మెరుపు వేగంతో స్టంపింగ్ చేసిన కీపర్,,,ధోనీని గుర్తు చేసుకుంటున్న నెటిజన్లు

ఇండియన్ ప్రీమియర్ లీగ్ సక్సెస్ కావడంతో ప్రపంచవ్యాప్తంగా లీగ్‌లు మొదలయ్యాయి. చిన్న దేశం పెద్ద దేశం అనే తేడా లేకుండా క్రికెట్ లీగ్‌లు నిర్వహిస్తున్నాయి. ఈ నేపథ్యంలో ఐపీఎల్‌ను స్ఫూర్తిగా తీసుకుని నేపాల్‌లో కూడా నేపాల్ ప్రీమియర్ లీగ్ (ఎన్‌పీఎల్) నిర్వహిస్తున్నారు. అయితే ఈ ఎడిషన్ లీగ్ ప్రస్తుతం జరుగుతుండగా.. ఇందులో ఓ ఆసక్తికర స్టంపింగ్ చోటు చేసుకుంది. వికెట్ కీపర్ తెలివికి.. బ్యాటర్ అవాక్కయ్యాడు. ప్రస్తుతం ఇందుకు సంబంధించిన వీడియో సోషల్ మీడియాలో వైరల్‌గా మారింది.

అసలేం జరిగిందంటే..

నేపాల్ ప్రీమియర్ లీగ్‌లో భాగంగా కర్ణాలీ యాక్స్(ఎన్‌పీఎల్) వర్సెస్ సుదర్ పాశ్చిమ్ రాయల్స్ మధ్య మ్యాచ్ జరిగింది. కర్ణాలీ యాక్స్ బ్యాటింగ్ చేస్తుండగా రాయల్స్ బౌలర్ హర్మీత్ సింగ్ చివరి ఓవర్ వేసేందుకు సిద్ధమయ్యాడు. అటు స్ట్రైకింగ్‌లో బిపిన్ శర్మ ఉన్నాడు. హర్మీత్ సింగ్ వేసిన బంతిని బిపిన్ శర్మ లెగ్ సైడ్ స్వీప్ షాట్ ఆడే ప్రయత్నం చేశాడు. కానీ బ్యాట్‌ను మిస్సైన బంతి వికెట్ కీపర్ వినోద్ బండారీ ప్యాడ్స్ మధ్య ఇరుక్కుంది.

అయితే అంపైర్ ఈ బంతిని వైడ్ అని ప్రకటించాడు. బంతి వికెట్ కీపర్ ప్యాడ్ మధ్యలో ఇరుక్కున్న విషయాన్ని బ్యాటర్ గమనించలేదు. దీంతో ఏమరపాటుగా క్రీజు దాటాడు. ఇది గమనించిన వికెట్ కీపర్.. రెప్ప పాటు క్షణంలో వికెట్లను గిరాటేశాడు. వికెట్ కీపర్ చాకచక్యానికి అంతా షాక్ అయ్యారు. బ్యాటర్ కూడా చేసేదేం లేక నిరాశగా వెనుదిరిగాడు. ఈ వీడియో సోషల్ మీడియాలో చక్కర్లు కొడుతోంది.

కాగా టీమిండియా మాజీ కెప్టెన్ మహేంద్ర సింగ్ ధోనీ తన కెరీర్‌లో ఈ తరహా స్టంపింగ్‌లు లెక్కలేనన్ని చేశాడు. ధోనీ జెర్సీ నెంబర్ 7 ధరిస్తాడనే విషయం అందరికీ తెలిసిందే. ఈ మ్యాచ్‌లో వికెట్ కీపింగ్ చేసిన వినోద్ బండారీ కూడా జెర్సీ నెంబర్ 7ను ధరించడం విశేషం. ఈ వీడియోను చూసిన నెటిజన్లు.. వినోద్ బండారీ ధోనీని గుర్తు చేశాడని కొనియాడుతున్నారు. ఇక ఈ మ్యాచ్‌లో తొలుత బ్యాటింగ్ చేసిన కర్నిల్ యాక్స్ నిర్ణీత 20 ఓవర్లలో 101 పరుగులకు ఆలౌటైంది. అనంతరం సుదర్ పాశ్చిమ్ రాయల్స్ 15.2 ఓవర్లలోనే 4 వికెట్లకు 105 పరుగులు చేసి విజయం సాధించింది.