ఫేస్‌బుక్ ప్రియురాలి కోసం పాకిస్థాన్ వెళ్లిన భారతీయుడు.. చివరకు ఎంత పనైంది

ఈమధ్య కాలంలో విదేశాలకు చెందిన అమ్మాయిలు, అబ్బాయిలను ప్రేమిస్తూ.. అనేక మంది పెళ్లిళ్లు కూడా చేసుకుంటున్నారు. ఇద్దరికీ నచ్చిన దేశంలో కాపురం పెట్టి.. తమ ప్రేమను ప్రపంచానికి చాటి చెబుతున్నారు. అలాంటి ప్రయత్నమే చేయబోయాడో భారతీయ యువకుడు. ముఖ్యంగా ఆన్‌లైన్ ద్వారా పాకిస్థాన్‌కు చెందిన ఓ అమ్మాయిని ప్రేమించి.. ఆమె కోసం దేశ సరిహద్దులను దాటాడు. ఇప్పటికే రెండు సార్లు ప్రయత్నం చేసి ఓడిపోయిన ఇతగాడు.. తాజాగా పాకిస్థాన్‌లోకి అడుగు పెట్టాడు. వెంటనే వెళ్లి తన ప్రియురాలిని కలుసుకున్నాడు. ఇన్నాళ్లూ తన మనసులో దాచుకున్న ఊసులన్నీ చెప్పాలనుకున్నాడు. కానీ చెప్పకుండానే ఆగిపోయాడు. కాదు ఆగిపోవాల్సి వచ్చింది. ఎందుకో తెలియాలంటే ఈ స్టోరీ చదవాల్సిందే.

ఉత్తర ప్రదేశ్‌లోని అలీగఢ్‌కు చెందిన 30 ఏళ్ల బాదల్ బాబుకు గత కొన్ని సంవత్సరాల క్రితం ఫేస్‌బుక్‌లో ఓ అమ్మాయి పరిచయం అయింది. ఆమె ఎవరు, ఎలా ఉంటుందో కూడా తెలియక ముందు నుంచే ఆమెతో స్నేహం ప్రారంభించిన బాబు.. ప్రతిరోజూ ఆమెతో మాట్లాడేవాడు. ఆమె మెసేజ్ చేయనిది, ఫోన్ చేయనిదే అతడికి రోజు కూడా గడిచేది కాదు. అంతలా ఆమెకు ఆకర్షితుడు అయిన బాబు ఓ మంచి రోజు చూసుకుని తన ప్రేమ విషయం చెప్పాడు. ఆమెకు కూడా బాబు నచ్చడంతో ఓకే చెప్పింది. ఈక్రమంలోనే తాను పాకిస్థాన్‌కు చెందిన అమ్మాయిని అని వివరించింది.

అయినా సరే బాబు ఆమెను ప్రేమిస్తూనే వచ్చాడు. చాలా రోజులుగా మెసేజ్‌లు, ఫోన్ల ద్వారా ప్రేమించుకుంటున్న వీళ్లకు ఒకరినొకరు కలిస్తే బాగుండు అనిపించింది. దీంతో బాబు ప్రేయసిని కలిసేందుకు పాకిస్థాన్ వెళ్లాలనుకున్నాడు. కానీ తన వద్ద వీసా, ప్రయాణ పత్రాలు ఏమీ లేవు. అయినా సరే ప్రేయసిని కలవాలని గట్టిగా నిర్ణయించుకున్న అతడు.. అక్రమంగా పాకిస్థాన్‌లోకి ప్రవేశించాలనుకున్నాడు. ఇప్పటికే రెండు సార్లు ప్రయత్నం కూడా చేశాడు. కానీ విఫలం అయ్యాడు.

అయినా పట్టుదల వీడని బాబు.. తను ప్రేమించిన అమ్మాయి కోసం రిస్క్ చేసి మరీ ఈసారి పాకిస్థాన్ బోర్డర్ దాటేసాడు. నేరుగా బహౌద్దీన్ నగరానికి వెళ్లిపోయాడు. అదే విషయాన్ని ప్రియురాలికి చెప్పగా ఆమె వచ్చి కలిసింది. ఇద్దరూ కలిసి కాసేపు ఊసులాడుకున్నారు. కానీ అంతలోనే అక్కడకు పోలీసులు వచ్చారు. బాబు ఏదో తేడాగా కనిపించేసరికి.. ఆధారాలు చూపించమన్నారు. ఇలా అతడు భారత్ నుంచి వచ్చినట్లు తెలుసుకుని డిసెంబర్ 27వ తేదీన అరెస్ట్ చేశారు. అక్రమంగా దేశంలోకి చొరబడ్డందుకు కేసు నమోదు చేసి కోర్టులో హాజరు పరిచారు.

ఈక్రమంలోనే అతడు తన ఫేస్‌బుక్ ప్రేమాయణం గురించి చెప్పి ఆమెను కలిసేందుకే పాకిస్థాన్ వచ్చినట్లు వివరించాడు. ఇదంతా విన్న న్యాయస్థానం బాబుకు 14 రోజుల జ్యుడీషియల్ రిమాండ్ విధించి, సమగ్రంగా దర్యాప్తు చేయమని పోలీసులకు ఆదేశాలు జారీ చేసింది. విచారణను 2025 జనవరి 10వ తేదీకి వాయిదా వేసింది. అయితే పోలీసులు మాత్రం నిజంగానే బాబు తన ప్రేయసి కోసమే దేశం దాటి వచ్చాడా, లేక ఎవరైనా చెబితే వచ్చాడా అనే కోణంలో దర్యాప్తు చేస్తున్నారు.