బ్యాంక్ వర్సెస్ పోస్టాఫీస్.. ఐదేళ్ల డిపాజిట్లపై రూ. 10 లక్షలకు దేంట్లో ఎక్కువ వడ్డీ వస్తుందంటే?

బ్యాంకుల మాదిరిగానే పోస్టాఫీసుల్లో కూడా డబ్బులు డిపాజిట్ చేయొచ్చని తెలుసా? పోస్టాఫీసుల్లో ఫిక్స్‌డ్ డిపాజిట్లను పోస్టాఫీస్ టైమ్ డిపాజిట్లుగా పిలుస్తుంటారు. ఇండియన్ పోస్టల్ డిపార్ట్‌మెంట్ ఈ డిపాజిట్ స్కీమ్స్ ఆఫర్ చేస్తుంది. కేంద్ర ప్రభుత్వం మద్దతు ఉంటుంది కాబట్టి గ్యారెంటీ రిటర్న్స్ అందుకోవచ్చు. చిన్న మొత్తాల్లో కూడా డిపాజిట్లు చేయొచ్చు. రిస్క్ ఉండదని చెప్పొచ్చు. ఇక ఇందులో వడ్డీ రేట్లను కేంద్రం నిర్ణయిస్తుంది. ప్రతి 3 నెలలకు ఓసారి సవరిస్తుంటుంది. ఈ సమయంలో వడ్డీ రేట్లను పెంచొచ్చు లేదా తగ్గించొచ్చు లేదా స్థిరంగా కూడా ఉంచొచ్చు. దానికి తగ్గట్లుగానే రిటర్న్స్ మారుతుంటాయి. బ్యాంకుల్లో అయితే కనీసం వారం రోజుల నుంచి 45 రోజులు, 3 నెలలు, 6 నెలలు, 10 నెలలు, ఏడాది, 15 నెలలు, రెండేళ్లు, మూడేళ్లు ఇలా వేర్వేరు టెన్యూర్స్ చాలానే ఉంటాయి. అదే పోస్టాఫీసుల్లో ఏడాది, రెండేళ్లు, మూడేళ్లు, ఐదేళ్ల టెన్యూర్‌తోనే టైమ్ డిపాజిట్లు ఉంటాయని చెప్పొచ్చు. ఇక్కడ ప్రతి 3 నెలలకు ఓసారి వడ్డీ లెక్కించి.. వార్షిక ప్రాతిపదికన చెల్లిస్తుంటారు.

బ్యాంక్ డిపాజిట్లలో అదనపు ఫీచర్ ఏంటంటే.. ఇక్కడ ఓవర్ డ్రాఫ్ట్ ఫెసిలిటీ ఉంటుంది. ద్రవ్య లభ్యత ఉంటుంది. అందుకే ఎక్కువ మంది ఇన్వెస్టర్లను బ్యాంకులు ఆకర్షిస్తుంటాయి. ఇప్పుడు బ్యాంక్ డిపాజిట్లపై సాధారణ ప్రజలకు ఐదేళ్ల వ్యవధిపై ఎక్కువ వడ్డీ ఇచ్చే బ్యాంకులు ఏంటో చూద్దాం. ఇక్కడ 10 లక్షలు జమ చేస్తే.. మెచ్యూరిటీకి ఎంతొస్తుందో తెలుసుకుందాం. ఇంకా.. పోస్టాఫీసుల్లో అయితే వడ్డీ రేటు అందరికీ సమానంగా ఉంటుంది.

టాక్స్ సేవింగ్ ఎఫ్‌డీ..

మనం టాక్స్ సేవింగ్ ఎఫ్‌డీ గురించి తెలుసుకుందాం. ఐదేళ్లు పైబడిన డిపాజిట్లపై పన్ను ప్రయోజనాలు లభిస్తాయన్నమాట. ఇక్కడ ఆదాయపు పన్ను చట్టం సెక్షన్ 80c కింద ఆర్థిక సంవత్సరంలో రూ. 1.50 లక్షల వరకు టాక్స్ ఆదా చేసుకోవచ్చు.

పోస్టాఫీస్ టైమ్ డిపాజిట్..

ప్రస్తుతం పోస్టాఫీస్ ఐదేళ్ల వ్యవధి టైమ్ డిపాజిట్ వడ్డీ రేటు 7.50 శాతంగా ఉంది. అక్టోబర్- డిసెంబర్ కాలానికి ఇది వర్తిస్తుంది. జనవరి- మార్చికి సంబంధించి వడ్డీ రేట్లు త్వరలో రానున్నాయి. ఇక్కడ కనీసం రూ. 1000 నుంచి డిపాజిట్ చేయొచ్చు. గరిష్ట పరిమితి లేదు. ఇక్కడ రూ. 10 లక్షలు జమ చేస్తే.. 7.50 శాతం వడ్డీ రేటు చొప్పున ఐదేళ్లకు చేతికి రూ. 14.49 లక్షలకుపైగా వస్తుంది. ఇక్కడ వడ్డీనే రూ. 4.49 లక్షలు.

ఎస్బీఐ ఐదేళ్ల డిపాజిట్..

బ్యాంకుల్లో అయితే టాప్ బ్యాంకులైన ఐసీఐసీఐ, హెచ్‌డీఎఫ్‌సీ బ్యాంకుల్లో ఐదేళ్ల డిపాజిట్లపై వడ్డీ రేటు 7 శాతంగా ఉంది. ఇక్కడ 10 లక్షలు డిపాజిట్ చేస్తే వడ్డీ రూ. 4.14 లక్షలుగానే ఉంది. అదే ఎస్బీఐలో 6.50 శాతం మాత్రమే వడ్డీ రేటు ఉండగా.. దీంట్లో 10 లక్షలు జమ చేసిన వారికి రూ. 3.80 లక్షలే వడ్డీ అందుతుంది. బ్యాంకుల్లో.. డీసీబీ బ్యాంకు అత్యధికంగా 7.40 శాతం వడ్డీ అందిస్తుండగా.. ఇక్కడ 10 లక్షలపై రూ. 4.42 లక్షల వడ్డీ వస్తుంది. ఈ లెక్కన ప్రస్తుత వడ్డీ రేట్ల ప్రకారం.. పోస్టాఫీసుల్లోనే వడ్డీ ఎక్కువ ఉంది.