మన్మోహన్ సింగ్ మృతిపై బంగ్లాందేశ్ తాత్కాలిక ప్రధాని సంతాపం

భారతదేశ మాజీ ప్రధాని మన్మోహన్ సింగ్ డిసెంబర్ 26వ తేదీ రోజు 92 ఏళ్ల వయసులో తీవ్ర అనారోగ్యం పాలై కన్నుమూశారు. ఈయన మృతిపై దేశాధినేతలే కాకుండా.. వివిధ దేశాలకు చెందిన రాజకీయ ప్రముఖులు కూడా స్పందిస్తున్నారు. మన్మోహన్ సింగ్ మృతి పట్ల తీవ్ర సంతాపం వ్యక్తం చేస్తున్నారు. ముఖ్యంగా భారత్‌తో సత్సంబంధాలు లేని దేశాధినేతలు సైతం భారత మాజీ ప్రధాని ఆత్మకు శాంతి చేకూరాలని కోరుకుంటూ.. మన్మోహన్ సింగ్ మంచితనాన్ని ప్రపంచానికి చాటి చెబుతున్నారు. అయితే తాజాగా ఇదే పని చేశారు బంగ్లాదేశ్ తాత్కాలిక ప్రధాని మహమ్మద్ యూనస్. ఆ పూర్తి వివరాలు ఏంటో మనం ఇప్పుడు తెలుసుకుందాం.

92 ఏళ్ల వయసు కల్గిన మన్మోహన్ సింగ్ డిసెంబర్ 26వ తేదీ రోజు తీవ్ర అనారోగ్యం పాలయ్యారు. విషయం గుర్తించిన ఆయన కుటుంబ సభ్యులు వెంటనే ఆయనను ఎయిమ్స్ ఆస్పత్రికి తీసుకు వెళ్లారు. ఈక్రమంలోనే చికిత్స పొందుతూ మన్మోహన్ సింగ్ మృతి చెందారు. మాజీ ప్రధాని మృతితో దేశంలోని రాజకీయ ప్రముఖులు అంతా తీవ్ర దిగ్ర్భాంతి వ్యక్తం చేశారు. ముఖ్యంగా ఢిల్లీలోని నిగమ్ బోధ్ ఘాట్‌లో 28వ తేదీన అంత్యక్రియలు నిర్వహించగా.. వేలాది మంది పాల్గొన్నారు. మన్మోహన్ సింగ్‌ను కడసారిగా చూసి కన్నీళ్లు పెట్టుకున్నారు.

ఆ తర్వాతి రోజే మన్మోహన్ సింగ్ కుటుంబ సభ్యులు ఆయన అస్థికలను యమునా నదిలో కలిపారు. మజ్జు కా తిలా గురుద్వారా సమీపంలోని అష్ట్ ఘాట్ వద్ద సిక్కు సంప్రదాయాలను అనుసరించి.. మన్మోహన్ సింగ్ పెద్ద కూతురు ఉపిందర్ సింగ్ తన తండ్రి అస్థికలను నిమజ్జనం చేశారు. అలాగే కేంద్ర ప్రభుత్వం మన్మోహన్ సింగ్ మృతి ఏడు రోజుల పాటు సంతాప దినాలను నిర్వహిస్తోంది. ఈక్రమంలోనే తాజాగా బంగ్లాదేశ్ తాత్కాలిక ప్రభుత్వాధినేత మహమ్మద్ యూనస్.. మన్మోహన్ సింగ్ మృతిపై సంతాపం వ్యక్తం చేశారు.

మంగళవారం ఢాకాలోని భారత హైకమిషన్‌లో నివాళులు అర్పించారు. మన్మోహన్ సింగ్ చిత్ర పటానికి పూలమాల వేశారు. అనంతరం భారతదేశంలో మొదటి సిక్కు ప్రధాని అయిన మన్మోహన్ సింగ్ దేశానికి చేసిన సేవలను గుర్తు చేసుకున్నారు. మన్మోహన్ సింగ్ ఎంతో సాదాసీదాగా ఉండేవారని, ఆయన చాలా తెలివైన వారంటూ మహమ్మద్ యూనస్ చెప్పుకొచ్చారు. అలాగే సింగ్‌తో తనకు ఉన్న స్నేహాన్ని గుర్తు చేసుకుంటూ ఉద్వేగం చెందారు. ఆపై భారత దేశాన్ని గ్లోబల్ దిగ్గజంగా మార్చడంలో సింగ్ కీలక పాత్ర పోషించారని వివరించారు. అలాగే హైకమిషన్‌లోని సంతాప పుస్తకంలో సందేశం రాశారు.