా కలెక్టర్ ఆశిష్ సింగ్ వివరించారు.

ఇటీవలే ఇండోర్‌లో యాచిస్తూ ఓ మహిళ... 10 నుంచి 12 రోజుల్లోనే 75 వేల రూపాయలు సంపాదించి పోలీసులకు దొరికిపోయింది. అడుక్కుని ఇంతగా సంపాదించడం చూసి అధికారులు షాక్ అయ్యారు. ఈమె ఒక్కరే కాకుండా ఇండోర్‌లో అడుక్కుంటూ జీవనం సాగిస్తున్న చాలా మందికి.. బంగ్లాలతో పాటు పొలాలు కూడా ఉన్నట్లు గుర్తించారు. అలా ఆస్తులు ఉన్న వారిని వారి ఇళ్లకు తరలిస్తూ.. ఏమీ లేకుండా అడుక్కుంటున్న వారిని మాత్రం ఆశ్రమానికి పంపిస్తున్నారు. చూడాలి మరి యాచకులు లేని స్వచ్ఛమైన నగరంగా ఇండోర్ ఎప్పటి వరకు మారుతుంది అనేది.