కార్లు, బైక్‌లు కొనేవారికి సర్కార్ షాక్.. రిజిస్ట్రేషన్ల సెస్‌ పెంపు

కర్ణాటక సర్కార్ మరో సంచలన నిర్ణయం తీసుకుంది. కొత్త వాహనాలు కొన్నవారికి సెస్ పోటు విధించనుంది. ఈ మేరకు మోటారు వాహనాల పన్ను చట్టాన్ని సవరిస్తూ తీసుకువచ్చిన బిల్లును అసెంబ్లీలో ఆమోదం కల్పించింది. దీంతో కొత్తగా కార్లు, బైక్‌లు కొనుగోలు చేసినవారికి మరింత భారం పడనుంది. ఈ సెస్ విధించడం వల్ల ప్రభుత్వానికి ప్రతీ సంవత్సరం రూ.300 కోట్ల ఆదాయం వస్తుందని భావిస్తోంది. దీన్ని రవాణా రంగంలో ప్రత్యక్షంగా, పరోక్షంగా పనిచేస్తున్నవారి సంక్షేమం కోసం ఖర్చు చేస్తామని మంత్రి వెల్లడించారు. అయితే ఈ మోటారు వాహనాల పన్ను చట్టాన్ని సవరించడాన్ని ప్రతిపక్ష బీజేపీ తీవ్రంగా విమర్శించింది.

కర్ణాటక అసెంబ్లీ సమావేశాల్లో భాగంగా కర్ణాటక మోటారు వాహనాల పన్ను చట్టం 1957ను సవరిస్తూ అసెంబ్లీలో రవాణా శాఖ మంత్రి రామ లింగారెడ్డి ఒక బిల్లును ప్రవేశపెట్టగా.. దానికి ఆమోదం లభించింది. దీని ప్రకారం ఇకపై కర్ణాటకలో కొన్న కొత్త బైక్‌లు, కార్లకు అదనపు సెస్ విధించనున్నారు. ఇందులో బైక్‌లకు రూ.500.. కార్లకు రూ.1000 అదనపు సెస్‌ వసూలు చేయనున్నారు. కొత్తగా విధించే సెస్ వల్ల.. కర్ణాటక రాష్ట్ర ఖజానాకు ఏటా రూ.300 కోట్ల ఆదాయం సమకూరుతుందని మంత్రి రామ లింగారెడ్డి ప్రకటించారు.

కర్ణాటకలో రవాణా రంగంపై ప్రత్యక్షంగా, పరోక్షంగా ఆధారపడి డ్రైవర్లు, మెకానిక్‌లు, ఇతర సిబ్బంది.. సుమారు 30 లక్షల మంది ఉన్నారని మంత్రి తెలిపారు. ఈ క్రమంలోనే వారి సంక్షేమం కోసం ఒక బోర్డును కూడా ఏర్పాటు చేసినట్లు రవాణా శాఖ మంత్రి రామ లింగారెడ్డి గుర్తు చేశారు. వారికోసం ఖర్చయ్యే నిధులను సమకూర్చడానికి ఇది ఒక శాశ్వత ఆధారంగా ఉంటుందని చెప్పారు. ఈ రూ.300 కోట్ల ఆదాయాన్ని.. రవాణా రంగంలోకి కార్మికులు, ఉద్యోగుల సంక్షేమానికి ఖర్చు చేస్తామని తెలిపారు.

ఇక కొత్తగా కొనే వాహనాలపై కర్ణాటక సర్కార్ అదనపు సెస్‌ విధించడంపై బీజేపీ తీవ్ర విమర్శలు చేసింది. కర్ణాటక అసెంబ్లీ ఎన్నికల సమయంలో కాంగ్రెస్ పార్టీ ఇచ్చిన ఐదు గ్యారంటీలు అమలు చేసేందుకు నిధులు లేక సిద్ధరామయ్య ప్రభుత్వం తీవ్ర ఇబ్బందులు పడుతోందని మండిపడింది. దీంతో ఆదాయాన్ని పెంచుకునేందు మార్గాలు వెతుకుతూ ప్రజలపై అదనపు పన్ను భారాన్ని మోపుతోందని ఆరోపణలు గుప్పించింది. ఇప్పటికే ఇంధనంపై పన్నులను అధికం చేశారని.. ఇప్పుడు వాహనాలపై కూడా ఈ అదనపు భారం ఎందుకు అని బీజేపీ నేత అశోక విమర్శలు చేశారు. ప్రజలను ఇలా పన్నులతో బాధపెట్టడం మానుకోండని ఆయన డిమాండ్‌ చేశారు.

కర్ణాటకలో సిద్ధరామయ్య సర్కార్ అమలు చేస్తున్న 5 గ్యారంటీల వల్ల ఏటా ప్రభుత్వ ఖజానాపై రూ.60 వేల కోట్ల భారం పడుతోందని బీజేపీ నేత, మాజీ మంత్రి అశ్వత్‌ నారాయణ వెల్లడించారు. కేంద్ర ప్రభుత్వం నుంచి కూడా వచ్చే ఆదాయ మార్గాలు కూడా లేకపోవడంతో కొత్తగా ప్రజలపై ఎలాంటి పన్నులు, సెస్‌లు విధించాలనే లక్ష్యంతో కర్ణాటకలో కాంగ్రెస్ ప్రభుత్వం పరిపాలన సాగిస్తోందని మండిపడ్డారు.