అమెరికా జాతీయ పక్షి అదేనంటున్న బైడెన్.. 240 ఏళ్లకు మోక్షం

మరికొన్ని రోజుల్లో అమెరికా అధ్యక్ష పదవీ నుంచి తప్పుకోనున్న జో బైడెన్.. మంగళవారం రోజు అమెరికా జాతీయ పక్షిగా ది బాల్డ్ ఈగిల్‌ను అధికారికంగా ప్రకటించారు. కాంగ్రెస్ ఆమోదించిన ఈ బిల్లుపై జో బైడెన్ సంతకం చేశారు. ఎన్నో దశాబ్దాలుగా ఈ పక్షినే చిహ్నంగా వాడుతున్నప్పటికీ.. అధికారికంగా హోదా కల్పించలేదు. కానీ దాదాపు 240 సంవత్సరాల తర్వాత అమెరికా జాతీయ పక్షిని ఖరారు చేయడంతో అంతా తెగ సంబురపడిపోతున్నారు. ఆ విశేషాలు ఏంటో మనం ఇప్పుడు తెలుసుకుందాం.

1782వ సంవత్సరం నుంచి ది బాల్డ్ ఈగిల్‌ను అమెరికా చిహ్నంగా వాడుతున్నారు. ముఖ్యంగా ప్రభుత్వానికి సంబంధించిన రాజ ముద్రలపై కూడా దీన్ని ఉంచారు. ఆ తర్వాత అనేక సార్లు దీన్ని మార్చాలని ప్రయత్నాలు కూడా చేశారు. కానీ అవన్నీ విఫలం కావడంతో అనేక సంవత్సరాల పాటు ఇదే పక్షిని చిహ్నంగా వాడుకున్నారు. అయితే తాజాగా అమెరికా అధ్యక్షుడు జో బైడెన్ ఒక్క సంతకం చేసిన బాల్డ్ ఈగిల్‌ను అమెరికా జాతీయ పక్షిగా మార్చేశారు.

డిసెంబర్ 16వ తేదీన సభ ఏకగ్రీవ ఆమోదం!

తెల్లటి తల, పసుపు పచ్చ ముక్కుతో పాటు గోధుమ రంగు శరీరం కల్గిన ఈ పక్షిని జాతీయ పక్షిగా ఎంపిక చేస్తూ.. డిసెంబర్ 16వ తేదీన సెనెట్‌లో మిన్నెసోటాకు చెందిన అమీ క్లోజౌచెర్ ప్రవేశ పెట్టారు. అయితే ఈ బిల్లను సభ ఏకగ్రీవంగా ఆమోదించారు. ఈ బిల్లుకు సహప్రాయోజకుడిగా ఉన్న సిథియా లూమిస్.. 240 సంవత్సరాలు అమెరికా విలువలకు ప్రతీకగా ఉన్న ఈ బాల్డ్ ఈగిల్.. ఇప్పటికీ అధికారిక పక్షి కాలేకపోయిందని వివరించారు. సభ ఏకగ్రీవంగా ఆమోదంచిన ఈ బిల్లు అమెరికన్ల బలమైన స్వేచ్ఛకు చిహ్నంగా ఆ పక్షి స్థానాన్ని మరింత బలోపేతం చేసిందంటూ కామెంట్లు చేశారు.

ఆ తర్వాత ఈ బిల్లును ప్రతినిధుల సభకు పంపారు. వాళ్లు కూడా ఆమోదించగా.. తాజాగా బిల్లు అధ్యక్షుడు జో బైడెన్ వద్దకు వచ్చింది. ఇలా ఆయన కూడా మంగళవారం రోజు సంతకం చేయగా.. యూఎస్ జాతీయ పక్షి హోదాను అందుకుంది ది బాల్డ్ ఈగిల్. ఈ విషయం తెలుసుకున్న అమెరికా వాసులంతా తెగ సంబుర పడిపోతున్నారు. ఇన్నాళ్ల ఎదురు చూపులకు మోక్షం కల్గిందని.. చివరకు అమెరికాకు జాతీయ పక్షి హోదా వచ్చిందని చెబుతున్నారు. మరోవైపు అమెరికా జాతీయ పుష్పంగా గులాబీ పువ్వు ఉండగా.. జాతీయ చెట్టుగా ఓక్ ఉంది.