సిప్ ట్రిక్.. నెలకు రూ. 5 వేలు, రూ. 10 వేలు, రూ. 15 వేలు జమ.. పదేళ్లలో ఎంతొస్తుందో తెలుసా

స్టాక్ మార్కెట్లు ఇటీవలి రికార్డు స్థాయి గరిష్టాల్ని చేరిన నేపథ్యంలో.. ఎంతో మంది మదుపరులు కొత్తగా మ్యూచువల్ ఫండ్లలో ఇన్వెస్ట్ చేసేందుకు ఆసక్తి చూపిస్తున్నారు. ఈక్విటీ మ్యూచువల్ ఫండ్లలోకి పెట్టుబడులు పెద్ద ఎత్తున వస్తున్నాయి. దీర్ఘకాలంలో సంపద సృష్టిలో మ్యూచువల్ ఫండ్స్ కీలక పాత్ర పోషిస్తాయని చెప్పొచ్చు. మన ఆర్థిక లక్ష్యాలకు అనుగుణంగా వీటిని ఎంచుకోవచ్చు. రిస్క్ భరించే సామర్థ్యాన్ని బట్టి ఇక్కడ వేర్వేరు ఫండ్స్ అందుబాటులో ఉంటాయి. పూర్తి సమాచారం తెలుసుకొని.. నిపుణుల నుంచి సలహాలు తీసుకొని మాత్రమే సరైన పథకంలో ఇన్వెస్ట్ చేయాలి. అప్పుడే.. కొన్నేళ్లలో పిల్లల చదువు, వారి వివాహాలు, రిటైర్మెంట్ ప్రణాళికలు, ఇంటి లోన్ తీర్చుకోవడం, సొంతిల్లు వంటివి సాకారం చేసుకోవచ్చు.

మ్యూచువల్ ఫండ్లలో ముఖ్యంగా ఏకకాలంలో ఇన్వెస్ట్ చేయొచ్చు లేదా సిప్ రూపంలో నెలనెలా పెట్టుబడులు పెట్టొచ్చు. అయితే.. సిప్ ద్వారా మదుపు చేస్తున్న వారు పెద్దగా ఆందోళన చెందాల్సిన అవసరం ఉండదు. మార్కెట్ గమనం ఎటున్నా.. నెలనెలా మదుపు చేస్తూ వెళ్లడమే ఇక్కడ కలిసొస్తుంది. ఒకేసారి పెద్ద మొత్తంలో ఇన్వెస్ట్ చేయలేని వారికి కూడా సిప్ పనికొస్తుంది. ప్రారంభంలో చిన్న మొత్తాల్లో సిప్ చేస్తూ.. కాలం గడుస్తున్న కొద్దీ లేదా ఏటా పెంచుకుంటూ పోవాలి. అప్పుడు కొన్ని సంవత్సరాల్లో పెద్ద మొత్తంలో రాబడి అందుకోవచ్చు.

సాధారణంగా చాలా వరకు మ్యూచువల్ ఫండ్స్ దీర్ఘకాలంలో మంచి రాబడుల్నే అందిస్తుంటాయి. సగటున 12 శాతం వరకు ఉంటాయని చెప్పొచ్చు. ఇప్పుడు మనం నెలకు రూ. 5 వేలు, 10 వేలు, రూ. 15 వేల చొప్పున సిప్ చేస్తే.. 12 శాతం రాబడి అంచనాతో.. పదేళ్లలో ఎంతవుతుందో తెలుసుకుందాం.

పది సంవత్సరాలకు నెలకు రూ. 5 వేల చొప్పున సిప్ చేస్తూ పోతే.. అప్పుడు పెట్టుబడి రూ. 6 లక్షలు అవుతుంది. అప్పుడు 12 శాతం రాబడి చొప్పున రూ. 5.61 లక్షల లాభం రావొచ్చు. అంటే మొత్తం ఈ సంపద రూ. 11.61 లక్షలుగా మారుతుంది. అదే 10 శాతం రాబడి లెక్కన అయితే ఇది రూ. 10.32 లక్షలవుతుంది.

ఇదే రూ. 10 వేల సిప్ చొప్పున చూస్తే.. 12 శాతం రిటర్న్స్‌కు రూ. 23.23 లక్షలు వస్తుంది. 10 శాతానికి అయితే ఇది రూ. 20.65 లక్షలవుతుంది. ఇక నెలకు రూ .15 వేలు సిప్ చేస్తే.. అప్పుడు 10 శాతం చొప్పున అయితే రూ. 30.98 లక్షలు, 12 శాతం లెక్కన రూ. 34.85 లక్షలుగా మారుతుంది.