ఘోర విమాన ప్రమాదంలో మృత్యుంజయిలుగా ఆ ఇద్దరు.. ఇదెలా సాధ్యం

దక్షిణ కొరియాలో ఆదివారం చోటుచేసుకున్న ఘోర విమాన ప్రమాదంలో ఇద్దరు మాత్రం ప్రాణాలతో బయటపడ్డారు. మువాన్ ఇంటర్నేషనల్ ఎయిర్‌పోర్ట్‌లో ప్రమాదానికి గురైన విమానం రన్‌వే పైనుంచి అదుపుతప్పి గోడను ఢీకొని మంటల్లో కాలిబూడిదయ్యింది. ఈ ఘటనలో 179 మంది ప్రాణాలు కోల్పోయిన విషయం తెలిసిందే. ప్రమాద సమాయనికి సిబ్బంది సహా 181 మంది విమానంలో ఉండగా.. ఇద్దరు మాత్రమే బతికి బయటపడటం ఆశ్చర్యానికి గురిచేస్తోంది. మృత్యుంజయిలు ఇద్దర్నీఫ్లైట్ అటెండెంట్‌లుగా గుర్తించారు. అందులో ఒకరు మహిళ, మరొకరు పురుషుడు కాగా.. వారిద్దరికీ ఆసుపత్రిలో చికిత్స కొనసాగుతోంది. ప్రస్తుతం వారి పరిస్థితి నిలకడగానే ఉన్నట్లు వైద్యులు తెలిపారు.

ఓ ఫ్లైట్‌ అటెండెంట్‌ను లీగా (33) గుర్తించినట్టు అధికారులు తెలిపారు. అయితే, చికిత్స అందిస్తున్న వైద్యులతో.. ‘అసలేం జరిగింది.. నేను ఇక్కడెందుకు ఉన్నా’ అంటూ లీ అన్నట్టు మీడియా కథనాలు వెలువడుతున్నాయి. విమానం ల్యాండింగ్‌ సమయంలో సీటు బెల్టు పెట్టుకోవడం వరకే తనకు గుర్తుందని, ఆ తర్వాత ఏం జరిగిందో తెలియదని చెప్పినట్లు వైద్యులు వెల్లడించారు. ప్రయాణికుల సేవల ఇన్‌ఛార్జిగా ఉన్న లీ విమానం చివరి భాగంలో కూర్చున్నాడని, ప్రమాదంతో షాక్‌కి గురయ్యాడని వారు చెప్పారు. భుజానికి, తలకు గాయాలైనట్టు తెలిపారు.

ప్రమాదం నుంచి బయట పడిన మరో అటెండెంట్‌ను క్వాన్‌గా (25) గుర్తించారు. తూర్పు సియోల్‌లోని అసన్‌ మెడికల్‌ సెంటర్‌లో ఆమెకు చికిత్స కొనసాగుతోంది. తల, పొత్తి కడుపుతో పాటు కాళ్లకు గాయాలైనట్లు వైద్యులు పేర్కొన్నారు. ఆమెకు ప్రాణాపాయం లేదని చెప్పారు. అయితే, ప్రమాదం గురించి అడిగేందుకు సమయం లభించలేదని వివరించారు. విమానం తోక భాగంలో కూర్చోవడంతో పాటు సీటు బెల్టు పెట్టుకోవడం వల్లే ఇద్దరూ ప్రమాదం నుంచి బయటపడినట్టు తెలుస్తోంది. కమర్షియల్ విమానాల్లో తోక భాగాన్ని సురక్షితంగా భావిస్తారు.

ఇక, 2015లో టైమ్ మ్యాగజైన్ అధ్యయనం ప్రకారం... విమాన ప్రమాదం జరిగినప్పుడు వెనుక భాగంలోని సీట్లు అత్యంత సురక్షితమని తేలింది. ముందు, మధ్య వరుసలో కూర్చునే వారి కంటే తోక భాగంలో సీట్లో ఉన్నవారు ప్రమాదాల నుంచి ప్రాణాలతో బయటపడినట్టు నివేదించింది. బ్యాంకాక్ నుంచి మువాన్‌కు 181 మందితో బ్యాంకాక్ నుంచి మువాన్‌కు వస్తోన్న జెజు ఎయిర్‌‌లైన్స్‌కు చెందిన బోయింగ్ 737-800 విమానం ల్యాండింగ్ సమయంలో రన్‌వేపై నుంచి అదుపుతప్పి చివరన ఉన్న కాంక్రీట్ గోడను ఢీకొట్టింది. అక్కడ కాంక్రీట్ గోడ కనుక లేకపోయింటే చాలామంది ప్రాణాలతో బయటపడేవారని నిపుణులు అభిప్రాయపడుతున్నారు. అక్కడ విమానం ఢీకొట్టగానే కూలిపోయేలా గోడ ఉండాలని, కానీ కాంక్రీట్‌తో ఎందుకు నిర్మించారని అనుమానం వ్యక్తం చేస్తున్నారు.