మళ్లీ నిరాశపర్చిన రోహిత్.. పోరాడుతున్న రాహుల్

బోర్డర్ గవాస్కర్ ట్రోఫీలో భాగంగా గబ్బా టెస్టులో టీమిండియా ఎదురీదుతోంది. ఈ మ్యాచ్ తొలి ఇన్నింగ్స్‌లో ఆస్ట్రేలియా 445 పరుగులు చేయగా.. భారత్ పరుగులు చేసేందుకు ఇబ్బంది పడుతోంది. వంద పరుగుల లోపే సగం వికెట్లు కోల్పోయింది. దీంతో ఫాలో ఆన్ గండాన్ని ఎదుర్కొంటోంది. నాలుగో రోజు ఆట ప్రారంభమైన కాసేపటికే ఓవర్ నైట్ బ్యాటర్ రోహిత్ శర్మ ఔట్ కాగా.. కేఎల్ రాహుల్ పోరాడుతున్నాడు.

ఓవర్‌ నైట్ స్కోరు 51/4తో నాలుగో రోజు ఆట ప్రారంభించిన భారత్‌.. కాసేపటికే వికెట్ కోల్పోయింది. రిషభ్ పంత్ ఔట్ కావడంతో క్రీజులో వచ్చిన రోహిత్ శర్మ.. ఈరోజు పది పరుగులు జోడించి ఔట్ అయ్యాడు. ఈ సిరీస్‌లో వరుసగా మూడో ఇన్నింగ్స్‌లోనూ విఫలమయ్యారు. కమిన్స్ వేసిన బంతిని అంచనా వేయలేకపోయిన రోహిత్.. వికెట్ కీపర్‌కు క్యాచ్ ఇచ్చాడు. దీంతో 74 పరుగులకే భారత్ ఐదు వికెట్లు కోల్పోయింది.

ఆ తర్వాత రవీంద్ర జడేజా క్రీజులోకి వచ్చాడు. ఓ పక్క వికెట్లు పడుతున్నా.. ఓపెనర్ కేఎల్ రాహుల్ మాత్రం సాధికారికంగా బ్యాటింగ్ చేస్తున్నాడు. మొండిగా క్రీజులో పాతుకుపోయిన ఈ బ్యాటర్.. ఆస్ట్రేలియా బౌలర్లను సమర్థవంతంగా ఎదుర్కొంటున్నాడు. సహచర బ్యాటర్లు ఇబ్బంది పడ్డ ఇదే పిచ్‌పై ఈజీగా పరుగులు రాబడుతున్నాడు. ఈ క్రమంలోనే రాహుల్.. హాఫ్ సెంచరీ పూర్తి చేసుకున్నాడు.

గబ్బా టెస్టుకు పదేపదే అంతరాయం కలిగిస్తున్న వర్షం.. నాలుగో రోజు కూడా ఎంట్రీ ఇచ్చింది. తొలి సెషన్‌లో 106/5తో భారత్ బ్యాటింగ్ చేస్తుండగా వర్షం పడింది. దీంతో మ్యాచ్‌ను కాసేపు ఆపేశారు. అయితే కాసేపటికే వర్షం తగ్గడంతో మ్యాచ్‌ను మళ్లీ స్టార్ట్ చేశారు.

32 ఓవర్లు ముగిసే సరికి భారత్ స్కోరు 109/5గా ఉంది. ఈ మ్యాచ్‌లో ఫాలో ఆన్ ముప్పు తప్పించుకోవాలంటే భారత్ 246 పరుగులు చేయాల్సిందే. అంటే ఇప్పటికీ అందులో సగం స్కోరు కూడా చేయలేదు. మరి కేఎల్ రాహుల్.. రవీంద్ర జడేజా.. నితీశ్ రెడ్డిలు ఫాలో ఆన్ గండాన్ని తప్పిస్తారా..? మ్యాచ్‌లో ఓడిపోకుండా కాపాడాతారా? అన్నది తేలాల్సి ఉంది.