మగ టీచర్‌కు ప్రసూతి సెలవులు.. వారం రోజులు ఎంజాయ్, ఎలా బయటికొచ్చిందంటే?

కొన్ని సార్లు కొన్ని సంఘటనలు వింటే ఆశ్చర్యం వేయక మానదు. అయితే మహిళలు అంటే నవమాసాలు మోసి బిడ్డకు జన్మనిస్తారు. అలాంటి వారి పట్ల మానవత్వంతో ప్రభుత్వాలు, కంపెనీలు.. వారికి వేతనంతో కూడిన ప్రసూతి సెలవులను ఇస్తూ ఉంటాయి. ప్రభుత్వం మాత్రమే కాకుండా ప్రైవేటు సంస్థలు కూడా ఈ ప్రసూతి సెలవులు ఇస్తూ ఉంటాయి. అయితే విచిత్రంగా ఈ ప్రసూతి సెలవులు ఓ పురుష ఉపాధ్యాయుడికి ఇవ్వడం ఇప్పుడు తీవ్ర చర్చనీయాంశంగా మారింది. ఈ ఘటనలో వారం రోజుల పాటు ప్రసూతి సెలవులు తీసుకున్న ఆ ఉపాధ్యాయుడికి సంబంధించిన స్క్రీన్‌షాట్ ఇప్పుడు సోషల్ మీడియాలో లీక్ కావడంతో నెటిజన్లు కామెంట్లతో తెగ హల్‌చల్ చేస్తున్నారు. బీహార్‌లో జరిగిన ఈ సంఘటన ఇప్పుడు సోషల్ మీడియాలో తెగ వైరల్ అవుతోంది.

బీహార్‌ రాష్ట్రంలో ఒక ఆసక్తికర సంఘటన చోటుచేసుకుంది. హాలిడేస్ కోసం అప్లై చేసుకున్న ఓ గవర్నమెంట్ టీచర్‌కు ప్రసూతి సెలవులు మంజూరు అయ్యాయి. అయితే అతడు పురుషుడు కావడం గమనార్హం. అంతేకాకుండా తనకు వచ్చిన ఆ ప్రసూతి సెలవులను సదరు ఉపాధ్యాయుడు వినియోగించుకుని.. వారం మొత్తం వాడుకోవడం మరో విశేషం. వైశాలీ జిల్లాలో వెలుగు చూసిన ఈ వ్యవహారం ఇప్పుడు తీవ్ర విమర్శలకు తావిస్తోంది. ఈ ఘటన కాస్తా ఉన్నతాధికారులకు చేరడంతో వారు స్పందించారు. జరిగిన తప్పును సరిచేసిన ఉన్నతాధికారులు.. ఈ వ్యవహారంపై దర్యాప్తు చేయిస్తామని తేల్చి చెప్పారు. మరోసారి ఇలాంటి ఘటనలు పునరావృతం కాకుండా చర్యలు తీసుకుంటామని స్పష్టం చేశారు.

ఇక బీహార్ ప్రభుత్వ ఉపాధ్యాయులు.. సెలవుల కోసం రాష్ట్ర ప్రభుత్వ విద్యాశాఖ అధికారిక వెబ్‌సైట్‌ అయిన ఈ-శిక్షా కోశ్‌లోనే దరఖాస్తు చేసుకోవాల్సి ఉంటుంది. ఈ క్రమంలోనే వైశాలీ జిల్లాలోని హసన్‌పుర్‌ ప్రభుత్వ ఉన్నత పాఠశాలలో ఉపాధ్యాయుడిగా పనిచేస్తున్న జితేంద్ర కుమార్‌ సింగ్‌.. సెలవుల కోసం ఇటీవల అప్లై చేసుకున్నాడు. అయితే మహిళలకు మాత్రమే అందుబాటులో ఉండే ప్రసూతి సెలవులు కాస్తా జితేంద్ర కుమార్ సింగ్‌కు మంజూరు అయ్యాయి. దీంతో వాటిని అతడు వినియోగించుకుని వారం రోజులు ఎంజాయ్ చేశాడు.

అయితే ప్రభుత్వ ఉపాధ్యాయుల సెలవుల దరఖాస్తుకు సంబంధించిన పోర్టల్‌లో ఈ వ్యవహారం కాస్తా బయటికి వచ్చింది. జితేంద్ర కుమార్ సింగ్ సెలవులకు సంబంధించి స్క్రీన్‌షాట్‌ సోషల్ మీడియాలో వైరల్‌ కావడంతో ఈ ఘటన వెలుగులోకి వచ్చింది. దీనిపై స్థానిక విద్యాశాఖ అధికారులు వెంటనే స్పందించారు. ఈ-శిక్షా కోశ్ వెబ్‌సైట్‌లో తలెత్తిన టెక్నికల్ సమస్య కారణంగానే జితేంద్ర కుమార్ సింగ్‌కు ప్రసూతి సెలవులు మంజూరు అయి ఉండవచ్చని పేర్కొన్నారు. దీన్ని గుర్తించిన వెంటనే దాన్ని సరిచేయడంతోపాటు ఈ వ్యవహారంపై సమగ్ర దర్యాప్తు చేయిస్తామని ఉన్నతాధికారులు హామీ ఇచ్చారు. ఇక ఒక పురుష ఉపాధ్యాయుడికి ప్రసూతి సెలవులు మంజూరు చేయడం పట్ల నెటిజన్లు తీవ్ర విమర్శలు గుప్పిస్తున్నారు.