అమెరికా మాజీ అధ్యక్షుడుకి అస్వస్థత.. బిల్ క్లింటన్‌ ఆరోగ్య పరిస్థితి ఎలా ఉందంటే

అగ్రరాజ్యం అమెరికా మాజీ అధ్యక్షుడు బిల్ క్లింటన్ అస్వస్థతకు గురయ్యారు. 78 ఏళ్ల వయసు కల్గిన ఆయనకు ఇటీవలే జ్వరం వచ్చింది. అయితే ఎంతకూ తగ్గకపోవడంతో.. ఆయనను కుటుంబ సభ్యులు వాషింగ్టన్‌లోని జార్జ్‌టౌన్ యూనివర్సిటీ మెడికల్ సెంటర్ ఆస్పత్రిలో చేర్పించారు. ఇదే విషయాన్ని ఆయన వ్యక్తిగత సిబ్బంది సోషల్ మీడియా వేదికగా తెలిపింది. బిల్ క్లింటన్ ప్రస్తుతం ఆసుపత్రిలో చికిత్స పొందుతున్నారని.. ఆయన ఆరోగ్య పరిస్థితికి సంబంధించిన సమాచారాన్ని ఎప్పటికప్పుడు ప్రజలకు తెలియజేస్తామని వివరించారు. ఆ పూర్తి వివరాలు ఏంటో మనం ఇప్పుడు తెలుసుకుందాం.

బిల్ క్లింటన్‌కు ఇటీవలే జ్వరం రాగా.. ఎంతకూ తగ్గకపోవడంతో సోమవారం రోజు ఆస్పత్రిలో చేరినట్లు క్లింటన్ డిప్యూటీ చీఫ్ ఆఫ్ స్టాల్ ఏంజెల్ యురేనా తెలిపారు. ఎక్స్ వేదికగా.. పలు పరీక్షలతో పాటు చికిత్స నిమిత్తం ఆయన ఆస్పత్రిలో చేరినట్లు స్పష్టం చేశారు. అంతేకాకుండా ఆయన ఆరోగ్య పరిస్థితి ప్రస్తుతం నిలకడగానే ఉన్నట్లు వైద్యులు వెల్లడించారని వివరించారు. అలాగే ఆస్పత్రి సిబ్బంది ఆయనను చాలా బాగా చూసుకుంటూ.. మెరుగైన సేవలు అందిస్తున్నారని దాని పట్ల బిల్ క్లింటర్ చాలా సంతృప్తిగా ఉన్నట్లు కూడా ఏంజెల్ యురేనా చెప్పుకొచ్చారు. క్రిస్మస్ రోజుకు ఆయన ఇంటికి తిరిగి వస్తారాని ఆశాభావం వ్యక్తం చేశారు.

బిల్ క్లింటర్ 1993 నుంచి 2001 వరకు రెండు పర్యాయాలు అమెరికా అధ్యక్షుడిగా పని చేశారు. 2024 వేసవి కాలంలో చికాగోలో జరిగిన డెమోక్రటిక్ నేషనల్ కన్వెన్షన్‌లో ప్రసగించారు. అలాగే ఇటీవలే జరిగిన అమెరికా ఎన్నికల్లో కమల హారిస్ కోసం ప్రచారం చేశారు. కానీ ఆమె ఓడిపోగా.. డొనాల్డ్ ట్రంప్ ఎన్నికల్లో విజయం సాధించారు. ఇదంతా ఇలా ఉండగా.. బిల్ క్లింటన్ గతంలోనూ అనేక ఆరోగ్య సమస్యల బారిన పడ్డారు.

2001 తర్వాత పదవీ బాధ్యతల నుంచి తప్పుకున్న బిల్ క్లింటన్‌కు తీవ్ర ఆరోగ్య సమస్యలు వచ్చాయి. 2004లో తీవ్ర ఛాతి నొప్పి, శ్వాసకోస సమస్యలు రావడంతో ఆయనకు మొత్తం నాలుగు సార్లు బైపాస్ సర్జరీ నిర్వహించారు వైద్యులు. వాటి నుంచి కోలుకున్న ఏడాదికే మళ్లీ ఊపిరితిత్తుల సమస్య వచ్చింది. ఇలా ఆయన మళ్లీ ఆస్పత్రిలో చేరారు. ఆ తర్వాత 2010లో గుండె సంబంధిత సమస్యలతో మరోసారి శస్త్ర చికిత్స చేసుకున్నారు. అలాగే రెండు స్టంట్లు కూడా అమర్చారు. ఆ తర్వాత చాలా ఏళ్ల పాటు ఆరోగ్యంగా ఉన్నారు బిల్ క్లింటన్.

కానీ రెండేళ్ల క్రితం అంటే 2021లో కరోనా బారిన పడ్డారు. దీని వల్ల మొత్తం ఆరు రోజురు కాలిఫోర్నియాలోని ఆస్పత్రిలో ఉండాల్సి వచ్చింది. ఆ తర్వాత కొంత కాలానికే మళ్లీ మూత్రనాళ ఇన్ఫెక్షన్ రావడంతో మళ్లీ ఆస్పత్రుల చుట్టూ తిరుగుతూ చికిత్స పొందారు. రెండేళ్లు బాగానే ఉన్న బిల్ క్లింటన్‌కు తాజాగా జ్వరం రావడంతో మళ్లీ ఆస్పత్రికి వచ్చారు. అయితే ప్రస్తుతం పరిస్థితి బాగానే ఉన్నందున త్వరగా ఆయన ఆస్పత్రి నుంచి డిశ్ఛార్జీ కాబోతున్నట్లు తెలుస్తోంది. చూడాలి మరి బిల్ క్లింటన్ ఎప్పుడు ఇంటికి వెళ్లబోతున్నారనేది.