మొన్న అలా.. ఈ రోజు ఇలా.. జగన్ ఫ్లెక్సీలో అల్లు అర్జున్

వైసీపీ అధినేత వైఎస్ జగన్ మోహన్ రెడ్డి శుక్రవారం పుట్టినరోజు జరుపుకుంటున్నారు. వైఎస్ జగన్ పుట్టినరోజు సందర్భంగా ఆంధ్రప్రదేశ్ వ్యాప్తంగా వైసీపీ శ్రేణులు వేడుకలు నిర్వహిస్తున్నాయి. వైఎస్ జగన్ పుట్టినరోజు వేడుకల్లో భాగంగా కటౌట్లు, ఫ్లెక్సీలు ఏర్పాటు చేస్తున్నారు. అయితే ఎన్టీఆర్ జిల్లా నందిగామలో ఏర్పాటుచేసిన ఫ్లెక్సీ ఇప్పుడు నెట్టింట వైరల్ అవుతోంది. దీనిపై ఆసక్తికరమైన చర్చ జరుగుతోంది. ఎన్టీఆర్ జిల్లా నందిగామలో వైసీపీ యూత్ పేరిట ఓ ఫ్లెక్సీ ఏర్పాటు చేశారు. ఇందులో వైఎస్ జగన్, అల్లు అర్జున్ ఫోటోలను పక్క పక్కన ఉంచారు. హ్యాపీ బర్త్‌డే టార్చ్ బేరర్ అంటూ క్యాప్షన్ ఇచ్చారు. అలాగే రాజు బలవంతుడైనప్పుడే శత్రువులు అందరూ ఏకమవుతారు అంటూ కొటేషన్ పెట్టారు. ఈ ఫ్లెక్సీ ఇప్పుడు నెట్టింట వైరల్ అవుతోంది.

అయితే అల్లు అర్జున్‌కు వైసీపీ అభిమానులు, కార్యకర్తల నుంచి మద్దతు లభిస్తున్న సంగతి తెలిసిందే. నంద్యాల వైసీపీ అభ్యర్థి శిల్పా రవిచంద్ర కిషోర్ రెడ్డికి మద్దతుగా అల్లు అర్జున్ ప్రచారానికి వచ్చినప్పటి నుంచి వైసీపీ ఫ్యాన్స్, అల్లు అర్జున్‌కు సపోర్టుగా నిలుస్తున్నారు. అలాగే అంబటి రాంబాబు వంటి నేతలు కూడా అల్లు అర్జున్ మద్దతుగా బహిరంగ ప్రకటనలు చేస్తున్నారు. ఇక డిసెంబర్ 4వ తేదీ పుష్ప 2 సినిమా విడుదల సందర్భంగానూ పలుచోట్ల వైసీపీ శ్రేణులు, వైఎస్ జగన్ అల్లు అర్జున్ ఫ్లెక్సీలు, కటౌట్లు ఏర్పాటు చేశాయి. అనంతపురం జిల్లా గుత్తిలో ఏర్పాటు చేసిన ఫ్లెక్సీ వైరల్ అయిన సంగతి తెలిసిందే. అల్లు అర్జున్, వైఎస్ జగన్ ఫోటోలతో ఫ్లెక్సీ ఏర్పాటు చేసిన వైసీపీ శ్రేణులు.. మా కోసం నువ్వు వచ్చావు..మీ కోసం మేము వస్తాం.. మీ అభిమానం కోసం దేనికైనా తగ్గేదేలే అంటూ క్యాప్షన్ పెట్టారు. ఈ ఫ్లెక్సీ సోషల్ మీడియాలో వైరల్ అయ్యింది.

ఇక ఇప్పుడు వైఎస్ జగన్ పుట్టినరోజు సందర్భంగా నందిగామలో ఇలాంటి ఫ్లెక్సీ కనిపించింది. రాజు బలవంతుడు అయినప్పుడు శత్రువులు అందరూ ఒక్కటవుతారు అంటూ ఫ్లెక్సీ వేయించారు. రాజకీయంగా వైఎస్ జగన్ ఓ వైపు ఉండగా... కూటమి పార్టీలన్నీ మరో వైపు ఉన్నాయి. అలాగే అల్లు అర్జున్ విషయంలోనూ మెగా ఫ్యామిలీ నుంచి మద్దతు రావడం లేదనే అర్థం వచ్చేలా ఈ ఫ్లెక్సీ ఏర్పాటు చేశారు. ఈ ఫ్లెక్సీ నెట్టింట వైరల్ అవుతుండగా.. సోషల్ మీడియాలో ఆసక్తికర చర్చ జరుగుతోంది. మెగా అల్లు ఫ్యామిలీలు కలిసిపోతున్న సమయంలో విభేదాలు తెచ్చే ప్రయత్నమంటూ కొంతమంది కామెంట్లు పెడుతున్నారు.