వీళ్లు పొరపాటున కూడా రేగి పండ్లను తినకూడదు.. ఎంత దూరంగా ఉంటే అంత మంచిది..

చలికాలంలో రేగి పండ్లు ఎక్కువగా కనిపిస్తాయి. రోడ్ల మీద, బండ్లపై వీటిని ఎక్కువగా అమ్ముతుంటారు. ఇవి తినడానికి రుచిగా, పుల్లగా భలే ఉంటాయి. అందుకే చిన్న, పెద్దా తేడా లేకుండా వీటిని ఎంతో ఇష్టంతో తింటారు. రేగి పండ్లను మాత్రమే కాదు రేగి పచ్చడి, రేగి వడలను కూడా ప్రజలు ఆస్వాదిస్తారు. రేగి పండ్లు తినడం వల్ల శరీరానికి చాలా ప్రయోజనాలు ఉన్నాయి. వీటిలో అనేక పోషకాలు ఉన్నాయి. ఈ పండ్లను వింటర్ సీజన్‌లో తినడం వల్ల శరీరానికి ఎక్కువ ప్రయోజనాలు చేకూరుతాయి. అయితే, రేగి పండ్లతో ఆరోగ్య ప్రయోజనాలున్నప్పటికీ కొందరు వీటిని తినకూడదంటున్నారు. కొందరికి ఈ పండ్లు పడవు.

రేగి పండ్లతో ఆరోగ్య ప్రయోజనాలు..

​రేగి పండ్లలో ఎన్నో పోషకాలు ఉంటాయి. రేగి పండ్లలో విటమిన్ సి, యాంటీ ఆక్సిడెంట్లు, ప్రోటీన్లు, ఫైబర్, ఫ్లేవనాయిడ్స్, పొటాషియం ఉంటాయి. వీటిలో ఉండే ఫ్లేవనాయిడ్లు మెదడుని ఆరోగ్యంగా ఉంచుతాయి. ఈ పండ్లలో యాంటీ బ్యాక్టీరియల్, యాంటీ ఇన్ఫ్లమేటరీ లక్షణాలు ఉంటాయి. దీంతో.. శరీరం నుంచి ఇన్ఫెక్షన్లను తగ్గిస్తుంది. ఇందులో విటమిన్ సి ఎక్కువగా ఉండటం వల్ల ఇమ్యూనిటీ పవర్ పెరుగుతుంది. ఈ పండ్లలో పొటాషియం ఎక్కువగా ఉంటుంది. దీంతో బీపీ నియంత్రణలో ఉంటుంది. ఇలా చెప్పుకుంటూ పోతే బోలెడు ఆరోగ్య ప్రయోజనాలు ఉన్నాయి. అయితే, కొన్ని సమస్యలు ఉన్నవారు రేగి పండ్లను ఎక్కువగా తినకూడదు. వారెవరో ఇక్కడ తెలుసుకుందాం.

యాంటీ డిప్రెసెంట్ మందులు వాడేవారు..

రేగి పండ్లలో అనేక పోషకాలు ఉంటాయి. ఇవి ఆరోగ్యానికి ఎంతో మంచిది. అయితే, ఎవరైనా యాంటీ డిప్రెసెంట్ మందులు తీసుకుంటుంటే.. వారు మాత్రం రేగి పండ్లు తినకూడదు. రేగి పండ్లలో ఉండే కొన్ని మూలకాలు యాంటిడిప్రెసెంట్ మెడిసిన్‌తో కలిపి దాని ప్రభావాన్ని తగ్గిస్తాయి. ఈ పరిస్థితి రోగికి మంచిది కాదు. అంతేకాకుండా మూర్చ వ్యాధితో బాధపడుతూ.. దానికి మెడిసిన్ తీసుకునేవారు కూడా రేగు పండ్లు ఎక్కువగా తినకూడదు. ఇది ఆరోగ్యంపై చెడు ప్రభావం చూపుతుంది.

డయాబెటిస్..

మధుమేహ వ్యాధిగ్రస్తులు రేగు పండ్లను తినకూడదని కాదు. రేగి పండ్లు రక్తంలో చక్కెర స్థాయిలను నిర్వహించడంలో సాయపడతాయి. అయితే, ఎక్కువ తింటేనే అసలు ముప్పు. రుచిగా ఉన్నాయని ఎక్కువగా తింటే.. రక్తంలో చక్కెర స్థాయిలు హెచ్చు తగ్గులకు గురవుతాయి. ఇది డయాబెటిస్ పేషెంట్‌కు మంచిది కాదని నిపుణులు చెబుతున్నారు. అందుకే రేగి పండ్లను తక్కువ పరిణామంలో తీసుకుంటే ఆరోగ్యానికి మంచిది.

జీర్ణ సమస్యలు..

రేగి పండ్లలో ఫైబర్ ఎక్కువగా ఉంటుంది. దీంతో జీర్ణక్రియను మెరుగుపరుస్తుంది. అయితే, రేగి పండ్లు ఎక్కువ తింటే మాత్రం మంచిది కాదు. ముఖ్యంగా అజీర్తి, కడుపు ఉబ్బరం, నొప్పి, వాపు, మలబద్ధకం వంటి జీర్ణ సమస్యలతో బాధపడేవారు వీటిని ఎక్కువగా తినకూడదు. ఎక్కువగా తింటే మీ సమస్యలు తీవ్రమై.. విరేచనాలు అయ్యే ప్రమాదముంది. అందుకే వీటిని మితంగా తినడం మేలు.

అలెర్జీ..

చాలా మంది స్కిన్ అలెర్జీ, శ్వాసకోస సమస్యలతో బాధపడుతుంటారు. అలాంటి వారికి రేగు పండ్లు పడకపోవచ్చు. రేగి పండ్లు తినడం వల్ల చర్మంపై దద్దుర్లు, మంట, వాపు, శ్వాస తీసుకోవడంలో ఇబ్బంది వంటి సమస్యలు వచ్చే అవకాశం ఉంది. ఈ సమస్యలతో బాధపడేవారు ఒకవేళ తినాలనుకుంటే వైద్యుణ్ని సంప్రదించాలని నిపుణులు చెబుతున్నారు.

జలుబు, దగ్గు..

సాధారణ వ్యక్తి రేగి పండ్లు తినడం వల్ల ఇమ్యూనిటీ పవర్ పెరుగుతంది. అదే, జలుబు, దగ్గు వంటి సమస్యలతో బాధపడేవారు వీటిని ఎక్కువగా తినకూడదు. వీటిని ఎక్కువగా తినడం వల్ల జలుబు, దగ్గు తీవ్రమయ్యే అవకాశం ఉంది. దగ్గు ఉన్నవారి వీటిని ఎక్కువగా తినకపోవడమే ఉత్తమం. ఎక్కువగా తింటే దగ్గు ఊపిరాడదు. అంతేకాకుండా గొంతు నొప్పి వచ్చే అవకాశం ఉంది. వీరితో పాటు చిన్నపిల్లలు రేగి పండ్లు తినేటప్పుడు తల్లిదండ్రులు జాగ్రత్తగా ఉండాలి. రేగి పండు విత్తనం పిల్లలకు గొంతులో ఇరుక్కునే ప్రమాదం ఉంది. అందుకే పిల్లలకు వీటిని తినిపించకపోవడమే మేలు.