19 ఏళ్లకే పండు ముసలిలా మారి చనిపోయిన టిక్‌టాక్ స్టార్... ఎవరీ బియాండ్రి బూయ్‌సెన్?

ఈ భూప్రపంచంలో అనేక రకాల జీవులు ఉన్నాయి. వాటితో పాటే కోట్ల మంది ప్రజలు భూమిపై జీవిస్తున్నారు. వీరంతా తల్లి గర్భం నుంచి శిశువులుగా జన్మించి.. బాల్యం, కౌమారం, యవ్వనం, వృద్ధాప్యం.. ఇలా అన్ని దశలను దాటుకుంటూ వెళ్తారు. ఇది అందరికీ తెలిసిన విషయమే. కానీ ఓ అమ్మాయి మాత్రం బాల్యం నుంచి నేరుగా వృద్ధాప్యంలోకి వెళ్లింది. అలా అని ఇదెవరో సైంటిస్ట్ చేసిన మాయ అనుకుంటున్నారేమో. అదేం కాదు. నిజంగానే ఆమె అలా మారిపోయింది. టిక్‌టాక్‌ను షేక్ చేసి లక్షలాది మంది అభిమానుల్ని సొంతం చేసుకున్న ఈ అమ్మాయి ఎవరు, ఆమె కథేంటో మనం ఇప్పుడు తెలుసుకుందాం.

దక్షిణాఫ్రికాకు చెందిన 19 ఏళ్ల అమ్మాయే బియాండ్రీ బూయ్‌సెన్. అయితే ఈమె తల్లి కడుపులో ఉన్నప్పుడే ఓ అరుదైన వ్యాధితో బాధ పడుతున్నట్లు వైద్యులు గుర్తించారు. అదే విషయాన్ని తల్లిదండ్రులకు కూడా చెప్పారు. బాధతోనే ఈ బుజ్జాయిని చేతుల్లోకి తీసుకున్నారు ఆమె అమ్మానాన్నలు. ఎన్ని సమస్యలు వచ్చినా సరే ఆమెకు తోడుగా నిలిచి.. బితికినంత కాలం సంతోషంగా ఉంచాలనుకున్నారు. అదే చేశారు కూడా. అయితే పాపకు వచ్చిన సమస్య పేరు ప్రొజీరియా. ఇదో అరుదైన జన్యు సంబంధిత సమస్య. 20 మిలియన్ల మందిలో ఒక్కరికి వచ్చే వ్యాధి.

ఈ వ్యాధి సోకిన వాళ్లు.. ఒక సంవత్సరం గడిచే సరికి 8 ఏళ్లు ముందుకు వెళ్లిపోతారు. అంటే బియాండ్రీ ఏడాది వయసు ఉండగానే.. 8 ఏళ్ల పాపలా కనిపించేది. అలా ఈమెకు వయసు మీద పడుతూనే వస్తోంది. ఇంత పెద్ద సమస్యతో నిత్యం ఆసుపత్రుల చుట్టూ తిరుగుతూనే ఉన్న ఏమాత్రం ఆత్మ విశ్యాసం కోల్పోకుండా అనేక మందికి దగ్గరైంది బియాండ్రీ. ముఖ్యంగా టిక్‌టాక్‌లోకి వచ్చి... ఎంతో మందికి ప్రేరణ కల్గించే వీడియోలు చేసింది. అలా మొత్తం 27 లక్షల 8 వేల మంది ఫాలోవర్లను సొంతం చేసుకుంది.

అలా ప్రతిరోజూ వీడియోలు చేస్తూ ఎంతో మందికి స్ఫూర్తిని ఇచ్చిన ఈమె.. 14 సంవత్సరాల కంటే ఎక్కువ బతుకుతానని ఏమాత్రం ఊహించలేదు. కానీ తల్లిదండ్రులు, వైద్యుల సాయంతో అన్ని సమస్యలు ఎదుర్కుంటూ.. అనుకున్న దానికంటే మరో ఐదేళ్లు ఎక్కువగా జీవించింది. 18 ఏళ్ల వయయులో ఉండగా బియాండ్రీకి ఓపెన్ హార్ట్ సర్జరీ కూడా చేశారు. కేవలం 12 కిలోల బరువు ఉన్న ఈమె.. శస్త్ర చికిత్స తర్వాత కోలుకొని ఏడాది పాటు బతికారు. తాజాగా ఈరోజు తనువు చాలించారు. ఈ విషయాన్ని ఆమె తల్లి సోషల్ మీడియా ద్వారా వెల్లడించింది.

సోషల్ మీడియాను షేక్ చేసిన బియాండ్రీ బూయ్‌సెన్ చనిపోయిన విషయం తెలుసుకున్న ప్రతీ ఒక్కరూ ఆమె ఆత్మకు శాంతి చేకూరాలని కోరుకుంటున్నారు. ఆమె కుటుంబ సభ్యులకు ప్రగాఢ సానుభూతి తెలుపుతున్నారు. దక్షిణాఫిక్రాలో ప్రొజీరియా సోకిన చివరి వ్యక్తి ఈమే కావడం గమనార్హం. ఈమె మృతితో ఆ దేశంలో ప్రొజీరియా బాధితులు ఇంకెవరూ లేకుండాపోయారు.