బోనస్ షేర్లపై కంపెనీ ప్రకటన.. దెబ్బకు 20 శాతం దూసుకెళ్లిన స్టాక్.. ఇన్వెస్టర్లకు లాభాల పంట!

స్టాక్ మార్కెట్లలో కొన్ని షేర్లు ఊహించని రీతిలో దూసుకెళ్తుంటాయి. చిన్న కారణంతో కూడా ఒక్కసారిగా భారీగా పెరిగే స్టాక్స్ చాలానే ఉంటాయి. ఇందుకోసం మార్కెట్లపై మంచి అవగాహన ఉండాలి. ఆయా కంపెనీలకు సంబంధించి చిన్న ప్రకటన కూడా వదలొద్దు. కంపెనీల నుంచి ప్రకటనలు, ప్రణాళికలు, పెట్టుబడి వ్యూహాలు, భవిష్యత్తు ప్రణాళికలు ఇలా ఇవన్నీ స్టాక్స్‌పై ప్రభావం చూపిస్తుంటాయి. ఇప్పుడు ఇదే బాటలో ఒక స్టాక్ ఇన్వెస్టర్లకు బంపర్ రిటర్న్స్ అందిస్తోంది. శుక్రవారం సెషన్లో (డిసెంబర్ 20న) ఏకంగా 20 శాతం పెరిగిందీ షేరు. ఇది రియల్ ఎస్టేట్ అండ్ ఇంటర్నేషనల్ ట్రేడ్ సెక్టార్లో కార్యకలాపాలు నిర్వహిస్తోంది. ఇదే కొఠారి ప్రొడక్ట్స్ లిమిటెడ్.

ఈ స్టాక్ శుక్రవారం రోజు 20 శాతం పెరిగి NSE లో రూ. 205.06 వద్ద గరిష్టాన్ని నమోదు చేసింది. కిందటి సెషన్లో రూ. 170.89 వద్ద ముగియగా.. ఇవాళ స్వల్ప లాభాలతోనే ప్రారంభమై.. తర్వాత 20 శాతం అప్పర్‌సర్క్యూట్ కొట్టింది. దీంతో మార్కెట్ విలువ ప్రస్తుతం రూ. 611.98 కోట్లకు చేరింది. ఇక స్టాక్ 52 వారాల గరిష్ట ధర రూ. 227.70 కాగా.. కనిష్ట ధర రూ. 111 గా ఉంది.

ఒక్క చిన్న కారణంతోనే ఈ స్టాక్ దూసుకెళ్లడం విశేషం. కంపెనీ బోనస్ షేర్లను ప్రకటించనున్నట్లు తెలిపింది. ఈ మేరకు గురువారం రోజు ఎక్స్చేంజి ఫైలింగ్‌లో వెల్లడించింది. బోర్డు 2024, డిసెంబర్ 27న సమావేశం కానుందని.. బోనస్ ఇష్యూ గురించి పరిశీలించనున్నట్లు.. బోర్డు ఆమోదం తెలిపాక షేర్లను మంజూరు చేయనున్నట్లు తెలిపింది.

దీనికి బోర్డు ఆమోదం తెలిపితే.. కంపెనీ బోనస్ షేర్లను జారీచేయనుండటం మూడోసారి కానుంది. ఇదివరకు రెండు సార్లు వరుసగా 2014, 2016లో బోనస్ షేర్లను జారీ చేసింది. అప్పుడు వరుసగా 2:1, 1:2 రేషియోలో బోనస్ షేర్లు ప్రకటించింది. గత కొన్నేళ్లుగా ఈ కొఠారి షేర్లు మల్టీబ్యాగర్ రిటర్న్స్ ఇచ్చాయి. నెల వ్యవధిలో 30 శాతానికిపైగా పెరగ్గా.. 6 నెలల్లో 50 శాతానికిపైగా రిటర్న్స్ ఇచ్చాయి. ఈ ఏడాదిలో ఇప్పటివరకు 60 శాతానికిపైగా పుంజుకున్నాయి. ఏడాది వ్యవధిలో షేరు 65 శాతం పెరిగింది. గత ఐదేళ్లలో ఏకంగా 230 శాతం షేరు పెరిగింది. ఇదే సమయంలో 2020 మార్చిలో రూ. 34.30గా ఉన్న షేరు.. 497 శాతం పెరిగి 2024లో ప్రస్తుత స్థాయికి చేరింది. అయితే ఇది రికమెండేషన్ మాత్రం కాదు. కేవలం స్టాక్ పెర్ఫామెన్స్ గురించి మాత్రమే చెబుతున్నాం.