రూ.1000, రూ.2000 నోట్లు మళ్లీ తీసుకొస్తున్నారా? క్లారిటీ ఇచ్చిన కేంద్రం

మన దేశంలో పెద్ద నోట్లు తీసుకురావడం ఆ తర్వాత రద్దు చేయడం అనేది స్వాతంత్య్రానికి ముందు నుంచే జరుగుతోంది. దేశంలో రూ.10 వేల నోట్లు కూడా ఉపయోగించారు. 90లో పుట్టిన వారికి పెద్ద నోట్లు అంటే రూ.500, రూ.1000. అయితే, వీటిని కేంద్ర ప్రభుత్వం 2016లో రద్దు చేసింది. వాటి స్థానంలో రూ.500, రూ.2000 కొత్త నోట్లను మార్కెట్లోకి తీసుకొచ్చింది. మళ్లీ 2019లో క్లీన్ నోట్ పాలసీ కింద రూ.2000 నోట్లను చలామణి నుంచి ఉపసంహరించుకున్న సంగతి తెలిసిందే. ఇప్పుడు రూ.500 నోటు మాత్రమే పెద్ద నోటుగా ఉంది. ఈ క్రమంలో మళ్లీ రూ.1000, రూ.2000 నోట్లు తీసుకొస్తారనే చర్చ సోషల్ మీడియాలో కొనసాగుతోంది. దీంతో ఈ విషయంపై పార్లమెంటులో క్లారిటీ ఇచ్చింది కేంద్ర ప్రభుత్వం.

రూ.500 పైన విలువ గల కరెన్సీ నోట్లను మళ్లీ చలామణిలోకి తీసుకురావాలనే ప్లాన్ ఏదీ లేదని కేంద్ర ఆర్థిక మంత్రిత్వ శాఖ స్పష్టం చేసింది. పెద్ద నోట్లను మళ్లీ తీసుకొస్తున్నారా అని రాజ్యసభలో ఎంపీ ఘన్‌శ్యామ్ తివారీ అడిగిన ప్రశ్నకు కేంద్ర ఆర్థిక మంత్రిత్వ శాఖ సహాయ మంత్రి పంకజ్ చౌదరీ సమాధానం ఇచ్చారు. అలాంటి ప్రణాళికలు ఏమీ లేవని తేల్చేశారు. అయితే, రూ.2000 నోట్ల చలామణి, మళ్లీ పెద్ద నోట్ల ముద్రణ వంటి అంశాలపై ఆర్థిక శాఖకు పలు ప్రశ్నలు సంధించారు ఎంపీ తివారీ. రూ.2000 బ్యాంక్ నోట్లపై పూర్తి వివరాలు ఇవ్వాలని కోరారు. చలామణిలోకి తెచ్చినప్పుడు ఎన్ని ఉన్నాయి? ఉపసంహరించుకునేటప్పు ఎన్ని ఉన్నాయి? ప్రస్తుతం చలామణిలో ఎన్ని ఉన్నాయి? అనే వివరాలు వెల్లడించాలన్నారు.

ఎంపీ తివారీ అడిగిన ప్రశ్నకు ఆర్థిక శాఖ సహాయ మంత్రి పంకజ్ చౌదరీ సమాధానమిచ్చారు. 'రిజర్వ్ బ్యాంక్ ఆఫ్ ఇండియా యాక్ట్ 1934లోని సెక్షన్ 24(1) ప్రకారం 2016, నవంబర్‌లో ఆర్‌బీఐ రూ.2000 విలువ గల బ్యాంక్ నోట్లను చలామణిలోకి తీసుకొచ్చింది. మార్చి 31, 2027 నాటికి చలామణిలో ఉన్న నోట్లు 32,850 లక్షలు. అవి మార్చి 31, 2018 నాటికి 33,632 లక్షలకు పెరిగాయి. అయితే, 2023, మే 19న ఉపసంహరణ తర్వాత అవి 17,793 లక్షలకు తగ్గాయి. అందులో నవంబర్ 15, 2024 వరకు 17,447 లక్షల నోట్లు రిజర్వ్ బ్యాంక్ వద్దకు తిరిగివచ్చాయి. ఇంకో 346 లక్షల నోట్లు చలామణిలో ఉన్నాయి.' అని కేంద్ర మంత్రి వివరాలు వెల్లడించారు.

ఇంకా చలామణిలో ఉన్న రూ.2000 కరెన్సీ నోట్లను మార్చుకునేందుకు వీలుంది. రిజర్వ్ బ్యాంకుకు చెందిన 19 ప్రాంతీయ కార్యాలయాల్లో వీటిని మార్చుకోవచ్చు. నేరుగా వెళ్లడం లేదా ఇండియా పోస్ట్ ద్వారా నోట్లు పంపించి బ్యాంకు ఖాతాలో డిపాజిట్ చేసుకోవచ్చు. పెద్ద నోట్లను ప్రభుత్వం మళ్లీ తీసుకువస్తుందన్న చర్చ మొదలైన క్రమంలో కేంద్ర ప్రభుత్వం క్లారిటీ ఇచ్చింది.